இரண்டு உயிர்; மனசாட்சி இல்லையா? கூச்சமா இல்லையா? – ஸ்டாலினுக்கு அண்ணாமலை கேள்வி

மயிலாடுதுறையில் நடந்த இரட்டை கொலை சம்பவத்திற்கு பாஜக மாநிலத் தலைவர் அண்ணாமலை கண்டனம் தெரிவித்துள்ளார்.

ஸ்டாலின் - அண்ணாமலை

Source : twitter

 

மயிலாடுதுறையில் நடந்த இரட்டை கொலை சம்பவத்திற்கு பாஜக மாநிலத் தலைவர் அண்ணாமலை கண்டனம் தெரிவித்துள்ளார்.

இதுகுறித்து அவர் தனது எக்ஸ் தளத்தில், “மயிலாடுதுறை மாவட்டம் முட்டம் கிராமத்தில், சாராய விற்பனையைத் தட்டிக் கேட்ட, எஞ்சினியரிங் கல்லூரி மாணவர் உட்பட இரண்டு இளைஞர்களை, சாராய வியாபாரிகள் படுகொலை செய்திருப்பது பெரும் அதிர்ச்சியை ஏற்படுத்தியிருக்கிறது. அவர்கள் குடும்பத்தினருக்கு ஆழ்ந்த இரங்கல்களைத் தெரிவித்துக் கொள்கிறேன்.

தமிழகம் முழுவதுமே கள்ளச்சாராயம் ஆறாக ஓடிக் கொண்டிருக்கிறது. இது அந்தந்த பகுதி காவல்துறைக்குத் தெரியாமலா இருக்கும்? இன்று சாராய வியாபாரிகளால் இரண்டு இளைஞர்கள் உயிர் போயிருக்கிறதே. உங்களுக்கெல்லாம் மனசாட்சி என்று ஒன்று இருக்கிறதா?

துருப்பிடித்த இரும்புக்கையை வைத்துக் கொண்டு, தன்னைத்தானே புகழ்ந்து தினமும் ஷூட்டிங் நடத்திக் கொண்டிருக்க, முதலமைச்சர் திரு. ஸ்டாலினுக்குக் கூச்சமில்லையா? சட்டம் ஒழுங்கைக் காப்பாற்ற முடியவில்லை என்றால், தமிழ் சினிமாவில் முழு நேர துணை நடிகராகச் செல்ல வேண்டியதுதானே? தமிழ்த் திரையுலகம் உங்கள் கைகளில்தானே இருக்கிறது.

தமிழகம் தற்போது, 2006 - 2011 திமுகவின் இருண்ட ஆட்சிக் காலத்தை விட, மிக மோசமான நிலைக்குச் சென்று கொண்டிருக்கிறது. உங்கள் கையாலாகாத்தனத்தால், அமைதியான பொதுமக்களை, மிக மிக மோசமான எதிர்விளைவுகளுக்குத் தூண்டிக் கொண்டிருக்கிறீர்கள் என்பதை முதலமைச்சர் ஸ்டாலின்  உணர வேண்டும்” எனத் தெரிவித்துள்ளார்.

இதனிடையே மயிலாடுதுறை பகுதியில் நடைபெற்ற இரட்டைக் கொலைக்கு மது விற்பனை காரணம் அல்ல என காவல்துறை விளக்கம் அளித்துள்ளது. ஒரே தெருவை சேர்ந்த இருவருக்குள் ஏற்பட்ட முன் விரோதமே இரட்டை கொலைக்கு காரணம் என காவல்துறை தெரிவித்துள்ளது.

தினேஷ், மூவேந்தன் இடையே ஏற்பட்ட வாய்த் தகராறே கொலைக்கு காரணம் என தெரிவிக்கப்பட்டுள்ளது. தினேஷை மூவேந்தன் தரப்பு கத்தியால் தாக்கிய போது, ஹரிஷ், சக்தி ஆகியோர் தடுத்துள்ளனர் எனவும் தினேஷ் மீதான தாக்குதலின்போது தடுக்க முயன்ற ஹரிஷ், சக்தி ஆகியோர் இறந்துள்ளனர் எனவும் போலீஸ் தரப்பில் விளக்கம் அளிக்கப்பட்டுள்ளது.

முன்னதாக, மயிலாடுதுறை அருகே பெரம்பூர் காவல் சரகத்திற்குட்பட்ட முட்டம் கிராமத்தில், பொறியியல் கல்லூரி மாணவன் மற்றும் பாலிடெக்னிக் படித்து முடித்துவிட்டு வேலை தேடிக்கொண்டிருந்த இளைஞன் ஆகிய இரண்டு பேரை சாராய வியாபாரிகள் கத்தியால் குத்தி படுகொலை செய்யப்பட்ட சம்பவம் பரபரப்பையும், பதட்டத்தையும் ஏற்படுத்தியுள்ளது. தெருவில் ஏன் சாராயம் விற்கிறீர்கள் என கேட்டதற்காக, இருவர் கொல்லப்பட்ட சம்பவம் அதிர்ச்சியை ஏற்படுத்தியுள்ளது. உயிரிழந்தவர்கள் ஹரிஷ் மற்றும் ஹரிசக்தி என அடையாளம் காணப்பட்டுள்ளது.