சமஸ்கிருத உறுதிமொழி சர்ச்சை: எந்த அரசியல் அழுத்தமும் இல்லை - மாணவர் சங்கத்தினர் விளக்கம்
எங்களுக்கு இது தொடர்பாக எந்த அரசியல் அழுத்தமும் இல்லை எனவும் மாணவர் சங்கத்தினர் கூறினார்கள்.
சமஸ்கிருதத்தை ஆங்கிலத்தில் எழுதியே வாசித்தோம், சமஸ்கிருதத்தில் படிக்கவில்லை என்றும் சமஸ்கிருதத்தில் உறுதிமொழி ஏற்கவில்லை எனவும் மாணவர் சங்கத்தினர் கூறினர். மதுரை மருத்துவக் கல்லூரியில் முதலாமாண்டு மாணவர்கள் வரவேற்பு நிகழ்ச்சியில் சமஸ்கிருதத்தில் உறுதிமொழி ஏற்றது சர்ச்சையை ஏற்படுத்திய நிலையில் தற்போது விளக்கம் அளிக்கப்பட்டுள்ளது.
சமஸ்கிருத மொழி பெயர்ப்பை மட்டுமே முதலாம் ஆண்டு கல்லூரி மாணவர்கள் எடுத்ததாகவும், நாங்கள் டீன் உள்ளிட்ட யாரிடமும் அந்த சமஸ்கிருத மொழி பெயர்ப்பை காட்டவில்லை என்றும், எங்களுக்கு இது தொடர்பாக எந்த அரசியல் அழுத்தமும் இல்லை எனவும் மாணவர் சங்கத்தினர் கூறினார்கள்.
முன்னதாக, மதுரை மருத்துவக்கல்லூரி விவகாரத்தில் டீனை பொறுப்பாக்கக் கூடாது என்று முன்னாள் மத்திய நிதியமைச்சர் ப.சிதம்பரம் கூறியுள்ளார்.
இதுதொடர்பாக அவர் தனது டுவிட்டர் பக்கத்தில், ‘மதுரை மருத்துவக் கல்லூரியில் முதலாண்டு மாணவர்களுக்கான வரவேற்பு நிகழ்ச்சியில் தவறான உறுதிமொழியை மாணவர் தலைவர் வாசித்து அதை மாணவர்கள் ஏற்ற நிகழ்ச்சி கண்டனத்திற்குரியது, வருத்தம் அளித்தது. டீன் டாக்டர் ரத்தனவேலு அவர்கள் கொரோனா காலத்தில் சிவகங்கை தலைமை மருத்துவ மனையில் மிகச் சிறப்பாகப் பணியாற்றினார் என்பதை நானும் சிவகங்கை மாவட்ட மக்களும் அறிவோம். அவருக்குத் தெரியாமல் இந்தப் பிழை நடந்திருந்தால் அவரைப் பொறுப்பாக்கக் கூடாது. ஒரு நல்ல, மூத்த டாக்டரின் சேவையை மக்கள் இழந்துவிடக்கூடாது என்பதே என் கவலை’ எனப் பதிவிட்டுள்ளார்.
முன்னதாக, மதுரை மருத்துவக் கல்லூரியில் சமஸ்கிருதத்தில் உறுதிமொழி ஏற்ற விவகாரத்தில் கல்லூரி முதல்வர் ரத்தினவேல் காத்திருப்போர் பட்டியலுக்கு மாற்றப்பட்டார்.
மதுரை அரசு மருத்துவக் கல்லூரி முதலாமாண்டு மாணவர்கள் 250 பேரை வரவேற்கும் நிகழ்ச்சி நடைபெற்றது. அதில் ஹிப்போக்ரடிக் உறுதிமொழிக்குப் பதிலாக, மாற்றியமைக்கப்பட்ட 'மகரிஷி சரக் ஷபத்' உறுதிமொழி ஏற்கப்பட்டதால் சர்ச்சை ஏற்பட்டுள்ளது. இதுதொடர்பாக மருத்துவ இயக்குனரகம் விளக்கம் கேட்டு நோட்டீஸ் அனுப்பியது. இந்த விவகாரத்தில் டீன் மீது நடவடிக்கை எடுக்கப்பட்டது. துறை ரீதியான விசாரணை நடத்த மருத்துவக் கல்வி இயக்குநருக்கு அமைச்சர் சுப்பிரமணியன் உத்தரவிட்டார்.
மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்
தலைப்பு செய்திகள்
ட்ரெண்டிங் செய்திகள்
