Bomb Attack: திருமணம், மருத்துவமனை உள்ளிட்ட 3 இடங்களில் பெண்கள் தற்கொலைப்படை தாக்குதல் - 18 பேர் உயிரிழப்பு

Bomb Attack: நைஜீரீயாவில் நடந்த தற்கொலைப்படை தாக்குதலில் 18 பேர் உயிரிழந்துள்ளதாக முதற்கட்ட தகவல் வெளியாகியுள்ளது.

நைஜீரியா தாக்குதல் தொடர்பான மாதிரி படம்

Source : X@AFP

Bomb Attack: நைஜீரீயாவில் திருமண நிகழ்வு, இறுதிச்சடங்கு மற்றும் மருத்துவமனையில், பெண்கள் தற்கொலைப்படை தாக்குதலில் ஈடுபட்டுள்ளதாக தகவல் வெளியாகியுள்ளது.

நைஜீரியாவில் தற்கொலைப்படை தாக்குதல்:

நைஜீரியாவில் நடந்த தொடர் குண்டுவெடிப்புத் தாக்குதலில் குறைந்தது 18 பேர் கொல்லப்பட்டனர் மற்றும் 40 க்கும் மேற்பட்டோர் காயமடைந்துள்ளனர் என்று உள்ளூர் மாநில அவசர மேலாண்மை அமைப்பு அறிவித்துள்ளது. திருமணம், இறுதி சடங்கு மற்றும் மருத்துவமனையை தனித்தனியாக, தற்கொலைப்படையை சேர்ந்த பெண்கள் தாக்கியதாக முதற்கட்ட தகவல் வெளியாகியுள்ளது.  உயிரிழந்தவர்களில் குழந்தைகள், பெரியவர்கள் மற்றும் கருவுற்று இருந்த பெண்களும் அடங்குவர் என தெரிவிக்கப்பட்டுள்ளது. இருப்பினும், நைஜீரியாவின் வான்கார்ட் நியூஸ் , இறப்பு எண்ணிக்கை அதிகமாக இருக்கலாம், 30க்கு அருகில் இருக்கலாம் என்று தெரிவித்துள்ளது.

அடுத்தடுத்த 3 தற்கொலைப்படை தாக்குதல்:

தற்போது வரை வெளியாகியுள்ள தகவலின்படி, முதல் குண்டுவெடிப்பு மாலை 3 மணியளவில் திருமண நிகழ்ச்சியின் நடுவே நிகழ்ந்தது. சில நிமிடங்களுக்குப் பிறகு, பொது மருத்துவமனை குவோசாவில் மற்றொரு குண்டுவெடிப்பு நிகழ்ந்தது. சோகத்தின் மத்தியில், இறப்பு நிகழ்வு நடந்த இடத்தில் கடைசி தற்கொலைப்படை தாக்குதல் நடைபெற்றுள்ளது. தாக்குதல்களை நடத்துவதற்கு முன் கண்டறியப்படுவதைத் தவிர்ப்பதற்காக குழந்தைகளுடன் பெண் தற்கொலைப் படையினரையும் தீவிரவாத குழு பயன்படுத்துகிறது.

ஊரடங்கு உத்தரவு:

தாக்குதலில் காயமடைந்தவர்கள் முறையான சிகிச்சைக்காக மைதுகுரிக்கு கொண்டு செல்லப்படுவதற்கு முன்பு, மருத்துவ ரெஜிமென்ட் சர்வீசஸ் (எம்ஆர்எஸ்) கிளினிக்கில் முதற்கட்ட சிகிச்சைகள் வழங்கப்பட்டு வருகின்றன. ராணுவம் ஊரடங்கு உத்தரவை விதித்துள்ளது. இதனிடயே,  தாக்குதல்களுக்கு தற்போது வரை யாரும் பொறுப்பேற்கவில்லை. நைஜீரியாவின் வடகிழக்கு மாநிலமான போர்னோவில் உள்ள க்வோசா நகரில், 15 ஆண்டுகால இஸ்லாமிய கிளர்ச்சி நீடிக்கும் நிலையில் இந்த தாக்குதல்கள் நடந்துள்ளன.

பிரச்னை என்ன?

போகோ ஹராம் மற்றும் அதன் பிளவுக் குழுவான இஸ்லாமிய அரசு மேற்கு ஆப்பிரிக்கா மாகாணம் (ISWAP), போர்னோவில் மிகவும் தீவிரமான போராளி அமைப்புகளாகும். இது அயர்லாந்து பரப்பளவுடன் ஒப்பிடக்கூடிய பரந்த கிராமப்புறமாகும். 2014 இல், போகோ ஹராம் நகரைக் கைப்பற்றியது. 2015 இல் நைஜீரியப் படைகளால் திரும்பப் பெறப்பட்டது. இருப்பினும், பயங்கரவாத குழு நகருக்கு அருகில் தாக்குதல்கள் மற்றும் கடத்தல்களை தொடர்ந்து நடத்தி வருகிறது. இது தாக்குதல்களில் பெண்களையும் இளைளர்களையும் தாக்குதலுக்காக அடிக்கடி பயன்படுத்துகிறது.

தற்கொலைத் தாக்குதல்களை நடத்தும் பெண்களும் குழந்தைகளும் பல ஆண்டுகளாகக் குழுவால் கடத்தப்பட்ட ஆயிரக்கணக்கானவர்களில் சிலர் எனவும் நம்பப்படுகிறது. கிளர்ச்சி வலுவிழந்துவிட்டதாக நைஜீரிய ராணுவம் கூறினாலும், போராளிகள் ஆயிரக்கணக்கானவர்களைக் கொன்றுள்ளனர். லட்சக்கணக்கானவர்கள் இடம்பெயர்ந்தனர் மற்றும் பொதுமக்களுக்கு எதிராக தொடர்ந்து கொடிய தாக்குதல்களை நடத்தி வருகின்றனர். அந்த வகையில் தான் தற்போதைய தாக்குதலும் அரங்கேறியுள்ளது.