TVS Apache: குழந்தைகளுக்கு ரேஸ் பைக்.. டிவிஎஸ் நிறுவனத்தில் அசத்தலான அறிமுகம்!

TVS Apache RR 200 Mini: ரேஸில் பங்கேற்கும் குழந்தைகள இந்தத் தொடரை நிறைவு செய்யும் ஓட்டுநர்கள் 15 வயதிலிருந்தே TVS ஒன் மேக் சாம்பியன்ஷிப் ரூக்கி பிரிவில் நுழையத் தகுதி பெறுவார்கள்.

டிவிஎஸ் அப்பாச்சி RR200 மினி ஜிபி பைக்

Source : ABP

10 முதல் 14 வயதுக்குட்பட்ட பந்தய வீரர்கள் போட்டிப் பந்தயங்களில் நுழைவதை ஊக்குவிக்கும் வகையில் டிவிஎஸ் நிறுவனம் ரேஸ் பைக்குகளை அறிமுகம் செய்யவுள்ளதாக சொல்லப்படுகிறது.

குழந்தைகளுக்கான பைக் ரேஸ் 

இந்தியாவில் 18 வயதுக்குட்பட்டவர்களுக்கு ஓட்டுநர் உரிமம் வழங்கப்படுவதில்லை. சாலைகளில் 18 வயதுக்குக் குறைவானவர்கள் வாகனங்களை இயக்குவது சட்டப்படி குற்றமாக கருதப்பட்டு கடுமையான தண்டனைகளும் வழங்கப்படுகிறது. அதேசமயம் அங்கீகரிக்கப்பட்ட பிரத்யேக ரேஸ் டிராக்குகளில் தகுந்த பாதுகாப்புடன் 10 முதல் 14 வயதுக்குட்பட்ட குழந்தைகள் பைக் பந்தயங்களில் பங்கேற்க சட்டப்பூர்வமாக அனுமதி உண்டு. 

இப்படியான நிலையில் டிவிஎஸ் நிறுவனம் இந்தியாவில் உள்ள இளம் பந்தயத் திறமையாளர்களைக் கண்டறிந்து பயிற்சி அளிப்பதற்காக முடிவு செய்துள்ளது. அதன் ஒரு முயற்சியாக அப்பாச்சி ஜூனியர் திட்டத்தின் கீழ் ஒரு மோட்டார் ஸ்போர்ட் திட்டத்தை அறிமுகம் செய்துள்ளது.

அப்பாச்சி ஜூனியர் திட்டம்

அதன்படி  பிரத்யேக ரேஸ் டிராக்குகளில் 10 முதல் 14 வயதுக்குட்பட்ட குழந்தைகள் பங்கேற்க வசதியாக அப்பாச்சி ஆர்ஆர் 200 மினி ஜிபி என்ற பைக்கை டிவிஎஸ் நிறுவனம் அறிமுகம் செய்துள்ளது. 

மெட்ராஸ் மோட்டார் ஸ்போர்ட்ஸ் கிளப் (MMSC) நடத்தும் மெட்ராஸ் சர்வதேச கார்ட்டிங் அரங்கில் 10 முதல் 14 வயதுக்குட்பட்ட பங்கேற்பாளர்கள் தொழில்முறை மேற்பார்வையின் கீழ் இந்த பைக்குகளை ஓட்டுவார்கள் என தெரிவிக்கப்பட்டுள்ளது. 

குழந்தைகள் ஓட்டும் வகையிலான நுட்பங்கள், பிரேக்கிங், வளைவுகளில் திரும்புதல், பந்தயப் பாதைகள், மோட்டார் சைக்கிள் கட்டுப்பாடு மற்றும் பந்தயப் பாதை பாதுகாப்பு ஆகியவை கண்காணிக்கப்படும். இந்த ரேஸில் பங்கேற்கும் குழந்தைகள் ஒரு பிரத்யேக பந்தய வாகனத்தை வாங்காமலேயே பயிற்சி பெற ஏதுவாக, இந்த மோட்டார் சைக்கிள்கள் வாடகைக்கு பெற்றுக் கொள்ளலாம். இந்தத் தொடரை நிறைவு செய்யும் ஓட்டுநர்கள் 15 வயதிலிருந்தே TVS ஒன் மேக் சாம்பியன்ஷிப் ரூக்கி பிரிவில் நுழையத் தகுதி பெறுவார்கள் என்பதால், இந்தப் பயிற்சித் திட்டம் போட்டிப் பந்தயத்திற்கான ஒரு வரையறுக்கப்பட்ட முன்னேற்றப் படியாகவும் பார்க்கப்படுகிறது.

அப்பாச்சி RR200 மினி ஜிபி பைக் அதிக வேகத்தில் நிலைத்தன்மையை மேம்படுத்தும் வகையில் காற்றின் எதிர்ப்பைக் குறைப்பதற்காக  எடை குறைந்த காற்றியக்கவியல் வடிவமைப்புடன் சர்க்யூட் பந்தயத்திற்கென பிரத்யேகமாக உருவாக்கப்பட்டுள்ளது. இந்த பைக் 197.75 சிசி இன்ஜின் 66.0 மிமீ போர் மற்றும் 57.8 மிமீ ஸ்ட்ரோக்கைக் கொண்டுள்ளது.  கோனிகல் ஏர் ஃபில்டருடன் இணைக்கப்பட்ட 30 மிமீ செமி-பிளாட் ஸ்லைடு கார்பரேட்டர் மூலம் எரிபொருள் வழங்கப்படுகிறது, மேலும் இன்ஜினுக்குப் பொருத்தமாக ரேஸ்-ஸ்பெக் ஃப்ரீ-ஃப்ளோ எக்ஸாஸ்ட் உருவாக்கப்பட்டுள்ளது. 

இந்த பைக் மூலம் மணிக்கு 110 கிமீ உச்ச வேகத்தை எட்ட முடியும் என்றும் டிவிஎஸ் நிறுவனம் தெரிவித்துள்ளது. வெறும் 90 கிலோ எடை கொண்ட இந்த மினி ஜிபி பைக் பிரேக் பிடிக்கும்போதும் திடீர் திசை மாற்றங்களின்போதும் மற்றும் குறுகலான வளைவுகளில் திரும்பும்போதும் கட்டுப்படுத்துவது எளிதாக இருக்கும் என தெரிவிக்கப்பட்டுள்ளது.