PM Modi Visit Gujarat: இரண்டு நாள் பயணமாக குஜராத் செல்லும் பிரதமர் மோடி.. பயணத்திட்டம் என்ன?

ரூ. 5,950 கோடி மதிப்பிலான வளர்ச்சித் திட்டங்களை தொடங்கி வைப்பதற்காக பிரதமர் மோடி இரண்டு நாள் பயணமாக குஜராத் செல்கிறார்.

பிரதமர் மோடி

ரூபாய் 5,950 கோடி மதிப்பிலான வளர்ச்சித் திட்டங்களுக்கு பிரதமர் நரேந்திர மோடி அடிக்கல் நாட்டி தொடங்கி வைக்கிறார். இதற்காக இரண்டு நாள் பயணமாக குஜராத்திற்கு இன்று பயணம் மேற்கொள்கிறார்.  இந்த பயணத்தின் போது நர்மதா மாவட்டத்தில் உள்ள ஒற்றுமை சிலையில் சர்தார் வல்லபாய் படேலுக்கு பிரதமர் மரியாதை செலுத்துகிறார். அதே போல் இன்று காலை பனஸ்கந்தா மாவட்டத்தில் உள்ள அம்பாஜி கோயிலில் சாமி தரிசனம் செய்வார் என்று ஆட்சியர் வருண் பனார்வால் தகவல் தெரிவித்துள்ளார்.

5,950 கோடி மதிப்பிலான பல்வேறு திட்டங்களுக்கு இன்று மெஹ்சானா மாவட்டத்தில் உள்ள தபோடா கிராமத்தில் நடைபெறும் பொது விழாவில் பிரதமர் மோடி தொடங்கி வைத்து அடிக்கல் நாட்டுவார் என்று குஜராத் அரசு அறிக்கை வெளியிட்டுள்ளது. மேசானா மற்றும் அகமதாபாத் மாவட்டங்களில் 77 கிமீ நீளமுள்ள மேற்கு சரக்கு வழித்தடப் பிரிவு மற்றும் விராம்காம் முதல் சம்கியாலி வரையிலான 182 கிமீ இரயில் பாதையின் இரட்டைப் பாதைகள் உட்பட இரண்டு ரயில்வே திட்டங்களின் தொடக்கப் பணிகளும் இதில் அடங்கும். மண்டல்-பெச்சராஜி சிறப்பு முதலீட்டு மண்டலத்திற்குள் செயல்படும் நிறுவனங்களுக்கு பயனளிக்கும் குஜராத் ரயில்வே உள்கட்டமைப்பு மேம்பாட்டுக் கழகத்தின் திட்டத்தையும் பிரதமர் தொடங்கி வைக்கிறார்.

அதனை தொடர்ந்து, பிரதமர் மோடி  ஏரிகளை தூர்வாரும் திட்டங்கள் மற்றும் சபர்மதி ஆற்றில் தடுப்பணை கட்டுதல் மற்றும் மகிசாகர் மாவட்டத்தில் உள்ள பனம் நீர்த்தேக்கத்தை அடிப்படையாகக் கொண்ட லிப்ட் பாசனத் திட்டம் தொடர்பான திட்டங்களை அர்ப்பணிக்கிறார்.  மற்ற திட்டங்களில் நான்கு வழிச்சாலை மற்றும் கழிவுநீர் சுத்திகரிப்பு நிலையங்கள் மற்றும் வடிகால் பாதைகள் ஆகியவை அடங்கும்.

நாளை அதாவது அக்டோபர் 31 ஆம் தேதி, சர்தார் வல்லபாய் படேல் சிலைக்கு மரியாதை செலுத்தும் பிரதமர், படேலின் பிறந்தநாளில் ஏற்பாடு செய்யப்பட்டுள்ள நர்மதா மாவட்டத்தில் உள்ள ஏக்தா நகரில் 'தேசிய ஒற்றுமை நாள்' கொண்டாட்டத்தில் பங்கேற்கிறார்.  ஆரம்ப் 5.0 திட்டத்தில், 98வது பொது அறக்கட்டளை பயிற்சி அதிகாரிகளிடம் பிரதமர் உரையாற்றுவார்.  அதிகாரபூர்வ வெளியீட்டின்படி, ஆரம்ப் திட்டத்தின் 5வது பதிப்பு ’சக்தியைப் பயன்படுத்துதல்' (harnessing the power of disruption) என்ற கருப்பொருளை மையமாக வைத்து நடத்தப்படுகிறது.

மேலும், ஏக்தா நகரில் உள்ள வளர்ச்சித் திட்டங்கள் மற்றும் சுற்றுலாத் தலங்களையும் பிரதமர் மோடி திறந்து வைக்கிறார். இதில் 30 இ-பேருந்துகள், பொது பைக்-பகிர்வு திட்டம், குஜராத் கேஸ் லிமிடெட் மூலம் நகர எரிவாயு விநியோகம், ஏக்தா நகருக்கு வரும் சுற்றுலா பயணிகளுக்கு போக்குவரத்தை சீரமைக்க கோல்ஃப் வண்டிகள் வழங்குதல் ஆகியவை அடங்கும். 

 ஏக்தா நகருக்கு வரும் சுற்றுலா பயணிகளுக்கு சேவை செய்யும் பார்வையாளர் மையத்தையும் மோடி திறந்து வைக்கிறார்.  இந்த மையம் கடைகள், உணவு விடுதிகள், உணவகங்கள் மேலும் பல்வேறு ஓய்வு மற்றும் பொழுதுபோக்கு வசதிகளை உள்ளடக்கியதாக இருக்கும், இது சுற்றுலாப் பயணிகளுக்கு அத்தியாவசிய வசதிகளை உறுதி செய்யும் என தெரிவிக்கப்பட்டுள்ளது. ஏக்தா நகரில், நர்மதா ஆற்றின் இடது கரையில், 'கமலம்' என்று அழைக்கப்படும் டிராகன் பழங்களுக்கான  'கமலம் பூங்கா'வையும் அவர் திறந்து வைக்கிறார்.