Dhruva Natchathiram: ‘இந்த தடவை ஸ்கெட்ச் மிஸ் ஆகாது’ - துருவ நட்சத்திரம் படத்தின் ரிலீஸ் தேதி இதுவா?

கெளதம் மேனன் இயக்கியிருக்கும் துருவ நட்சத்திரம் படத்தின் புதிய ரிலீஸ் தேதி குறித்த தகவல் வெளியாகி உள்ளது

துருவ நட்சத்திரம், விக்ரம், கவுதம் மேனன், கௌதம் வாசுதேவ் மேனன்,. (Image source: Twitter)

துருவ நட்சத்திரம்

இயக்குநர் கெளதம் மேனன் இயக்கி விக்ரம் நடித்துள்ள திரைப்படம் துருவ  நட்சத்திரம் . விக்ரம், ரிது வர்மா, ராதிகா சரத்குமார், விநாயகன், ஆர்.பார்த்திபன் உள்ளிட்டவர்கள் நடித்து  ஹாரிஸ் ஜெயராஜ் இசையமைத்துள்ள இப்படம் கடந்த நவம்பர் 24 ஆம் தேதி  திரையரங்குகளில் வெளியாக இருந்த நிலையில் நிதிப் பிரச்சனைகளால் தடைபட்டது. கடந்த ஏழு ஆண்டுகளாக நிலுவையில் இருந்து வந்த இப்படத்தை பல்வேறு முயற்சிகளுக்குப் பின் இயக்குநர் கெளதம் மேனன் வெளியிட முயற்சி செய்து வருகிறார். 

சந்தித்த சவால்கள்

துருவ நட்சத்திரம் படத்தை வெளியிட தான் எதிர்கொண்ட சவால்களை சமீபத்தில் நேர்காணல் ஒன்றில் பகிர்ந்துகொண்டார் கெளதம் மேனன்.   “ஏற்கனவே பல வருடங்கள் கிடப்பில் இருந்ததால் இந்தப் படத்தை வாங்கி வெளியிடுவதற்கு விநியோகஸ்தர்கள் தயக்கம் காட்டுகிறார்கள். கூடுதலாக படத்தின் மீது கோர்ட்டில் வழக்கு இருக்கிறதோ என்கிற சந்தேகம் அவர்களுக்கு இருக்கிறது.’

இதன் காரணத்தினால் நான் தனிப்பட்ட முறையில் தெலுங்கு மற்றும் கன்னட வெளியீட்டிற்காக பல தரப்பு விநியோகஸ்தர்களிடம் பேசி படத்தின் மீது இருந்த வழக்குகள் திரும்பப் பெறப்பட்டு விட்டன என்பதை உறுதிப்படுத்தி வருகிறேன்.  நீங்கள் நம்பாமல் கூட போகலாம், ஆனால் என்னுடைய படம் பல வருடங்களுக்கு முன் தொடங்கப்பட்டாலும் ஏதோ போன வாரம் படப்பிடிப்பு முடிந்தது போல் பார்க்க புதிதாக இருக்கிறது. அதனுடைய கதை எந்த வகையிலும் பழசாகிவிடவில்லை. இந்தப் படத்தை தனிப்பட்ட முறையில் ஒவ்வொருவருக்காக திரையிட்டு படத்தை ரிலீஸ் செய்வதற்கான வேலைகளில் ஈடுபட்டு வருகிறேன்” என்று அவர் கூறியிருந்தார்

2.40 கோடி கொடுத்தால் மட்டுமே படம் ரிலீஸ்

ஆல் இன் பிக்சர்ஸ்  நிறுவனத்தின் தயாரிப்பில் கெளதம் மேனன் சிம்புவை வைத்து சூப்பர்ஸ்டார் என்கிற படத்தை எடுக்க இருந்தார். இந்தப் படத்திற்காக அட்வான்ஸ் தொகையாக 2.40 கோடி பெற்றுள்ளார். இந்தப் படம் முடிவடையாத நிலையில் இந்தப் பணத்தையும் அவர் திருப்பி தராததாக கூறப்படுகிறது. இதனால் இந்தப் பணத்தை திருப்பி அளித்தால் மட்டுமே துருவ நட்சத்திரம் படத்தை வெளியிட முடியும் என்று நீதிமன்றம் உத்தரவிட்டது. கடைசி நேரத்தில் இந்த தொகையை திருப்பிக் கொடுக்க முடியாததால் துருவ நட்சத்திரம் படத்தின் ரிலீஸ் தள்ளிப்போனது. இந்தத் தகவலை தனது ட்விட்டர் பக்கத்தில் தெரிவித்த கெளதம் மேனன் ரசிகர்களிடம் மன்னிப்புக் கேட்டார்.

புதிய ரிலீஸ் தேதி

தற்போது ஆல் இன் பிக்ச்சர்ஸுக்கு தான் தரவேண்டிய தொகையை அடுத்த வாரத்திற்குள்ளாக கெளதம் மேனன் செலுத்திவிடுவதாக தெரிவித்துள்ளதாகவும் வரும் நவம்பர் 30 ஆம் தேதி துருவ நட்சத்திரம் படத்தை ரிலீஸ் செய்ய இருப்பதாக தகவல்கள் வெளியாகி இருக்கிறது. இந்தத் தகவல் ரசிகர்களுக்கு மகிழ்ச்சி அளித்துள்ளது.