The Verdict: ஹாலிவுட் பாணியில் உருவாகும் “தி வெர்டிக்ட்” - ஃபர்ஸ்ட் லுக் போஸ்டரை வெளியிட்ட பிரசன்னா, சினேகா!

தி வெர்டிக்ட் திரைப்படம் முழுக்க முழுக்க அமெரிக்காவின் டெக்சாஸ், ஆஸ்டினில் படமாக்கப்பட்டுள்ளது.புதுப்பேட்டை, 7ஜி ரெயின்போ காலனி பட ஒளிப்பதிவாளர் அரவிந்த் கிருஷ்ணா ஒளிப்பதிவு செய்துள்ளார்.

தி வெர்டிக்ட் படம்

அமெரிக்காவைச் சேர்ந்த அக்னி எண்டர்டெயின்மெண்ட் நிறுவனம் சென்னையில் உள்ள அதன் துணை நிறுவனத்துடன் இணைந்து கோலிவுட்டில் தனது முதல் திரைப்படத்தை தயாரிக்க உள்ளதாக தெரிவித்துள்ளது.

இப்படம் தொடர்பாக வெளியிட்டப்பட்டுள்ள அறிக்கையில், “கோலிவுட்டில் படம் தயாரிப்பதில் அக்னி எண்டர்டெயின்மெண்ட் நிறுவனம் பெருமிதம் கொள்கிறது” என தெரிவித்துள்ளது.

மேலும், “இத்திரைப்படம் முழுக்க முழுக்க அமெரிக்காவின் டெக்சாஸ், ஆஸ்டினில் படமாக்கப்பட்டுள்ளது.அக்னி எண்டர்டெயின்மெண்ட் நிறுவனத்தின் சார்பாக உருவாகும்  முதல் திரைப்படத்துக்கு  "தி வெர்டிக்ட்" என பெயரிடப்பட்டுள்ளது. திரில்லர் கலந்த கோர்ட்ரூம் டிராமாவாக இப்படம் உருவாகியுள்ளது.  தயாரிப்பாளர் பிரகாஷ் மோகன்தாஸ் மற்றும் இயக்குநர் கிருஷ்ணா சங்கர் இருவரும்  டெக்சாஸில் வசிப்பவர்கள் என்பதால் இப்படம் முழுக்க முழுக்க அமெரிக்காவின் ஆஸ்டின், டெக்சாஸில் படமாக்கப்பட்டுள்ளது. 

Best wishes to the team ❤️ happy to launch the first look of #verdict @directionfx@prakashmohandas@GappiGopi @sruthihariharan@varusarath5@VidyuRaman@hasinimani@AgniEnt@editorsuriya@krishnakgopal@Dir_Sudhar@madhankarky@ShakthisreeG@KrithikaNelson@PriyankaNKOffl… pic.twitter.com/AsUb9tepzU

— Prasanna (@Prasanna_actor) May 13, 2024

இதன்மூலம் அந்த நகரங்களில் படமாக்கப்பட்ட முதல் சர்வதேச இந்தியத் திரைப்படம் என்ற பெருமையை “தி வெர்டிக்ட்” பெற்றுள்ளது. அதுமட்டுமல்லாமல் விறுவிறுப்பாக நடைபெற்ற ஷூட்டிங்கால் இப்படம் 23 நாட்களில் படமாக்கப்பட்டுள்ளது. தி வெர்டிக்ட் படத்தில் நடிகை சுஹாசினி மணிரத்னம், வரலக்ஷ்மி சரத்குமார், ஸ்ருதி ஹரிஹரன், வித்யுலேகா ராமன் மற்றும்  பிரகாஷ் மோகன்தாஸ் ஆகியோரோடு உள்ளூர் அமெரிக்கக் கலைஞர்களும் ஐந்து முக்கிய கதாபாத்திரங்களில் நடித்துள்ளனர்.

புதுப்பேட்டை, 7ஜி ரெயின்போ காலனி படப்புகழ் ஒளிப்பதிவாளர் அரவிந்த் கிருஷ்ணா இப்படத்திற்கு ஒளிப்பதிவு செய்துள்ளார். இறுதிச்சுற்று, சூரரைப் போற்று மற்றும் விக்ரம் வேதா படப்புகழ் சதீஷ் சூர்யா படத்தொகுப்பு செய்துள்ளார். பிரபல இளம் பாடகர் ஆதித்யா ராவ் இசையமைப்பாளராக அறிமுகமாகியுள்ளார்.  

அனைவரும் ரசித்து மகிழும் சிறப்பான படைப்புகளை மாறுபட்ட களங்களில் வழங்குவதை நோக்கமாகக் கொண்டு அக்னி எண்டெர்டெயின்மெண்ட் நிறுவனம் தொடங்கப்பட்டுள்ளது. அந்தவகையில் “தி வெர்டிக்ட்” திரைப்படம் இந்தியத் திரைத்துறையில் ஒரு ஆரம்பமாக இருக்கும் என எதிர்பார்க்கப்படுகிறது.  நடிகை சினேகா மற்றும் அவரது கணவர் பிரசன்னா ஆகியோர் தி வெர்டிக்ட் படத்தின் ஃபர்ஸ்ட் லுக் போஸ்டரை வெளியிட்டனர்.