Vijay Devarakonda: அருவி பட இயக்குநரை தெரியுமா: சீண்டிய கேள்விகளுக்கு பதிலடி கொடுத்த விஜய் தேவரகொண்டா!

தமிழ் சினிமாவில் வெற்றிமாறன் , நெல்சன் இவர்களைத் தவிர்த்து வேறு இயக்குநர்கள் தெரியாதா என்று கேட்ட பத்திரிக்கையாளரை வாயடைக்க வைக்கும் பதிலைக் கொடுத்துள்ளார் விஜய் தேவரகொண்டா

விஜய் தேவரகொண்டா. image source : twitter

மேடைகளில் தனது பரபரப்பான பேச்சிற்காக புகழ்பெற்றவர் நடிகர் விஜய் தேவரகொண்டா. சமீபத்தில் ரஜினியைப் பற்றி அவர் பேசியது சர்ச்சையை ஏற்படுத்தியிருந்தது. தற்போது பத்திரிகையாளர் ஒருவர் கேட்ட கேள்வியால் சீண்டப்பட்ட விஜய் தேவரகொண்டா அவருக்கு பதிலடி கொடுத்த வீடியோ ஒன்று இணையதளத்தில் வைரலாகி வருகிறது.

எனக்கு எல்லாம் தெரியும்

இயக்குனர் சிவா நிர்வானா இயக்கத்தில் நடிகர் விஜய் தேவரகொண்டா, நடிகை சமந்தா நடித்துள்ள படம் குஷி. செப்டம்பர் 1-ஆம் தேதி வெளியாக உள்ள இந்தப் படத்தின் பிரமோஷன் பணிகள் மிகத் தீவிரமாக நடைபெற்று வருகிறது. குஷி படத்தின் பிரமோஷன் நிகழ்ச்சிகளில் பத்திரிகையாளர்களின் கேள்விகளுக்கு பதில் அளித்துவருகிறார்.

சமீபத்தில் நிகழ்வு ஒன்றில் பத்திரிகையாளர் ஒருவர் விஜய் தேவரகொண்டாவிடம், ”வெற்றிமாறன், நெல்சன் போன்ற இயக்குநர்களை பற்றி மட்டுமே பேசி வருகிறீர்கள். தமிழ் சினிமாவில் மற்ற இயக்குநர்களை நீங்கள் கவனிப்பதில்லையா?” என்று கேள்வி எழுப்பினார். இதற்கு பதிலளித்த விஜய் “தமிழ் சினிமாவில் பிற இயக்குநர்களை எனக்கு தெரியுமா? என்றுதானே கேட்கிறீர்கள்? எனக்கு அருண் பிரபு புருஷோத்தமனின் படங்கள் ரொம்ப பிடிக்கும்.

உங்களுக்கு அவர் என்ன படம் எடுத்திருக்கிறார் என்று தெரியுமா?“ என்று கேட்க அதற்கு பத்திரிக்கையாளர் மெளனமாக இருக்கவே தனது பேச்சைத் தொடர்கிறார் விஜய் “அருவி மற்றும் வாழ் என்கிற படங்களை இயக்கியிருக்கிறார். மேலும் எனக்கு கேப்டன் மில்லர் படத்தை இயக்கிய அருண் மாதேஸ்வரனின் படங்களும் பிடிக்கும் “ என்று அந்த பத்திரிகையாளரின் வாயடைக்கச் செய்து ரசிகர்களின் கைத்தட்டல்களைப் பெற்றுள்ளார்.

ரஜினியைப் பற்றி சர்ச்சை

சினிமாவில் வெற்றி தோல்விகளைப் பற்றி கேட்டபோது, ”அதற்கு இங்கே உள்ள சூப்பர் ஸ்டார் உட்பட அனைவருக்கும் வெற்றி தோல்வி என்பது உள்ளது. இவ்வளவு ஏன் தமிழ் சூப்பர் ஸ்டாரான ரஜினிகாந்துக்கு கடைசியாக நடித்த ஆறு படங்களும் தோல்வி அடைந்தன. ஆனால் ஜெயிலர் படம் மூலம் அவர் கம்பேக் கொடுத்தார். அப்படம் ரூ.500 கோடி வசூல் செய்துள்ளது. இப்போது யாரும் எதுவும் பேசாமல் படம் மட்டுமே பார்ப்பார்கள்” என தெரிவித்திருந்தார். இதனைக் கேட்டு ரஜினி ரசிகர்கள் கொந்தளித்துள்ளனர்.