150 கால பாரம்பரியம்: மயிலாடுதுறை டூ காரைக்குடி ரயில் சேவை மீண்டும் தொடக்கம் - ரயில் பயணிகள் உற்சாகம்..!

150 ஆண்டுகள் பழமை வாய்ந்த மயிலாடுதுறை ரயில் சந்திப்பிலிருந்து காரைக்குடிக்கு நேரடி ரயில் சேவையை பிரதமர் மோடி காணொளி காட்சி மூலம் கொடியசைத்து தொடங்கி வைத்தார்.

புதிய ரயில் துவக்க விழா

Source : ABP

மயிலாடுதுறை: டெல்டா மாவட்ட மக்களின் நீண்ட கால கோரிக்கையை ஏற்று, மயிலாடுதுறை - காரைக்குடி இடையேயான நேரடி ரயில் சேவையை பிரதமர் நரேந்திர மோடி நேற்று மாலை திருச்சிராப்பள்ளியில் இருந்து காணொளி காட்சி வாயிலாக பச்சைக்கொடியசைத்து தொடங்கி வைத்தார். மீண்டும் நேரடி ரயில் சேவை தொடங்கப்பட்டதால் பயணிகள் மிகுந்த மகிழ்ச்சி அடைந்துள்ளனர்.

வரலாற்றுப் பின்னணியும் ரயில்வே சந்திப்பும்

மயிலாடுதுறை ரயில்வே சந்திப்பு என்பது சாதாரணமான ஒன்றல்ல; இது ஆங்கிலேயர் ஆட்சிக்காலத்தில் தொடங்கப்பட்டு, சுமார் 150 ஆண்டுகள் பழமைவாய்ந்த ஒரு வரலாற்றுச் சிறப்புமிக்க சந்திப்பாகும். ஆரம்ப காலத்தில் இப்பாதைகள் 'மீட்டர் கேஜ்' (Meter Gauge) ஆக இருந்தபோது, மயிலாடுதுறையிலிருந்து காரைக்குடிக்கு காலை மற்றும் மாலை என இருவேளைகளும் நேரடி ரயில்கள் இயக்கப்பட்டன. இது தஞ்சாவூர், திருவாரூர் மற்றும் சிவகங்கை மாவட்டங்களை இணைக்கும் முக்கிய போக்குவரத்துத் தடமாக விளங்கியது.

இருப்பினும், ரயில்வே நிர்வாகம் மீட்டர் கேஜ் பாதைகளை 'அகல ரயில் பாதை'யாக (Broad Gauge) மாற்றும் பணிகளைத் தொடங்கியபோது, இந்த நேரடி ரயில் சேவை தற்காலிகமாக நிறுத்தப்பட்டது. பணிகள் முடிந்து நீண்ட நாட்களுக்குப் பிறகு, காலையில் மட்டும் ஒரு ரயில் இயக்கப்பட்டு வந்தது. ஆனால், கடந்த 2024-ம் ஆண்டு அந்தச் சேவையும் நிறுத்தப்பட்டு, காரைக்குடி ரயிலானது திருவாரூரில் இருந்து மட்டுமே இயக்கப்பட்டு வந்தது. இதனால் மயிலாடுதுறை பகுதி பயணிகள் காரைக்குடி செல்ல திருவாரூர் சென்று அங்கிருந்து ரயில் மாற வேண்டிய சூழல் நிலவியது.

பிரதமர் தொடங்கி வைத்த கோலாகல விழா

இந்நிலையில், பொதுமக்களின் கோரிக்கையை ஏற்று மீண்டும் மயிலாடுதுறை - காரைக்குடி நேரடி ரயில் சேவைக்கு ரயில்வே அமைச்சகம் அனுமதி அளித்தது. அதனைத் தொடர்ந்து திருச்சிராப்பள்ளியில் நடைபெற்ற அரசு விழாவில் கலந்துகொண்ட பிரதமர் நரேந்திர மோடி, பல்வேறு வளர்ச்சித் திட்டங்களுடன் சேர்த்து இந்த புதிய ரயில் சேவையையும் காணொளி காட்சி வாயிலாகத் தொடங்கி வைத்தார்.

மயிலாடுதுறை ரயில் நிலையத்தில் நடைபெற்ற விழாவில், ரயில்வே உயர் அதிகாரிகள், மக்கள் பிரதிநிதிகள் மற்றும் பொதுமக்கள் திரளாகக் கலந்துகொண்டனர். பிரதமர் கொடியசைத்தவுடன், அலங்கரிக்கப்பட்ட ரயில் மயிலாடுதுறை சந்திப்பில் இருந்து புறப்பட்டது.

தேசியக் கொடியுடன் உற்சாகப் பயணம் செய்த மாணவர்கள்

இந்தத் தொடக்க விழாவின் சிறப்பம்சமாக, பள்ளி மாணவ-மாணவிகள் பெருமளவில் இந்த ரயிலில் பயணித்தனர். ரயிலின் ஜன்னல் ஓரங்களில் அமர்ந்திருந்த குழந்தைகள், கைகளில் தேசியக் கொடியை ஏந்தி "பாரத் மாதா கீ ஜே" என முழக்கமிட்டபடி உற்சாகமாகச் சென்றனர். ரயிலின் உட்புறம் வண்ண மலர்களாலும் பலூன்களாலும் அலங்கரிக்கப்பட்டிருந்தது. நீண்ட இடைவெளிக்குப் பிறகு தங்கள் ஊரிலிருந்து காரைக்குடிக்கு நேரடி ரயில் செல்வதைக் கண்ட அப்பகுதி மக்கள் மலர்களைத் தூவி ரயிலை வரவேற்றனர்.

ரயில் கால அட்டவணை மற்றும் விவரங்கள்

புதிய அட்டவணையின்படி, இந்த ரயில் (எண்: 56836/56835) மயிலாடுதுறை மற்றும் காரைக்குடி இடையே தினமும் இயக்கப்படவுள்ளது. அதன் விவரங்கள் பின்வருமாறு:

56836 - காரைக்குடியில்காலை 6.15 புறப்பட்டு மயிலாடுதுறைக்கு காலை 10.40 - க்கு வந்தடையும்.

56835 - மயிலாடுதுறையில் மாலை 5.10 புறப்பட்டு காரைக்குடி இரவு 9.15 சென்றடையும்.

இந்த ரயிலானது பேரளம், திருவாரூர், திருத்துறைப்பூண்டி, முத்துப்பேட்டை, அதிராம்பட்டினம் மற்றும் பட்டுக்கோட்டை வழியாக காரைக்குடியைச் சென்றடையும்.

பயணிகள் சங்கத்தின் கோரிக்கையும் மகிழ்ச்சியும்

நேரடி ரயில் சேவை மீண்டும் தொடங்கப்பட்டது குறித்து ரயில் பயணிகள் சங்கத்தினர் கூறுகையில்:

"மயிலாடுதுறையில் இருந்து காரைக்குடிக்கு நேரடி ரயில் சேவை என்பது வணிக ரீதியாகவும், ஆன்மீக ரீதியாகவும் மிக முக்கியமான ஒன்று. தற்போது மாலை நேரத்தில் மயிலாடுதுறையிலிருந்து காரைக்குடிக்கு ரயில் இயக்கப்படுவது வரவேற்கத்தக்கது. இது தென் மாவட்டங்களுக்குச் செல்லும் பயணிகளுக்குப் பெரிய உதவியாக இருக்கும்."

இருப்பினும், பழைய மீட்டர் கேஜ் காலத்தில் இருந்தது போல, காலை நேரத்திலும் மயிலாடுதுறையில் இருந்து காரைக்குடிக்கு ஒரு நேரடி ரயிலை இயக்க வேண்டும் எனப் பொதுமக்கள் மற்றும் ரயில் பயணிகள் சங்கத்தினர் மத்திய அரசுக்கு மேலதிக கோரிக்கையை விடுத்துள்ளனர்.

தற்போது தொடங்கப்பட்டுள்ள இந்தச் சேவையானது, காவிரி டெல்டா மாவட்ட மக்களையும், செட்டிநாடு பகுதியையும் எளிதாக இணைக்கப் பயன்படும் என்பதில் ஐயமில்லை. இந்த ரயில் சேவையின் மூலம் உள்ளூர் சிறு குறு வியாபாரிகள் மற்றும் மாணவர்கள் பெரும் பயன் அடைவார்கள் என எதிர்பார்க்கப்படுகிறது.