கோடநாடு எஸ்டேட்டில் சிபிசிஐடி போலீசார் ஆய்வு ; தீவிரமடையும் கோடநாடு வழக்கு

கோடநாடு எஸ்டேட்டில் மீண்டும் ஆய்வு மேற்கொள்ள அனுமதிக்க வேண்டும் என சிபிசிஐடி சார்பில் மனு அளிக்கப்பட்டது. அதற்கு நீதிமன்றம் அனுமதி வழங்கியிருந்தது.

கோடநாடு எஸ்டேட்

கோடநாடு கொலை, கொள்ளை வழக்கு தொடர்பாக 15 பேர் கொண்ட சிபிசிஐடி போலீசார் குழுவினர் கோடநாடு எஸ்டேட்டில் ஆய்வு மேற்கொண்டு வருகின்றனர்.

முன்னாள் முதலமைச்சர் ஜெயலலிதாவிற்கு சொந்தமான நீலகிரியில் உள்ள கோடநாடு எஸ்டேட்டில் கடந்த 2017ஆம் ஆண்டு ஏப்ரல் 23 ஆம் தேதி கொள்ளை சம்பவம் நடைபெற்றது. பாதுகாவலராக இருந்த ஓம்பகதூர் என்பவரை கொலை செய்து விட்டு, சில மதிப்புமிக்க பொருட்கள் திருடப்பட்டது. இது தொடர்பாக சயான், சதீசன், உதயகுமார், ஜம்சிர் அலி, தீபு, சந்தோஷ், திலிப் ஜாய், வாளையார் மனோஜ், மனோஜ்  உள்ளிட்ட 10 பேர் மீது கைது செய்யப்பட்டனர். இவ்வழக்கில் முக்கிய குற்றவாளியாக கருதப்படும் முன்னாள் முதலமைச்சர் ஜெயலலிதாவின் ஓட்டுநர் கனகராஜ், சேலம் மாவட்டத்தில் நடந்த கார் விபத்தில் உயிரிழந்தார். இது தொடர்பான வழக்கு நீலகிரி மாவட்ட நீதிமன்றத்தில் நடந்து வருகிறது.

இதனிடையே கோடநாடு வழக்கில் கூடுதல் விசாரணையை துவக்கிய நீலகிரி காவல் துறையினர், 5 தனிப் படைகள் அமைத்து கூடுதல் விசாரணை தீவிரப்படுத்தினர். சாட்சிகள், குற்றம் சாட்டப்பட்டவர்கள், அவர்களின் உறவினர்கள் மற்றும் நண்பர்கள் என கூடுதல் விசாரணை நடத்தப்பட்டது. இவ்வழக்கில் குற்றவாளியாக சேர்க்கப்பட்ட சயன், ஜம்சிர் அலி, சந்தோஷ் சாமி, மனோஜ் சாமி, சதீசன், பிஜின் குட்டி, தீபு உள்ளிட்டோரிடம் காவல் துறையினர் விசாரணை நடத்தி ரகசிய வாக்குமூலம் பெற்றனர். இதனிடையே கோடநாடு கம்யூட்டர் ஆப்ரேட்டர் தினேஷ்குமார் தற்கொலை வழக்கு மற்றும் கனகராஜ் விபத்து வழக்குகளை காவல் துறையினர் மறு விசாரணை நடத்தினர். இதனிடையே கோடநாடு கொலை கொள்ளை வழக்கு சிபிசிஐடி விசாரணை மாற்றப்பட்டது. இதையடுத்து ஏ.டி.எஸ்.பி முருகவேல் தலைமையில் மூன்று தனிப்படை அமைக்கப்பட்டு விசாரணை நடத்தப்பட்டு வருகிறது. பல்வேறு நபர்களிடம் விசாரணை நடத்தி சிபிசிஐடி அதிகாரிகள், செல்போன் தரவுகளை ஆராய்ந்து வருகின்றனர்.

கோடநாடு கொலை, கொள்ளை வழக்கு விசாரணை தற்போது தீவிரமடைந்துள்ள நிலையில், கடந்த பிப்ரவரி மாதம் 23 ம் தேதி இவ்வழக்கு விசாரணைக்கு வந்தது. அப்போது சம்பவம் நடைபெற்ற இடத்தினை மீண்டும் ஆய்வு மேற்கொள்ள அனுமதிக்க வேண்டும் என சிபிசிஐடி சார்பில் மனு அளிக்கப்பட்டது. அதற்கு நீதிமன்றம் அனுமதி வழங்கியிருந்த நிலையில், இன்று சிபிசிஐடி எஸ்.பி தலைமையில் 15க்கும் மேற்பட்ட சிபிசிஐடி போலீசார் கோடநாடு எஸ்டேட்டில் கொலை, கொள்ளை சம்பங்கள் நடந்த இடங்களில் ஆய்வு மேற்கொண்டு வருகின்றனர். இந்த ஆய்வில் கிடைத்த தகவல்களை அடுத்து நடைபெறும் விசாரணையில் சிபிசிஐடி போலீசார் தெரிவிக்க இருக்கின்றனர். 2017ம் ஆண்டு கொலை, கொள்ளை சம்பவம் நடைபெற்ற பின்னர் ஆறு ஆண்டுகள் கழித்து, மீண்டும் கோடநாடு பங்களாவில் அதே இடத்தில் சிபிசிஐடி போலீசார் ஆய்வு மேற்கொள்வது முக்கியத்துவம் வாய்ந்ததாக கருதப்படுகிறது