Kamal Hassan : 67 ஆண்டுகள் சினிமா பயணம்… இந்திய சினிமாவில் கமல்ஹாசன் அறிமுகப்படுத்திய தொழில்நுட்பங்கள்!
67 ஆண்டுகால திரைப்பயணத்தில் கமல்ஹாசன் இந்திய சினிமாவில் அறிமுகப்படுத்திய முக்கிய தொழில்நுட்ப முயற்சிகள் குறித்து பார்க்கலாம்.
இந்திய சினிமாவின் முக்கியமான நடிகர்களில் ஒருவராக மட்டுமின்றி, திரைக்கதை, இயக்கம், தயாரிப்பு, மேக்கப், ஒலி, எடிட்டிங் என திரைப்பட உருவாக்கத்தின் பல்வேறு துறைகளிலும் தொடர்ந்து பரிசோதனை செய்தவர் கமல்ஹாசன். குழந்தை நட்சத்திரமாக ‘களத்தூர் கண்ணம்மா’வில் அறிமுகமான அவர், 67 ஆண்டுகளைக் கடந்து நிற்கும் தனது திரைப்பயணத்தில் பல புதிய முயற்சிகளை இந்திய மற்றும் தமிழ் சினிமாவுக்கு அறிமுகப்படுத்தியுள்ளார். கமல் தன்னுடைய படங்களின் வழியாக அறிமுகப்படுத்திய புதிய தொழில்நுட்பங்கள் என்னென்னவென்று பார்க்கலாம்
‘விக்ரம்’ - கணினி மூலம் பாடல் பதிவு
1986ஆம் ஆண்டு வெளியான ‘விக்ரம்’ திரைப்படம் கமல்ஹாசனின் தொழில்நுட்ப ஆர்வத்திற்கு முக்கியமான தொடக்கப்புள்ளிகளில் ஒன்று. இளையராஜா இசையமைத்த இந்தப் படத்தில், பாடல்களை பதிவு செய்வதற்கு கணினி பயன்படுத்தப்பட்டது. கொலிவுட்டில் கணினி மூலம் பாடல் பதிவு செய்யப்பட்ட முதல் படமாக ‘விக்ரம்’ குறிப்பிடப்படுகிறது.
‘தேவர் மகன்’ - திரைக்கதை எழுதும் மென்பொருள்
1992ஆம் ஆண்டு வெளியான ‘தேவர் மகன்’ படத்தின் கதையை கமல்ஹாசன் எழுதினார். இந்தப் படத்திற்கான திரைக்கதை உருவாக்கத்தில் screenplay writing software பயன்படுத்தப்பட்டது. தமிழ் சினிமாவில் இத்தகைய மென்பொருள் பயன்படுத்தப்பட்ட முதல் முயற்சியாக இது குறிப்பிடப்படுகிறது.
‘மகாநதி’ - Avid டிஜிட்டல் எடிட்டிங்
1994ஆம் ஆண்டு வெளியான ‘மகாநதி’ திரைப்படம் எடிட்டிங் துறையிலும் புதிய பாதையை உருவாக்கியது. இந்தப் படத்தில் Avid editing software பயன்படுத்தப்பட்டதாகவும், இந்திய சினிமாவில் இந்த மென்பொருள் பயன்படுத்தப்பட்ட முதல் திரைப்படமாக ‘மகாநதி’ குறிப்பிடப்படுவதாகவும் தகவல்கள் தெரிவிக்கின்றன.
‘குருதிப்புனல்’ - Dolby Stereo Surround SR
1995ஆம் ஆண்டு வெளியான ‘குருதிப்புனல்’ திரைப்படம் ஒலி வடிவமைப்பில் முக்கியமான முன்னோடி முயற்சியை மேற்கொண்டது. பி.சி.ஸ்ரீராம் இயக்கிய இந்தப் படம் Dolby Stereo Surround SR தொழில்நுட்பத்தை பயன்படுத்திய முதல் தமிழ் திரைப்படமாக குறிப்பிடப்படுகிறது.
‘இந்தியன்’ - Prosthetic Makeup
1996ஆம் ஆண்டு வெளியான ஷங்கரின் ‘இந்தியன்’ திரைப்படத்தில் கமல்ஹாசன் சேனாபதி என்ற வயதான சுதந்திரப் போராட்ட வீரர் கதாபாத்திரத்தில் நடித்தார். இந்த தோற்றத்தை உருவாக்க prosthetic makeup பயன்படுத்தப்பட்டது. இந்திய சினிமாவில் கமல்ஹாசனின் இந்த கதாபாத்திரத்திற்காக prosthetic makeup பயன்படுத்தப்பட்ட முதல் முயற்சியாக பல திரைப்பட வரலாற்றுக் குறிப்புகள் இதைச் சுட்டிக்காட்டுகின்றன.
‘ஆளவந்தான்’ - Motion Control Rig மற்றும் Animation
2001ஆம் ஆண்டு வெளியான ‘ஆளவந்தான்’ கமல்ஹாசனின் பரிசோதனைத் திரைப்படங்களில் முக்கியமானது. ஒரே காட்சியில் இரட்டை கதாபாத்திரங்களை கையாள்வதற்காக motion control rig பயன்படுத்தப்பட்டதாகவும், இந்திய திரைப்படத்தில் இந்த தொழில்நுட்பத்தை பயன்படுத்திய முதல் முயற்சிகளில் இதுவும் ஒன்று என்றும் குறிப்பிடப்படுகிறது. அதேபோல், கதையின் ஒரு பகுதியாக animation sequences பயன்படுத்தப்பட்டதும் அப்போது குறிப்பிடத்தக்க புதுமையாக இருந்தது.
‘விருமாண்டி’ - Live Sound Recording
2004ஆம் ஆண்டு கமல்ஹாசன் இயக்கி நடித்த ‘விருமாண்டி’, படப்பிடிப்பு தளத்திலேயே வசனங்களையும் ஒலியையும் பதிவு செய்யும் live sound recording முறையை பயன்படுத்திய முக்கியமான தமிழ் திரைப்படமாக அமைந்தது.
‘மும்பை எக்ஸ்பிரஸ்’ - Digital Format
2005ஆம் ஆண்டு வெளியான ‘மும்பை எக்ஸ்பிரஸ்’ திரைப்படம் டிஜிட்டல் வடிவில் படமாக்கப்பட்ட முன்னோடி இந்திய திரைப்படமாக குறிப்பிடப்படுகிறது. தமிழ் மற்றும் இந்தி ஆகிய இரு மொழிகளிலும் ஒரே பெயரில் உருவாக்கப்பட்ட இந்தப் படம், திரைப்பட தயாரிப்பில் டிஜிட்டல் தொழில்நுட்பம் எதிர்காலத்தில் ஏற்படுத்தப்போகும் மாற்றத்திற்கு முன்னோட்டமாக அமைந்தது.
‘விஸ்வரூபம்’ - Auro 3D Sound
2013ஆம் ஆண்டு வெளியான ‘விஸ்வரூபம்’ திரைப்படத்தின் மூலம் Auro 3D sound technology இந்திய சினிமாவில் அறிமுகப்படுத்தப்பட்டதாக குறிப்பிடப்படுகிறது. பாரம்பரிய surround sound-ஐ விட அதிக உயர அடுக்குகளுடன் ஒலியை உருவாக்கும் இந்த தொழில்நுட்பம், திரைப்படத்தின் ஒலி அனுபவத்தை புதிய நிலைக்கு எடுத்துச் செல்லும் முயற்சியாக அமைந்தது.
தலைப்பு செய்திகள்
ட்ரெண்டிங் செய்திகள்
