தொடர்ந்து சொதப்பும் ஆர்சிபி… இன்ஸ்டாகிராமில் கேப்டன் ஸ்ம்ரிதி மந்தனாவை வசை பாடும் ரசிகர்கள்!
அதிருப்தி அடைந்த ரசிகர்களில் சிலர், ஸ்ம்ரிதி மந்தனாவின் இன்ஸ்டாகிராம் பக்கத்தில் கமென்டில் திட்டி வருகின்றனர். சில கமெண்டுகள் எல்லை மீறி வசை பாடும் வகையில் இருப்பதாக கூறப்படுகிறது.
மகளிர் ப்ரீமியர் லீக்கில் மோசமான ஆட்டத்தை தொடர்ந்து வெளிப்படுத்தி வரும் ஆர்சிபி அணியின் கேப்டன் ஸ்ம்ரிதி மந்தனாவின் இன்ஸ்டாகிராம் பக்கத்தில் தவறான வார்த்தைகளை பயன்படுத்தி ரசிகர்கள் திட்டி வருகின்றனர்.
ரசிகர்கள் அதிருப்தி
மகளிர் பிரீமியர் லீக் (WPL) 2023 சீசனில் ராயல் சேலஞ்சர்ஸ் பெங்களூர் மகளிர் கிரிக்கெட் அணி, இதுவரை விளையாடிய எந்த போட்டியிலுமே வெல்லாத நிலையில் மோசமான தொடக்கத்தை சந்தித்து வருகிறது. ஸ்மிருதி மந்தனா தலைமையிலான அணி அவர்கள் எதிர்பார்த்த தரத்திற்கு ஏற்ப செயல்பட முடியாமல் திணறி வரும் நிலையில், தற்போது WPL புள்ளிகள் பட்டியலில் கடைசி இடத்தில் உள்ளது. ஸ்ம்ரிதி மந்தனாவின் கேப்டன்சி யுக்திகள் மற்றும் பேட்டிங்கின் ஃபார்ம் உட்பட பல தனிப்பட்ட பிழைகள் இந்த சீசனில் RCB இன் போராட்டத்திற்கு சில காரணங்கள் என்பது குறிப்பிடத்தக்கது. ஆனால் ஐபிஎல் வரலாற்றில் மிகவும் பிரபலமான அணியான ஆர்சிபி அதிக ரசிகர்களை கொண்டுள்ள நிலையில், பலரும் அதிருப்தி அடைந்துள்ளனர். ஆர்சிபிக்கு தோல்வி புதிதல்ல என்றாலும் இப்படி ஒரு சீசனை அவர்கள் எதிர்பார்த்திருக்கமாட்டார்கள். அதிருப்தி அடைந்த ரசிகர்களில் சிலர், கேப்டன் ஸ்ம்ரிதி மந்தனாவின் இன்ஸ்டாகிராம் பக்கத்தில் தவறான வார்த்தைகளை பயன்படுத்தி திட்டி வருகின்றனர். சில கமெண்டுகள் எல்லை மீறி வசை பாடும் வகையில் இருப்பதாக கூறப்படுகிறது.
தொடர் தோல்வி
RCB தனது முதல் போட்டியில் டெல்லி கேப்பிட்டல்ஸிடம் தோற்றது, பின்னர் ஹர்மன்ப்ரீத் கவுரின் மும்பை இந்தியன்ஸிடம் தோற்றது. அந்த போட்டியில் பெங்களூரு அணியை முழுமையாக ஆதிக்கம் செலுத்தினர். குஜராத் ஜெயன்ட்ஸுக்கு எதிரான மூன்றாவது ஆட்டத்திலும் அணி தோல்வியுற்றது, அதைத் தொடர்ந்து UP வாரியர்ஸுக்கு எதிரான மற்றொரு ஆட்டத்தில் மிகவும் பரிதாபமான முறையில் தோல்வியை சந்தித்தது. மோசமாக விளையாடி வந்தாலும், அணி வீரர்கள் இன்னும் நம்பிக்கையை விடவில்லை, அவர்களின் வரவிருக்கும் போட்டிகளில் விரைவில் அட்டவணை மாறும் என்று நம்புகின்றனர்.
ஏன் இந்த பின்னடைவு?
"கடந்த நான்கு ஆட்டங்களில், இது நடக்கிறது என்று நான் நினைக்கிறேன். நாங்கள் நன்றாகத் தொடங்குகிறோம், பின்னர் விக்கெட்டுகளை இழக்கிறோம். பழியையும் நான் ஏற்றுக்கொள்கிறேன். ஒரு டாப் ஆர்டர் பேட்டராக, நாங்கள் அதிக ரன்களை குவிக்க வேண்டும், நாங்கள் ஒரு சமநிலையான அணியைப் பெற முயற்சிக்கிறோம், அதுதான் எங்களுக்கு வெற்றியை பெற்றுத்தரும். நான் கிட்டத்தட்ட எல்லா வீரர்களிடமும் பேச முயற்சித்தேன், அவர்களை உற்சாகப்படுத்தினேன், அதை நான் தொடர்ந்து செய்ய வேண்டும். கடந்த வாரம் கடினமாக இருந்தது. பிரதிபலிக்க இன்னும் நிறைய வேலை செய்ய வேண்டியுள்ளது," என யுபி வாரியர்ஸுக்கு எதிரான ஆட்டத்திற்குப் பிறகு மந்தனா கூறியுள்ளார்.
மீட்பாரா ஸ்ம்ரிதி
அடுத்ததாக, ஆர்சிபி அணி மும்பை இந்தியன்ஸுக்கு எதிரான தோல்வியிலிருந்து மீண்டு வரும் ஆர்வத்துடன் டெல்லி கேப்பிடல்ஸை எதிர்கொள்கிறது. அந்த போட்டியில் ஸ்மிருதி மந்தனா ஒரு முக்கிய பங்கு வகிக்கிறார். ஆனால் பலர் சமூக வலைதளங்களில், சீசனின் மிகவும் விலையுயர்ந்த வீராங்கனை என்ற சொல்லுக்கு தகுதியற்றவர் என்று விமர்சித்து வருகின்றனர். பலர் தவறான வார்த்தைகள் பயன்படுத்தி அவரை வசை பாடி வருகின்றனர். அவர் மீது கொட்டப்படும் வெறுப்புகளை மாற்றுவதற்கு ஸ்ம்ரிதி மந்தனா போராடி வருகிறார்.
தலைப்பு செய்திகள்
ட்ரெண்டிங் செய்திகள்
