கொளுத்தும் வெயிலுக்கு இதமாக ஒரு குளியல்.. கும்பக்கரை அருவியில் குவிந்த சுற்றுலா பயணிகள்
தொடர்ந்து பெய்த கோடை மழையால் கும்பக்கரை அருவியில் ஆர்ப்பரித்து கொட்டும் நீர். அருவியில் குளித்து கோடை வெப்பத்தின் தாக்கத்தை தனித்து மகிழும் சுற்றுலா பயணிகள்.
தேனி மாவட்டம் பெரியகுளம் அருகே மேற்கு தொடர்ச்சி மலை மற்றும் கொடைக்கானல் மலை அடிவாரத்தில் இயற்கையின் சூழலில் பெரியகுளத்தில் இருந்து 9 கிலோமீட்டர் தொலைவில் அமைந்துள்ளது கும்பக்கரை அருவி. இந்த அருவிக்கு மேற்குத் தொடர்ச்சி மலைப்பகுதியில் பெய்கின்ற மழைநீர் சிறு, குறு ஓடைகள் வழியாக வந்து கும்பக்கரை ஆற்றை அடைந்து அருவியாக ஆர்ப்பரிக்கிறது. இந்த அருவிக்கு தேனி மாவட்டம் மட்டுமின்றி தமிழகத்தின் பல்வேறு மாவட்டங்களில் இருந்தும் வெளி மாநிலங்களில் இருந்தும் சுற்றுலா பயணிகள் வருவது வழக்கம்.
குறிப்பாக கும்பக்கரை அருவியில் குளித்து செல்லும் சுற்றுலா பயணிகளுக்கு மேற்கு தொடர்ச்சி மலை பகுதியில் பல்வேறு மூலிகைச் செடிகள் நடுவில் கடந்து வரும் நீரில் குளிப்பதால் பல்வேறு நோய்களில் மீண்டு வர உதவுவதாக கூறுகின்றனர். மேலும், கொடைக்கானல் மலைப்பகுதியில் இருந்து வரக்கூடிய நீரானது கடும் குளிர்ந்த நிலையில் இருப்பதால் சுற்றுலா பயணிகள் கும்பக்கரை அருவியில் குளிப்பதற்கு பெரும்பாலும் ஆர்வம் காட்டி வருகின்றனர். இந்த அருவியில் குளிப்பது உடலுக்கு புத்துணர்ச்சி ஏற்படுவதாகவும் சுற்றுலா பயணிகள் கூறுகின்றனர். அதுமட்டுமல்லாமல் இயற்கை சூழலில் பசுமை நிறைந்த அடர்ந்த வனப் பகுதிகளுக்கு நடுவில் இந்த அருவி அமைந்துள்ளதால் கும்பக்கரை வனப்பகுதியில் விலங்கினங்கள் காட்டுமாடு சிறுத்தை அரிய வகை குரங்கினங்கள், மான், புள்ளி மான், மிளா மான் உள்ளிட்ட அரிய வகை விலங்கினங்களும் உள்ளது.
கும்பக்கரை அருவியின் நீர் பிடிப்பு பகுதிகளான மேற்கு தொடர்ச்சி மலைப்பகுதி மற்றும் வட்டக்கானல், வெள்ளகெவி உள்ளிட்ட பகுதிகளில் அவ்வப்பொழுது பெய்த கோடை மழையால் அருவிக்கு நீர் வரத்து அதிகரித்து ஆர்ப்பரித்து கொட்டி வருகிறது. தற்பொழுது பள்ளிகளுக்கு கோடை விடுமுறை விடப்பட்ட நிலையில் கோடை வெப்பத்தின் தாக்கத்தை தணிக்க தேனி, மதுரை, திண்டுக்கல் உள்ளிட்ட பல்வேறு மாவட்டங்களில் இருந்து வரும் சுற்றுலா பயணிகள் அருவியில் குளித்து வெப்பத்தின் தாக்கத்தை தனித்து மகிழ்ச்சி அடைகின்றனர். கடந்த ஆண்டு ஏப்ரல் மாதத்தில் கும்பக்கரை அருவியில் முற்றிலும் நீர் வற்றி இருந்த நிலையில் இந்த ஆண்டு தொடர்ந்து அவ்வப்பொழுது பெய்து வரும் கோடை மழையால் அறிவிக்கு நீர் வரத்து சீராக உள்ளதால் அதிக அளவில் சுற்றுலா பயணிகள் குவிந்து வருகின்றனர்.
தலைப்பு செய்திகள்
ட்ரெண்டிங் செய்திகள்
