மூலப்பொருட்கள் விலை உயர்வை கண்டித்து கழிவுபஞ்சு நூற்பாலைகள் உற்பத்தி நிறுத்த போராட்டம்

மூலப்பொருட்கள் விலை உயர்வை குறைக்க கோரியும், மின் கட்டண உயர்வை திரும்ப பெறக்கோரியும் கழிவுபஞ்சு நூற்பாலைகள் இன்று முதல் காலவரையற்ற உற்பத்தி நிறுத்தப் போராட்டத்தில் ஈடுபட்டுள்ளனர்.

கழிவுபஞ்சு நூற்பாலை

தமிழ்நாடு முழுவதும் 600 க்கும் மேற்பட்ட கழிவுப் பஞ்சிலிருந்து நூல் உற்பத்தி செய்யும் ஓபன் எண்ட் ஸ்பின்னிங் மில்கள் எனப்படும் கழிவுபஞ்சு நூற்பாலைகள் இயங்கி வருகின்றன. இந்த ஓ.இ.மில்கள் பருத்தி கழிவிலிருந்து நாள் ஒன்றுக்கு 25 லட்சம் கிலோ நூல்களும்,  பிளாஸ்டிக் பாட்டில் பைபர், ஆயுத்த ஆடை நிறுவன பனியன் கட்டிங் கழிவிலிருந்து 15 லட்சம் கலர் நூல் உற்பத்தியும் செய்யப்படுகிறது. இதனிடையே மூலப்பொருட்கள் விலை உயர்வால் நெருக்கடிக்கு உள்ளான இந்த தொழில், மின் கட்டணம் உயர்வால் முடக்கியுள்ளது. 117 ரூபாய்க்கு கழிவுப்பஞ்சு விற்கப்படும் நிலையில், இந்த நூற்பாலையில் உற்பத்தி செய்யப்படும் நூல்கள் 180 ரூபாய்க்கு விற்று வந்த நூல்கள் தற்போது 140 ரூபாய்க்கு கூட யாரும் வாங்குவதில்லை என கழிவுபஞ்சு நூற்பாலை உற்பத்தியாளர்கள் தெரிவித்துள்ளனர். இந்நிலையில் மூலப்பொருட்கள் விலை உயர்வை குறைக்க கோரியும், மின் கட்டண உயர்வை திரும்ப பெறக்கோரியும் கழிவுபஞ்சு நூற்பாலைகள் இன்று முதல் காலவரையற்ற உற்பத்தி நிறுத்தப் போராட்டத்தில் ஈடுபட்டுள்ளனர்.

இதுகுறித்து நூற்பாலை உரிமையாளர்கள் கூறுகையில், “ஓ.இ. மில்களுக்கான மூலப்பொருளான கழிவுப் பஞ்சு கடந்த ஒரு வருடமாக வரலாறு காணாத வகையில் விலை உயர்ந்து வருகிறது. கடந்த 20 வருட காலமாக பருத்தி விலையில் இருந்து 60 % விலையில்  விற்கப்பட்டு வந்த கழிவுப்பஞ்சு, தற்போது 80% வரை உயர்ந்துள்ளது. இதனால் நூற்பாலைகள் நூலை உற்பத்தி செய்து உரிய விலைக்கு விற்க முடியவில்லை. இதனால் நூற்பாலை உரிமையாளர்கள் பெரும் நஷ்டம் ஏற்படுகிறது. இதற்கிடையில் கூடுதலாக மாநில அரசின் மின் கட்டண உயர்வு தொழிலை நடத்த முடியாத நிலைக்கு தள்ளப்பட்டு உள்ளதால், ஓ.இ. மில்கள் இன்று முதல் உற்பத்தி நிறுத்தத்தில் ஈடுபடுகின்றனர்.

மூலப்பொருட்கள், மின் கட்டண உள்ளிட்ட விலை உயர்வால் ரூ.10 முதல் 15  கிலோவுக்கு நஷ்டம் ஏற்படுகிறது. இந்த நிலை மாறினால் மட்டுமே ஓ.இ. மில்களை நடத்த முடியும். ஓ.இ.மில் நூல்கள் இன்றளவும் 4 ஆண்டுகளுக்கு முன் இருந்த விலையிலேயே விற்பனையாகி வரும் நிலையில், கிலோவிற்கு 97 ரூபாயாக இருக்க வேண்டிய நிலையில் கழிவு பஞ்சு விலை, 117 ரூபாய்க்கு விற்கப்படுகிறது. இதனுடன் மின் கட்டணம் உயர்வு என்பது பல மடங்குகள் அதிகரித்திருப்பதும் செலவீனங்களை சமாளிக்க முடியாமல் திணற வேண்டியுள்ளது. ஓ.இ.மில்கள் உற்பத்தி நிறுத்தம் காரணமாக  நாள் ஒன்றுக்கு 40 லட்சம் கிலோ நூல்கள் உற்பத்தி பாதிப்பும், நாள் ஒன்றுக்கு ரூபாய் 10 கோடி வருவாய் இழப்பும் ஏற்படும். 2 லட்சத்திற்கும் மேற்பட்ட தொழிலாளர்கள் நேரடியாகவும், மறைமுகமாகவும் இந்த உற்பத்தி நிறுத்தத்தால் பாதிக்கப்படுவார்கள். அதுமட்டுமின்றி  ஓ.இ. மில்களிடமிருந்து நூல் வாங்கும் விசைத்தறியாளர்களும் உற்பத்தி நிறுத்தத்தில் ஈடுபட்டு வருகின்றனர். ஏற்கனவே கடந்த ஓராண்டாக 50% மட்டுமே ஓ.இ. மில்கள் உற்பத்தி நடந்து வரும் நிலையில், கடந்த 5 மாதங்களில் இரண்டாவது முறையாக உற்பத்தி நிறுத்தப் போராட்டத்தில் ஈடுபட்டு வருகிறோம்” எனத் தெரிவித்தார்.