“பாஜகவுக்கே இந்த சட்டம் நல்லதல்ல; காரணம்...” - சட்டத்துறை மாநாட்டில் முதல்வர் மு.க.ஸ்டாலின் 

சென்னையில் திமுக சட்டத்துறையின் 3வது மாநில மாநாடு நடைபெற்றது.

முதலமைச்சர் ஸ்டாலின்

Source : twitter

இது வழக்கறிஞர்கள் அணி மட்டுமல்ல; கழகத்தை காக்கும் காவலர் அணி என முதலமைச்சர் ஸ்டாலின் புகழாரம் சூட்டியுள்ளார். 

சென்னையில் திமுக சட்டத்துறையின் 3வது மாநில மாநாடு நடைபெற்றது. அதில் ஒரே நாடு ஒரே தேர்தல் மசோதாவை திரும்ப பெற வலியுறுத்தி தீர்மானம் நிறைவேற்றப்பட்டது. மேலும் சட்டமன்ற நடவடிக்கைகளை புறக்கணிக்கும் ஆளுநர், தமிழர்களிடம் மன்னிப்பு கேட்க வேண்டும் என தீர்மானம் நிறைவேற்றப்பட்டது. பாஜக அரசின் ஊதுகுழலக செயல்பட்டு, சட்டமன்றத்தின் மாண்பை சீர்குலைக்கும் ஆளுநருக்கு கண்டனம் தெரிவித்து தீர்மானம் நிறைவேற்றப்பட்டது. 

இந்த மாநாட்டில் முதலமைச்சர் ஸ்டாலின் கலந்து கொண்டு உரையாற்றினார். அப்போது பேசிய அவர், “திமுக சட்டத்துறை தனித்துவம் பெற்று திகழ்கிறது. திமுகவில் உள்ள அணிகளில் தனித்துவமானதுதான் சட்டத்துறை. இது வழக்கறிஞர் அணி மட்டுமல்ல. கழகத்தை காக்கும் காவல் அணி. 

மக்களுக்கான போராட்டங்களை நடத்தி ஏராளமான வழக்குகளை திமுக சந்தித்துள்ளது. நாள் தோறும் கட்டமைக்கப்படும் பொய்களை தகர்த்தெறிந்து 75 ஆண்டுகால கற்கோட்டையாக திமுக நிமிர்ந்து நிற்கிறது. 

எம்.ஜி.ஆர் ஆட்சி காலத்தில் தலைவர் கருணாநிதி மேல் ஏராளமான வழக்குகளை போட்டார்கள். அப்போது கலைஞருக்காக வாதாட பெரும் படையே வரும். எதிர்க்கட்சியாக இருக்கும்போது ஏராளமான வழக்குளை சந்தித்திருக்கிறோம். அப்போது துணையாக நின்றது சட்டத்துறை. 

அண்ணா அறிவாலயத்தின் இடத்திற்கே நெருக்கடி வந்தது. அங்கு கட்டடம் கட்டக்கூடாது என தடை போட்டார்கள். அந்த தடையை உடைத்தது இந்த சட்டத்துறை தான். நமது கருப்பு சிவப்பு கொடிக்கும், உதயசூரியன் சின்னத்திற்கும் ஒரு காலத்தில் பிரச்சினை வந்தது. அதையே மீட்டுத்தந்தது இந்த சட்டத்துறைதான். 

ஜெயலலிதா ஆட்சியில் முறைகேடுகளை தடுக்க சண்முகசுந்தரம் தமது உயிரை பணயம் வைத்து போராடினார். அவருடைய தியாகம் விலைமதிப்பில்லாதது. தமிழ்நாடு, தமிழ் மொழி, தமிழ் இனத்தை காக்கும் அரணாக தூணாக திமுக சட்டத்துறை திகழ்கிறது. 

பாஜகவை பொறுத்தவரை ஒரே மதம், ஒரே மொழி, ஒரே பண்பாடு, ஒரே உடை, ஒரே உணவு என ஒற்றை பண்பாட்டை நோக்கி நாட்டை நகர்த்த பார்க்கிறது. அதற்காகத்தான் ஒரே தேர்தல் என்ற நிலைப்பாட்டை எடுக்க பார்க்கிறார்கள். மாநில அரசின் உரிமைகளை நசுக்க பார்க்கிறார்கள். பாஜகவை பொறுத்தவரை குறுகிய கால செயல்திட்டமாக இருக்காது. நீண்டகால செயல்திட்டமாகத்தான் இருக்கும். 

இது தனிமனிதர் என்ற நிலைப்பாட்டுக்கு தான் வழிவகுக்கும். இது பாஜகவுக்கே நல்லதல்ல. பிரதமராக இருக்க கூடிய மோடியை சர்வாதிகாரராக மாற்றத்தான் இந்த சட்டம் பயன்படும். பாஜக விரிக்கும் வலையில் கூட்டணி கட்சிகள் விழுந்துவிடக்கூடாது. ஒரே நேரத்தில் தேர்தல் நடத்தினால் தான் அதிகமாக செலவாகும். ஒரே நேரத்தில் தேர்தல் நடத்துவதால் ஆட்கள், மிஷின்கள் என செலவு அதிகமாகும் என குரேஷி அவர்கள் சொன்னார்கள். இதனால் ஒரே நாடு ஒரே தேர்தல் முறையை நாம் இறுதிவரை எதிர்த்தாக வேண்டும்” எனத் தெரிவித்தார்.