Ponniyin Selvan 2: 10ஆம் நூற்றாண்டுக்கு இசைப்புயலுடன் செல்லத் தயாராகுங்க... பொன்னியின் செல்வன் 2 இசை வெளியீட்டு விழா தேதி அறிவிப்பு!

மொசார்ட் ஆஃப் மெட்ராஸ் ஏ.ஆர்.ரஹ்மான் நம்மை 10ஆம் நூற்றாண்டுக்கு முன்னோக்கி கூட்டிச் செல்ல வருகிறார் என லைகா நிறுவனம் ட்வீட் செய்துள்ளது.

பொன்னியின் செல்வன் 2 போஸ்டர், ஏ ஆர் ரஹ்மான்

பொன்னியின் செல்வன் 2 படத்தின் இசை வெளியீட்டு விழா தேதியை படக்குழு அறிவித்துள்ளது.

அடுத்த மாதம் ரிலீஸ்

பெரும் எதிர்பார்ப்புகளுக்கு இடையே பொன்னியின் செல்வன் இரண்டாம் பாகம் வரும் ஏப்ரல் 28ஆம் தேதி வெளியாகிறது.

பட வெளியீட்டுக்கு ஒரு மாத காலத்துக்கும் மேல் உள்ள நிலையில், சென்ற ஆண்டு பொன்னியின் செல்வன் முதல் பாகத்துக்காக மெனக்கெட்டது போலவே படக்குழுவினர் இந்த பாகத்துக்கும் அப்டேட்களை வாரி வழங்கத் தொடங்கியுள்ளனர்.

இசை வெளியீட்டு விழா

அந்த வகையில் தற்போது பொன்னியின் செல்வன் படத்தின் இசை வெளியீட்டு விழா தேதி அறிவிக்கப்பட்டுள்ளது. அதன்படி வரும் மார்ச் 29ஆம் தேதி படத்தின் இசை வெளியீட்டு விழா நடைபெறும் என அறிவிக்கப்பட்டுள்ளது.

இது குறித்து லைகா ப்ரொடக்‌ஷன் வெளியிட்டுள்ள பதிவில், "மொசார்ட் ஆஃப் மெட்ராஸ் ஏ.ஆர்.ரஹ்மான் நம்மை 10ஆம் நூற்றாண்டுக்கு முன்னோக்கி கூட்டிச் செல்ல வருகிறார்.  ஆளை மயக்கும் இசைப்புயல் வந்து கொண்டிருக்கிறது. மார்ச் 29ஆம் தேதியை காலெண்டரில் குறித்து வைத்துக் கொள்ளுங்கள்” எனப் பதிவிட்டுள்ளது.

முதல் பாகம்

சென்ற ஆண்டு பொன்னியின் செல்வன் முதல் பாகம் செப்டெம்பர் மாதம் 30ஆம் தேதி வெளியான நிலையில், முதல் பாகத்தில் இசை வெளியீட்டு விழா செப்டெம்பர் 6ஆம் தேதி பிரம்மாண்டமான முறையில் நடைபெற்றது.

ஒட்டுமொத்த படக்குழுவினரும் கலந்துகொண்டு சிறப்பித்த இந்த விழா, பட வெளியீட்டுக்கு இணையாக திரைத்துறையில் மாபெரும் எதிர்ப்பார்ப்புகளை ஏற்படுத்தி அதனைப் பூர்த்தியும் செய்தது.

இந்நிலையில், தற்போது பொன்னியின் செல்வன் இரண்டாம் பாகத்தில் இசை வெளியீட்டு விழாவும் பிரம்மாண்டமான முறையில் நடைபெறுமா அல்லது எளிமையான முறையில் நடைபெறுமா என்பது கேள்விக்குறியாக உள்ளது.

முந்தைய அப்டேட்கள்

நேற்று பொன்னியின் செல்வன் படத்தின் ட்ரெய்லர் வரும் மார்ச் 29ஆம் தேதி வெளியாகும் என அறிவிக்கப்பட்டது. இந்நிலையில் சென்ற பாகத்தைப் போலவே ட்ரெய்லர் மற்றும் இசை வெளியீட்டு விழா ஒன்றாக நடைபெறுமா என்ற கேள்வி எழுந்த நிலையில், தற்போது இந்த அறிவிப்பு வெளியாகியுள்ளது.

முன்னதாக பொன்னியின் செல்வன் படத்தின் அகநக முழு நீளப் பாடல், விக்ரமின் ஆதித்த கரிகாலன், த்ரிஷாவின் குந்தவை ட்ரான்ஸ்ஃபர்மேஷன் வீடியோக்கள் வெளியாகி இணையத்தில் லைக்ஸ் அள்ளின.

இந்நிலையில், பொன்னியின் செல்வன் இரண்டாம் பாகத்தின் அடுத்தடுத்த பாடல்கள் குறித்த எதிர்பார்ப்பு பன்மடங்கு அதிகரித்துள்ளது. 

கல்கி எழுதிய ‘பொன்னியின் செல்வன்’ நாவலை அடிப்படையாகக் கொண்டு கடந்த ஆண்டு வெளியாகி மாபெரும் வெற்றிப் படமாக அமைந்த படம் ‘பொன்னியின் செல்வன்’.

ஐஸ்வர்யா ராய்,விக்ரம், கார்த்தி,  த்ரிஷா, ஜெயம் ரவி, ஐஸ்வர்யா லெஷ்மி, ஷோபிதா, சரத்குமார், பார்த்திபன், பிரபு என மிகப்பெரும் நட்சத்திரப் பட்டாளமே  இந்தப் படத்தில் நடித்திருந்தது குறிப்பிடத்தக்கது.