Asian Champions Trophy Hockey: முதல் நாளே 3 போட்டி .. ஆசிய சாம்பியன்ஸ் கோப்பை ஹாக்கி தொடர் இன்று தொடக்கம்..

ஹாக்கி ரசிகர்களால் பெரிதும் எதிர்பார்க்கப்பட்ட ஆசிய சாம்பியன்ஸ் கோப்பை ஹாக்கி தொடர் சென்னையில் இன்று தொடங்குகிறது. 

ஆசிய சாம்பியன்ஸ் கோப்பை ஹாக்கி தொடர்

ஹாக்கி ரசிகர்களால் பெரிதும் எதிர்பார்க்கப்பட்ட ஆசிய சாம்பியன்ஸ் கோப்பை ஹாக்கி தொடர் சென்னையில் இன்று தொடங்குகிறது. 

ஆசிய கோப்பை ஹாக்கி தொடர் 

ஹாக்கி இந்தியா மற்றும்  தமிழ்நாடு அரசு இந்த 7வது சாம்பியஸ் கோப்பை ஹாக்கி தொடரை நடத்துகிறது. சென்னை எழும்பூரில் உள்ள மேயர் ராதாகிருஷ்ணன் மைதானத்தில் இன்று (ஆகஸ்ட் 3) முதல் ஆகஸ்ட் 12 ஆம் தேதி வரை போட்டிகள் நடைபெறுகிறது. இதில் நடப்பு சாம்பியன் தென்கொரியா, இந்தியா, பாகிஸ்தான், சீனா, மலேசியா, ஜப்பான் ஆகிய அணிகள் பங்கேற்கின்றன. 

லீக் சுற்றில் ஒவ்வொரு அணியும், மற்ற அணிகளுடன் தலா ஒரு முறை மோத வேண்டும். இதன் முடிவில் முதல் 4 இடங்களை பிடிக்கும் அணிகள் அரையிறுதிக்கு தகுதி பெறும். முன்னதாகவே இந்த தொடருக்காக சென்னைக்கு வந்த அணிகள், தீவிர பயிற்சில் ஈடுபட்டு வருகின்றனர்.

இன்றைய போட்டிகள் 

இப்படியான நிலையில் தொடக்க நாளான இன்று நடப்பு சாம்பியன் தென் கொரியா - ஜப்பான் அணிகள் மோதுகிறது. மாலை 4 மணிக்கு இந்த ஆட்டமானது நடைபெறுகிறது. இதனைத் தொடர்ந்து மாலை 6.15 மணிக்கு நடக்கும் 2வது ஆட்டத்தில் மலேசியா - பாகிஸ்தான் அணிகள் மோதுகின்றது. இரவு 8.30 மணிக்கு நடக்கும் போட்டியில் இந்தியா - சீனா அணிகள் பலப்பரீட்சை நடத்துகின்றது. 

கெத்து காட்ட தயாராகும் இந்தியா 

சென்னையில் 16 ஆண்டுகளுக்குப் பிறகு சர்வதேச ஹாக்கி திருவிழா நடைபெறுவதால் ரசிகர்கள் மகிழ்ச்சியடைந்துள்ளனர். மேலும் இந்த போட்டிக்காக ஹாக்கி மைதானம் ரூ.16 கோடி செலவில் புனரமைக்கப்பட்டு புதுப்பொலிவு பெற்றுள்ளது. அதேசமயம் புதிய செயற்கை இழை மைதானம் மற்றும் நவீன வசதிகள் என மைதானம் சூப்பராக காட்சியளிக்கிறது. இந்த போட்டிக்கான டிக்கெட்டுகள் ஆன்லைன் மூலம் விற்பனை செய்யப்பட்டு வருகிறது. ஒருநாளில் நடைபெறும் ஆட்டங்கள் அனைத்தையும் பார்க்க ரூ.300, ரூ.400 என கட்டணம் நிர்ணயிக்கப்பட்டுள்ளது. 

இதற்கிடையில் கடந்த வாரம் ஸ்பெயினில் நடந்த 4 நாடுகள் ஹாக்கி தொடரில் இந்திய அணி தரவரிசையில் 'நம்பர் ஒன்' அணியான நெதர்லாந்தை வீழ்த்தி வெண்கலப்பதக்கம் வென்றது. அதே உற்சாகத்திடன் களம் காண்பதால் இந்த தொடரில் இந்திய அணி வீரர்கள் தங்கள் கெத்தை காட்டுவார்கள் என ரசிகர்கள் கருத்து தெரிவித்துள்ளனர். மேலும் 2021 ஆம் ஆண்டு தொடரில் 3வது இடத்தை பெற்ற இந்திய அணி இம்முறை சொந்த மண்ணில் களமிறங்குவது கூடுதல் பலமாக பார்க்கப்படுகிறது. இந்த போட்டியானது ஸ்டார் ஸ்போர்ட்ஸ் சேனலிலும், பேன் கோடு (Fancode) செயலியிலும் நேரடியாக ஒளிபரப்பு செய்யப்படுகிறது. 

இதற்கிடையில் கன்னியாகுமரியில் இருந்து தொடங்கி ஒவ்வொரு மாவட்டமாக கொண்டு வரப்பட்ட ஆசிய சாம்பியன்ஸ் ஹாக்கி கோப்பையை சர்வதேச ஹாக்கி சம்மேளனத்தின் தலைவர் முகமது தயப் இக்ராம், தமிழ்நாடு முதலமைச்சரிடம் மு.க.ஸ்டாலினிடம் நேற்று ஒப்படைத்தார் என்பது குறிப்பிடத்தக்கது.