வைரமுத்து
தமிழ் திரையுலகில் முன்னணி பாடலாசிரியர்களில் ஒருவர் வைரமுத்து. 7 ஆயிரத்து 500க்கும் மேற்பட்ட பாடல்கள் மற்றும் கவிதைகளை எழுதியுள்ளார். மீடூ விவகாரத்தில் வைரமுத்து மீது பாடகி சின்மயி பாலியல் குற்றச்சாட்டை முன்வைத்தார். சின்மயி தவிர பல பெண்கள் வைரமுத்து தங்களிடம் தகாத முறையில் நடந்துகொண்டதாகவும் குற்றம் சாட்டினர். இந்த பிரச்சனையைத் தொடர்ந்து வைரமுத்து மீது பல்வேறு விமர்சனங்கள் தொடர்ந்து வருகின்றன.
இளையராஜாவுடன் மோதல்
சமீபத்தில் இசையமைப்பாளர் இளையராஜா தான் இசையமைத்தப் பாடல்களுக்கான முழு உரிமையும் தனக்கே சொந்தமானவை என்று நீதிமன்றத்தில் வழக்குத் தொடர்ந்திருந்தார். இதற்கு வைரமுத்து தன் சார்பில் சில பாடல்களில் இசை பெரிது சில பாடல்களில் இசையைக் காட்டிலும் மொழி சிறந்ததாக இருக்கும் . இதை புரிந்துகொண்டவன் ஞானி புரிந்துகொள்ளாதவன் அஞ்ஞானி என்று மறைமுகமாக தெரிவித்திருந்தார். இதனைத் தொடர்ந்து இந்த விவகாரத்தில் இசையமைப்பாளர் கங்கை அமரன் வைரமுத்துவை கடுமையாக சாடியிருந்தார்.
கலைஞரிடம் வைரமுத்து பற்றி அவதூறு
இன்று தனது எக்ஸ் பக்கத்தில் வைரமுத்து தனக்கும் மறைந்த முன்னாள் முதலமைச்சர் கருணாநிதி அவர்களுக்கும் இடையில் நிகழ்ந்த சம்பவம் ஒன்றை பகிர்ந்துள்ளார். இதில் அவர்
'கலைஞருக்கும், அ.இ.அ.தி.முக/விலிருந்து தி.மு.கவில் வந்துசேர்ந்த ஒரு முக்கியப் புள்ளிக்கும் நடந்த உரையாடல் எனக்கு வாய்மொழியாக வந்தது; தயக்கத்தோடு கலைஞரையே கேட்டு உறுதி செய்தது. சொற்கள் மாறியிருக்கலாம்; சொன்னபொருள் இதுதான் ‘வைரமுத்த ரொம்ப நம்பாதீங்க தலைவரே!’ ‘ஏன்? எதனால?’ ‘அவரு உங்களப் புகழ்ந்து பேசுறாரே தவிர ஜெயலலிதாவ எப்பவும் திட்ட மாட்டேங்குறாரு’ (கலைஞர் சிறு சிந்தனைக்குப் பிறகு) ‘நீ அங்க இருந்து இங்க வந்திருக்க அங்க இருந்தபோது என்னத் திட்டுன; இங்க இருந்து அந்த அம்மாவத் திட்டுற வைரமுத்து எப்பவும் இடம் மாறல ஜெயலலிதா வைரமுத்துக்கு எதிரியும் இல்ல அவரு தமிழுக்காக நம்மகூட நிக்கிறாரு இன்னொண்ணு அவரு யாரையும் திட்டமாட்டாரு; அது அவரு இயல்பு’ கோள் சொன்னவர் குறுகிப்போனார் இப்படித்தான் கேடுகள் ஈட்டி எறியும்போதெல்லாம் கேடயமாவது சத்தியம்." என்று கூறியுள்ளார்.
இந்த பதிவு தற்போது சமூக வலைதளத்தில் வைரலாகி வருகிறது. இந்த பதிவை தற்போது நடந்து வரும் இளையராஜாவுடனான சர்ச்சையை தொடர்புபடுத்தி பதிவிட்டிருக்கலாம் என்று நெட்டிசன்கள் கூறுகிறார்கள்.
