மயிலாடுதுறை: முனைவர் படிப்பு மாணவர்களுக்கு கல்வி ஊக்கத்தொகை! கடைசி நாள்: 31.01.2026

மயிலாடுதுறை: முனைவர் பட்டப்படிப்பு பயிலும் ஆதிதிராவிடர் மற்றும் பழங்குடியின மாணாக்கர்களுக்கு கல்வி ஊக்கத்தொகை - மாவட்ட ஆட்சியர் அறிவிப்பு

மாவட்ட ஆட்சியர் மற்றும் சித்தரிப்பு படம்

Source : ABP

மயிலாடுதுறை: தமிழக அரசின் ஆதிதிராவிடர் மற்றும் பழங்குடியினர் நலத்துறை சார்பில், உயர்கல்வி பயிலும் மாணாக்கர்களை ஊக்குவிக்கும் வகையில் பல்வேறு நிதியுதவித் திட்டங்கள் செயல்படுத்தப்பட்டு வருகின்றன. அதன் ஒரு பகுதியாக, 2025-2026-ஆம் கல்வியாண்டில் முழுநேரம் முனைவர் பட்டப்படிப்பு (Ph.D) பயிலும் ஆதிதிராவிடர், பழங்குடியினர் மற்றும் மதம் மாறிய கிறித்துவ ஆதிதிராவிடர் இனத்தைச் சேர்ந்த மாணாக்கர்களுக்குக் கல்வி ஊக்கத்தொகை வழங்கப்பட உள்ளது.

இத்திட்டத்தின் கீழ் பயன்பெற தகுதியுள்ள மாணாக்கர்கள் விண்ணப்பிப்பது குறித்த விரிவான தகவல்களை மயிலாடுதுறை மாவட்ட ஆட்சியர் ஹெச். எஸ். ஸ்ரீகாந்த், வெளியிட்டுள்ள செய்திக்குறிப்பில் தெரிவித்துள்ளார்.

ஊக்கத்தொகைக்கான தகுதிகள்

இத்திட்டத்தின் கீழ் ஊக்கத்தொகை பெற விண்ணப்பிக்கும் மாணாக்கர்கள் பின்வரும் தகுதிகளைப் பெற்றிருக்க வேண்டும்.

*விண்ணப்பதாரர் ஆதிதிராவிடர், பழங்குடியினர் அல்லது மதம் மாறிய கிறித்துவ ஆதிதிராவிடர் இனத்தைச் சேர்ந்தவராக இருக்க வேண்டும்.

*அங்கீகரிக்கப்பட்ட கல்வி நிறுவனங்களில் முழுநேர முனைவர் பட்டப்படிப்பு (Full-time Ph.D) பயில்பவராக இருக்க வேண்டும்.

*புதியதாக விண்ணப்பிக்கும் மாணவர்கள் (Fresh) மற்றும் ஏற்கனவே இத்திட்டத்தில் இணைந்து தற்போது புதுப்பித்தல் (Renewal) செய்யும் மாணவர்களும் விண்ணப்பிக்கலாம்.

விண்ணப்பிக்கும் முறை

தகுதியுள்ள மாணாக்கர்கள் https://adwphdscholarship.in/ என்ற பிரத்யேக இணையதள முகவரியின் வாயிலாக மட்டுமே ஆன்லைனில் விண்ணப்பிக்க முடியும். இத்திட்டம் தொடர்பான விரிவான விதிமுறைகள் மற்றும் வழிகாட்டுதல்களை www.tn.gov.in/formadwlist.pdf என்ற இணையதள முகவரியில் மாணாக்கர்கள் விரிவாக அறிந்து கொள்ளலாம்.

பூர்த்தி செய்யப்பட்ட விண்ணப்பங்களைச் சமர்ப்பித்தல்

இணையதளத்தில் விண்ணப்பித்த பின், முழுமையாகப் பூர்த்தி செய்யப்பட்ட விண்ணப்பப் படிவங்களை உரிய ஆவணங்களுடன் இணைத்து அஞ்சல் மூலமாகவோ அல்லது நேரிடையாகவோ கீழ்க்கண்ட முகவரிக்கு அனுப்பி வைக்க வேண்டும்.

விண்ணப்பங்கள் சேர வேண்டிய முகவரி

• ஆணையர், ஆதிதிராவிடர் நல ஆணையரகம்,
• எழிலகம் (இணைப்பு கட்டிடம்),
• சேப்பாக்கம், சென்னை - 600 005.

முக்கியத் தேதி: பூர்த்தி செய்யப்பட்ட விண்ணப்பங்கள் வந்து சேர வேண்டிய கடைசி நாள் 31.01.2026 அன்று மாலை 5.45 மணி ஆகும்.

முக்கியக் குறிப்புகள்

* நிர்ணயிக்கப்பட்ட காலக்கெடுவுக்குப் பிறகு பெறப்படும் விண்ணப்பங்கள் கண்டிப்பாகப் பரிசீலிக்கப்பட மாட்டாது.

*குறிப்பாக, முந்தைய கல்வியாண்டிற்கான விண்ணப்பங்களை தற்போது சமர்ப்பித்தால் அவை ஏற்றுக்கொள்ளப்பட மாட்டாது எனத் தெளிவுபடுத்தப்பட்டுள்ளது.

 * விண்ணப்பத்துடன் சாதிச் சான்று, வருமானச் சான்று, கல்விச் சான்றிதழ்கள் மற்றும் ஆராய்ச்சிப் படிப்பு தொடர்பான ஆவணங்களை இணைப்பது அவசியமாகும்.

மாவட்ட ஆட்சியரின் வேண்டுகோள்

இது குறித்து மயிலாடுதுறை மாவட்ட ஆட்சியர் ஹெச். எஸ். ஸ்ரீகாந்த் கூறுகையில், "ஆராய்ச்சிப் படிப்புகளை மேற்கொள்ளும் மாணாக்கர்களுக்கு நிதி ஒரு தடையாக இருக்கக்கூடாது என்பதே அரசின் நோக்கம். மயிலாடுதுறை மாவட்டத்தைச் சேர்ந்த தகுதியுள்ள ஆதிதிராவிடர் மற்றும் பழங்குடியின மாணாக்கர்கள் இந்த நல்வாய்ப்பினைத் தவறாது பயன்படுத்திக் கொள்ள வேண்டும். உரிய காலத்திற்குள் இணையதளம் வழியாக விண்ணப்பித்து, கல்வி ஊக்கத்தொகையைப் பெற்றுத் தங்கள் ஆராய்ச்சிப் பணியைச் சிறப்பான முறையில் தொடர வேண்டும்" எனக் கேட்டுக்கொண்டுள்ளார்.

இந்த அறிவிப்பு மயிலாடுதுறை மாவட்டத்தில் உள்ள முனைவர் பட்ட ஆய்வாளர்களிடையே பெரும் வரவேற்பைப் பெற்றுள்ளது. உயர்கல்வித் துறையில் பின்தங்கிய சமூகத்தைச் சேர்ந்த மாணவர்களின் பங்களிப்பை அதிகரிக்க இத்திட்டம் ஒரு முக்கிய மைல்கல்லாக அமையும் என எதிர்பார்க்கப்படுகிறது.