Ditwah cyclone: தத்தளிக்கும் மயிலாடுதுறை புறநகர் பகுதிகள்: 14 செ.மீ கனமழையால் குடியிருப்புக்குள் வெள்ளம்! அதிகாரிகள் அலட்சியம், மக்கள் தவிப்பு!

மயிலாடுதுறை மாவட்டத்தில் கடந்த சில தினங்களாக பெய்துவரும் கனமழை காரணமாக மயிலாடுதுறை புறநகர் பகுதிகளில் குடியிருப்புக்குள் வெள்ளம் சூழ்ந்ததால் பொதுமக்கள் அவதிக்குள்ளாகி வருகின்றனர்.

குடியிருப்புகளை சூழ்ந்துள்ள மழைநீர்

Source : ABP

மயிலாடுதுறை: தென்மேற்கு வங்கக் கடலில் உருவாகியுள்ள 'டிட்வா' புயல் சின்னத்தின் கோரத் தாண்டவத்தால், மயிலாடுதுறை மாவட்டம் முழுவதும் கடந்த மூன்று நாட்களாகத் தொடர்ச்சியாகக் கனமழை பெய்து வருகிறது. விடிய விடிய பெய்து வரும் இந்தத் தீவிர மழையால், மாவட்டத்தின் புறநகர் பகுதிகளில் உள்ள நூற்றுக்கணக்கான வீடுகள் வெள்ளத்தால் சூழப்பட்டு, பொதுமக்கள் மிகுந்த அவதிக்கு ஆளாகியுள்ளனர். குறிப்பாக, பலமுறை புகார் அளித்தும் அதிகாரிகள் இதுவரை எட்டிப் பார்க்கவில்லை எனப் பாதிக்கப்பட்ட மக்கள் வேதனையுடன் தெரிவித்துள்ளனர்.

சராசரிக்கும் அதிகமான மழைப்பொழிவு – நகரம் முழுவதும் நீர் தேக்கம்

இன்று காலை 6 மணி நிலவரப்படி, மயிலாடுதுறை மாவட்டத்தில் சராசரியாக 14 சென்டிமீட்டர் மழை பதிவாகியுள்ளது. இந்த அதீத மழைப்பொழிவு காரணமாக, தாழ்வான பகுதிகளில் உள்ள குடியிருப்புப் பகுதிகள் அனைத்தும் தண்ணீரில் மூழ்கும் அபாயத்தை எதிர்கொண்டுள்ளன.

மயிலாடுதுறையின் புறநகர்ப் பகுதிகளான பட்டமங்கலம் ஊராட்சிக்குட்பட்ட சீனிவாசபுரம், ராமகிருஷ்ணா நகர், ஏ.ஆர்.சி. ரத்தினம் நகர், கீழப்பட்டமங்கலம் உள்ளிட்ட பகுதிகளில் உள்ள நூற்றுக்கணக்கான வீடுகளை மழை நீர் சூழ்ந்துள்ளது. வீடுகளைச் சுற்றிலும் குளம்போல் தண்ணீர் தேங்கி நிற்பதால், குடியிருப்புவாசிகள் வீட்டிற்குள்ளேயே முடங்கியுள்ளனர்.

அடைக்கப்பட்ட வடிகால் வாய்க்கால்

இப்பகுதியில் வெள்ளம் தேங்குவதற்கான முக்கியக் காரணமாக, அருகில் உள்ள ஒரு பெரிய குளத்தில் தண்ணீர் நிரம்பி மறுகால் செல்லும் வடிகால் வாய்க்கால் முழுமையாகச் சேதமடைந்து அடைப்பட்டுப் போனதுதான் என கூறப்படுகிறது. 

பொதுவாக, குளத்தின் நீர்மட்டம் உயர்ந்தால், உபரி நீர் இந்த வடிகால் வாய்க்கால் வழியாக வெளியேறிவிடும். ஆனால், வாய்க்கால் அடைபட்டுப் போனதாலும், பல இடங்களில் ஆக்கிரமிப்புகள் இருப்பதாலும், தண்ணீர் வெளியேற வழியின்றி குடியிருப்புப் பகுதிகளை நோக்கித் திரும்பி, தற்போது சாலைகளையும் வீடுகளையும் சூழ்ந்துள்ளது.

தொடர்ந்து மழை பெய்து வருவதால், தேங்கியுள்ள தண்ணீரின் மட்டம் மேலும் மேலும் உயர்ந்து வருகிறது. இதனால், மக்களின் அன்றாடச் செயல்பாடுகள் முற்றிலுமாகப் பாதிக்கப்பட்டுள்ளன. சாலைகளில் முழங்கால் அளவுக்குத் தண்ணீர் தேங்கி நிற்பதால், இருசக்கர வாகனங்களில் செல்பவர்கள் மிகுந்த சிரமத்திற்கு ஆளாகியுள்ளனர். மேலும், பாதசாரிகள் நடந்து செல்லக்கூட வழியின்றித் தத்தளித்து வருகின்றனர்.

பலன் தராத மனுக்கள் – அதிகாரிகளின் அலட்சியம்

இந்தப் புறநகர் பகுதிகளில் வெள்ளம் தேங்குவது இது முதல் முறையல்ல. ஒவ்வொரு மழைக்காலத்திலும் இதே நிலைதான் தொடர்கிறது. வடிகால் வாய்க்காலைச் சீரமைக்க வேண்டும் என்றும், ஆக்கிரமிப்புகளை அகற்ற வேண்டும் என்றும் இப்பகுதி மக்கள் கடந்த காலங்களில் பலமுறை மாவட்ட நிர்வாகத்திடம் மனு அளித்துள்ளனர்.

குறிப்பாக, தமிழக அரசின் மக்கள் தொடர்பு திட்டமான 'உங்களுடன் ஸ்டாலின் திட்ட முகாமில்' கூட இதுகுறித்துப் புகார் மனு அளிக்கப்பட்டதாகவும், ஆனால் இன்றுவரை எந்தவிதமான பலனும் கிடைக்கவில்லை என்றும் பாதிக்கப்பட்ட மக்கள் வேதனையுடன் தெரிவிக்கின்றனர்.

தற்போது, கனமழையால் தண்ணீர் தேங்கியுள்ள நிலையில், நிலைமையின் தீவிரத்தை உணர்ந்து மாவட்ட நிர்வாகம் மற்றும் வருவாய்த் துறை அதிகாரிகளின் தொலைபேசி வாயிலாகப் பொதுமக்கள் மீண்டும் புகார் அளித்துள்ளனர்.

"நாங்கள் தொடர்ந்து மாவட்ட நிர்வாகத்திற்குத் தொலைபேசி வாயிலாகப் புகார் தெரிவித்துக் கொண்டிருக்கிறோம். மூன்று நாட்களாகத் தண்ணீர் குடியிருப்புப் பகுதிகளைச் சூழ்ந்துள்ளது. ஆனால், ஒரு அதிகாரி கூட இதுவரை எங்கள் பகுதிக்கு வந்து பார்வையிடவில்லை. நிவாரணப் பணிகளைத் தொடங்கவும் இல்லை. அரசின் அலட்சியம் எங்களுக்கு மிகுந்த மனவேதனையை அளிக்கிறது," என்று சீனிவாசபுரம் பகுதியைச் சேர்ந்த பொதுமக்கள் குற்றச்சாட்டியுள்ளனர். 

விஷ ஜந்துகள் அச்சுறுத்தல் – மக்கள் மன்றாடல்

வீடுகளைச் சுற்றிலும் தண்ணீர் தேங்கி நிற்பதால், பொதுமக்களுக்கு மற்றுமொரு அச்சுறுத்தலும் ஏற்பட்டுள்ளது. மழை நீர் தேங்கியுள்ளதால், பாம்பு உள்ளிட்ட விஷ ஜந்துகள் குடியிருப்புப் பகுதிகளுக்குள்ளும், சில சமயங்களில் வீடுகளுக்குள்ளும் நுழையும் அபாயம் அதிகரித்துள்ளதாக அப்பகுதி மக்கள் அச்சம் தெரிவிக்கின்றனர்.

மழை நீரும், கழிவு நீரும் கலந்து தேங்கி இருப்பதால், சுகாதாரக் கேடு ஏற்பட்டு தொற்று நோய்கள் பரவும் அபாயமும் உள்ளது. எனவே, மாவட்ட நிர்வாகம் இனியும் கால தாமதம் செய்யாமல், உடனடியாகப் பொறியாளர்கள் மற்றும் துப்புரவுப் பணியாளர்களை அனுப்பி, வடிகால் வாய்க்காலில் உள்ள ஆக்கிரமிப்புகளை அகற்றி, வாய்க்காலைச் சீர் செய்து தண்ணீரை வடிய வைக்க விரைந்து நடவடிக்கை எடுக்க வேண்டும் என்று நூற்றுக்கணக்கான புறநகர் பகுதி மக்கள் ஒருமித்த குரலில் கோரிக்கை விடுத்துள்ளனர்.

நிலைமையின் தீவிரத்தைக் கருத்தில் கொண்டு, மாவட்ட ஆட்சியர் உடனடியாக இந்தப் புறநகர்ப் பகுதிகளில் ஆய்வு மேற்கொண்டு, மக்களின் துயரத்தைப் போக்க நிரந்தரமான தீர்வைக் காண வேண்டும் என்பதே அனைவரின் எதிர்பார்ப்பாக உள்ளது.