குழந்தைகளுக்கான மத்திய அரசு விருது - பெறுவது எப்படி...? இதோ முழு விபரம்...!

2025 ஆம் ஆண்டுக்கான பிரதான் மந்திரி ராஷ்ட்ரிய பால் புரஸ்கார் விருதிற்கு திறமையான குழந்தைகள் விண்ணப்பித்து மாவட்டத்திற்கு பெருமை சேர்க்க வேண்டும் என மாவட்ட ஆட்சியர் வேண்டுகோள் விடுத்துள்ளார்.

மாவட்ட ஆட்சியர் ஸ்ரீ காந்த்

Source : ABP

பிரதான் மந்திரி ராஷ்ட்ரிய பால் புரஸ்கார் விருது

இந்திய அரசின் பெண்கள் மற்றும் குழந்தைகள் மேம்பாட்டு அமைச்சகத்தால் வழங்கப்படும் மதிப்புமிக்க பிரதான் மந்திரி ராஷ்ட்ரிய பால் புரஸ்கார் விருது, 2025 ஆம் ஆண்டுக்கான விருதுக்கு விண்ணப்பிக்க அறிவிப்பு வெளியாகியுள்ளது. தன்னலமற்ற துணிச்சலான செயல்களில் ஈடுபட்டு, சமூகத்தில் பரவலான மற்றும் வெளிப்படையான தாக்கத்தை ஏற்படுத்திய திறமையான குழந்தைகளின் திறமைகளை அங்கீகரிக்கும் வகையில் இந்த விருது வழங்கப்படுகிறது.

மாவட்ட ஆட்சியர் அறிவிப்பு 

இந்நிலையில் இதுகுறித்து மயிலாடுதுறை மாவட்ட ஆட்சியர் ஹெச்.ஸ்ரீகாந்த் வெளியிட்டுள்ள செய்திக் குறிப்பில் கூறியதாவது; இந்திய அரசின் பெண்கள் மற்றும் குழந்தைகள் மேம்பாட்டு அமைச்சகத்தால் வழங்கப்படும் மதிப்புமிக்க பிரதான் மந்திரி ராஷ்ட்ரிய பால் புரஸ்கார் விருது, 2025 ஆம் ஆண்டுக்கான விருதுக்கு விண்ணப்பிக்க அறிவிப்பு வெளியாகியுள்ளது.

"பிரதான் மந்திரி ராஷ்ட்ரிய பால் புரஸ்கார் விருது, நமது நாட்டின் எதிர்கால தூண்களான இளம் தலைமுறையினரின் திறமைகளை அங்கீகரிக்கும் ஒரு சிறந்த தளமாகும். நமது மாவட்டத்தைச் சேர்ந்த திறமையான குழந்தைகள் பலர் இந்த விருதினைப் பெற்று, மற்றவர்களுக்கு ஒரு உந்துசக்தியாக அமைய வேண்டும் என்று நான் விரும்புகிறேன். விளையாட்டு, சமூக சேவை, அறிவியல் மற்றும் தொழில்நுட்பம் போன்ற துறைகளில் அசாதாரணமான திறமைகளை வெளிப்படுத்திய குழந்தைகள் அனைவரும் இந்த வாய்ப்பைப் பயன்படுத்திக்கொள்ளுமாறு கேட்டுக்கொள்கிறேன். பெற்றோர்கள், ஆசிரியர்கள் மற்றும் பிற சமூக ஆர்வலர்கள் இந்த விருது குறித்து குழந்தைகளுக்கு விழிப்புணர்வை ஏற்படுத்தி, அவர்களை விண்ணப்பிக்க ஊக்குவிக்குமாறு கேட்டுக்கொள்கிறேன். உரிய நேரத்தில் விண்ணப்பங்களை சமர்ப்பித்து, நமது மாவட்டத்திற்கு பெருமை சேர்க்க வேண்டும்" என்று தெரிவித்தார்.

விருது மற்றும் அதன் நோக்கம்

பிரதான் மந்திரி ராஷ்ட்ரிய பால் புரஸ்கார் விருது, இந்தியாவின் மிக உயர்ந்த குடிமகன் விருதுகளில் ஒன்றாகும், இது இளம் திறமையாளர்களை ஊக்குவிக்கவும், அவர்களின் சாதனைகளை பாராட்டவும் வடிவமைக்கப்பட்டுள்ளது. இது விளையாட்டு, சமூக சேவை, அறிவியல் மற்றும் தொழில்நுட்பம் போன்ற பல்வேறு துறைகளில் சிறந்து விளங்கும் குழந்தைகளுக்கு வழங்கப்படுகிறது. இந்த விருது, குழந்தைகளின் அசாதாரண திறமைகளை வெளிக்கொணர்ந்து, அவர்களை மேலும் ஊக்குவிப்பதன் மூலம் எதிர்கால தலைமுறையினருக்கு ஒரு முன்மாதிரியாக அமையும் நோக்குடன் வழங்கப்படுகிறது.

யார் விண்ணப்பிக்கலாம்?

இந்த மதிப்புமிக்க விருதினைப் பெற, விண்ணப்பிக்கும் குழந்தைகள் இந்திய குடிமகனாக இருக்க வேண்டும் மற்றும் இந்தியாவில் வசிப்பவராக இருக்க வேண்டும். விண்ணப்பம் செய்பவர்கள் 5 வயது முதல் 18 வயதிற்குட்பட்டவர்களாக இருக்க வேண்டும். இந்த வயது வரம்பிற்குட்பட்ட அனைத்து தகுதியான குழந்தைகளும் தங்கள் சாதனைகளுடன் விண்ணப்பிக்கலாம்.

விண்ணப்பிக்கும் முறை

இந்த விருதுக்கான விண்ணப்ப செயல்முறை முழுமையாக ஆன்லைன் மூலம் மட்டுமே மேற்கொள்ளப்பட வேண்டும். விண்ணப்பதாரர்கள் https://awards.gov.in என்ற ஆன்லைன் போர்ட்டல் மூலம் மட்டுமே தங்கள் விண்ணப்பங்களை சமர்ப்பிக்க வேண்டும். இந்த விருதுக்கு குழந்தை தானாகவோ அல்லது பெற்றோர்கள், ஆசிரியர்கள் மற்றும் பிற அலுவலர்கள் மூலம் பரிந்துரைக்கப்பட்டோ விண்ணப்பிக்கலாம். இந்த எளிமையான ஆன்லைன் செயல்முறை, நாட்டின் அனைத்து பகுதிகளிலிருந்தும் தகுதியான குழந்தைகள் விண்ணப்பிப்பதை உறுதி செய்கிறது.

விண்ணப்பிக்க கடைசி தேதி

2025 ஆம் ஆண்டுக்கான பிரதான் மந்திரி ராஷ்ட்ரிய பால் புரஸ்கார் விருதுக்கான விண்ணப்பங்களை பதிவு செய்வதற்கான கடைசி தேதி 31.07.2025 ஆகும். இந்த தேதிக்கு முன்னதாக அனைத்து விண்ணப்பங்களும் ஆன்லைன் போர்ட்டலில் சமர்ப்பிக்கப்பட வேண்டும். தாமதமாக வரும் விண்ணப்பங்கள் ஏற்றுக்கொள்ளப்பட மாட்டாது என்பதால், ஆர்வமுள்ளவர்கள் இந்த காலக்கெடுவை கவனத்தில் கொள்ளுமாறு கேட்டுக்கொள்ளப்படுகிறார்கள்.

விருது வழங்கும் விழா

விருது பெறுபவர்கள் இந்தியக் குடியரசுத் தலைவரால் கௌரவிக்கப்படுவார்கள். இந்த விருது வழங்கும் விழா ஒவ்வொரு ஆண்டும் ஜனவரி மாதம் புதுதில்லியில் நடைபெறுகிறது. இந்த விருது பெறுபவர்களுக்கு ஒரு பதக்கம், 1,00,000 ரூபாய் ரொக்கப் பரிசு மற்றும் ஒரு சான்றிதழ் வழங்கப்படும். இந்த விருது, குழந்தைகளின் எதிர்கால முயற்சிகளுக்கு ஒரு உந்துசக்தியாகவும், அவர்களின் சாதனைகளுக்கு ஒரு அங்கீகாரமாகவும் அமையும். இந்த அரிய வாய்ப்பை அனைவரும் பயன்படுத்திக் கொண்டு, நமது நாட்டின் இளம் திறமைகளை உலகறியச் செய்யுமாறு கேட்டுக்கொள்ளப்படுகிறார்கள். மேலும் தகவல்களுக்கு, https://awards.gov.inஎன்ற இணையதளத்தைப் பார்வையிடலாம்.

இதையும் படிக்க

IRCTC Tatkal Booking: ஆதார் இருந்தா போதும்.. இனி தட்கல் டிக்கெட் ஈசியாக புக் பண்ணாலம்! அமைச்சர் சொன்ன குட் நியூஸ்

LIVE | Kerala Lottery Result Today (05.06.2025): கோடியில் ஒருத்தன்.... கேரள லாட்டரில யாருக்கு அந்த ஒரு கோடி?