ப்ரோமோ சூப்பர்! நல்லகண்ணு இறுதி மரியாதை செலுத்த வந்த ரஜினியிடம் சினிமா கதை பேசிய பிரேமலதா... நெட்டிசன்கள் கடும் விமர்சனம்

இந்திய கம்யூனிஸ்ட் கட்சியின் மூத்த தலைவர் நல்லகண்ணு மறைவுக்கு அஞ்சலி செலுத்த வந்த ரஜினியிடம் தேமுதிக பொதுச்செயலாளர் பிரேமலதா சினிமா பற்றி பேசியுள்ளது சர்ச்சையை ஏற்படுத்தியுள்ளது

நல்லகண்ணு , பிரேமலதா , பிரேமலதா விஜயகாந்த்

Source : X

நலலகண்ணுவின் இறுதி அஞ்சலிக்கு வந்த ரஜினியிடன் அண்மையில் கமல் ரஜினி நடித்து வெளியான ப்ரோமோ குறித்து பிரேமலதாவும் அவரது சகோதரர் எல்.கே சுதீஷூம் பேசினர். இந்த வீடியோவை சமூக வலைதளத்தில் பகிர்ந்து வரும் நெட்டிசன்கள் ஒரு அரசியல் தலைவரின் இறப்பின்போது கூட சினிமாவைப் பற்றி பேச வேண்டுமா என விமர்சனம் தெரிவித்து வருகிறார்கள்.

நல்லகண்ணு இறுதி ஊர்வலம் 

இந்திய கம்யூனிஸ்ட் கட்சியின் மூத்த தலைவர் மற்றும் சுதந்திர போராட்ட வீரருமான தோழர் நல்லகண்ணு நேற்று வயது மூப்பின் காரணமாக உயிர் துறந்தார். அவருக்கு வயது 101 . சென்னை தியாகராய நகரில் உள்ள இந்திய கம்யூனிஸ்ட் கட்சியின் அலுவலகத்தில் அவரது உடல் பொதுமக்கள் அஞ்சலிக்காக வைக்கப்பட்டுள்ளது. தொடர்ச்சியாக அரசியல், திரையுலகினர் உள்ளிட்ட பல்துறை சார்ந்த பிரபலங்கள் நேரில் வந்து அஞ்சலி செலுத்தி செல்கின்றனர். 

தமிழ் திரையுலகம் சார்பாக விஜய் சேதுபதி, சிவகார்த்திகேயன், நாசர், எம்.எஸ்.பாஸ்கர், தீனா, இயக்குநர் பா.ரஞ்சித் , சிவகுமார், சூர்யா ஆகியோர் நல்லகண்ணு உடலுக்கு அஞ்சலி செலுத்தினர். தொடர்ந்து தேமுதிக பொதுச்செயலாளர் பிரேமலதா விஜயகாந்த், மதிமுக பொதுச்செயலாளர் வைகோ ஆகியோர் அஞ்சலி செலுத்தி அவரின் குடும்பத்தினருக்கு ஆறுதல் தெரிவித்தனர். இப்படியான நிலையில் நடிகர் ரஜினிகாந்த் நல்லகண்ணு உடலுக்கு அஞ்சலி செலுத்தினார்.

செய்தியாளர்களை சந்தித்த ரஜினிகாந்த், “ஓமந்தூரார், அறிஞர் அண்ணா, காமராஜர், கக்கன் அவர்களைப் பார்க்கவில்லை. அவர்களை எல்லாரையும் சேர்த்து நல்லகண்ணு அவர்களிடம் பார்த்தேன். ஒரு நல்லவராக நேர்மையானவராக எளிமையாக இருந்தால் மதிப்பும் மரியாதையும் தானாக வரும் என்பதற்கு நல்லகண்ணு ஒரு எடுத்துக்காட்டு. பெரிய ஆத்மா அவர். தோழர் நல்லகண்ணு அவர்களுக்கு என்னுடைய வீரவணக்கம் என தெரிவித்துள்ளார். நல்லகண்ணுவின் குடுமத்தினருக்கு ஆறுதல் கூறியபோது ரஜினி கண் கலங்கினார். 

சினிமாவைப் பற்றி பேசியதால் சர்ச்சை

இறுதி மரியாதை செலுத்த வந்த ரஜினி அருகில் தேமுதிக பொதுச் செயலாளர் பிரேமலதா மற்றும் அவரது சகோதரர் எல்.கே சுதீஷ் அமர்ந்திருந்தனர். அப்போது அண்மையில் வெளியான ரஜினி கமல் படத்தின் ப்ரோமோ குறித்து சுதீஷ் ரஜினியிடம் பேசினார். ப்ரோமோ சூப்பரா இருந்தது என்று சுதீஷ் சொல்ல பிரேமலாவும் நல்லா இருந்தது என்று கூறினார். 'நல்ல இயக்குநர்' என்று ரஜினி  நெல்சனை குறிப்பிட்டார். இந்த வீடியோ தற்போது சமூக வலைதளத்தில் வைரலாகி வருகிறது. மூத்த அரசியல் தலைவருக்கு இறுதி அஞ்சலி செலுத்த வந்த இடத்தில் சினிமாவைப் பற்றி பேச வேண்டுமா என நெட்டிசன்கள் பலர் விமர்சனம் தெரிவித்துள்ளார்கள்.

நல்லக்கண்ணு அய்யாவுக்கு இறுதி மரியாதை செய்ய வந்த இடத்தில்.

ரஜினி படத்தை பற்றி பேசும் தேமுதிக
பொதுச்செயலாளர் பிரமலதா மற்றும் அவரது சகோதரர்.

நல்ல கொள்கை கூட்டணி டா @arivalayam 😭😭🤣 pic.twitter.com/F3xFqgIEt5

— Prasanna OG (@OGprasanna) February 26, 2026