அரியலூர் மாவட்டத்தில் பெண் வெட்டி கொலை - ஒருவர் கைது
திருமானூர் அருகே பெண் வெட்டி படுகொலை செய்யப்பட்ட சம்பவம் குறித்து போலீசார் தீவிர விசாரணை நடத்தியதில் ஒருவர் கைது செய்யபட்டார்.
அரியலூர் மாவட்டம், திருமானூர் ஒன்றியத்துக்கு உட்பட்ட வெங்கனூர் கிராமத்தை சேர்ந்தவர் ராசாத்தி(வயது 40). இவர் அதே கிராமத்தை சேர்ந்த முனியப்பன் என்பவரை காதலித்து திருமணம் செய்துகொண்ட நிலையில் அவர் சில மாதங்களில் இறந்து விட்டார். இதனையடுத்து 2-வதாக திருமணம் செய்த ராமகிருஷ்ணனும் கடந்த 4 ஆண்டுகளுக்கு முன்பு உயிரிழந்தார். இந்நிலையில் ராமகிருஷ்ணன் குடும்பத்தின் மீது ராசாத்தி ஜீவனாம்சம் கேட்டு வழக்கு தாக்கல் செய்த நிலையில் ரூ.11 லட்சம் ஜீவனாம்சம் தர நீதிமன்றம் உத்தரவிட்டது. இதையடுத்து ராமகிருஷ்ணன் குடும்பத்தினரிடமிருந்து ராசாத்தி ஜீவனாம்சமாக ரூ.11 லட்சத்தை பெற்றுள்ளதாக கூறப்படுகிறது. இந்நிலையில் ராசாத்தி ஜீவனாம்சம் வழக்கு தொடர அவரின் முதல் கணவர் முனியப்பனின் தம்பி மனைவி உதவியாக இருந்ததாகவும், அந்த வகையில் அவருக்கு ரூ.1 லட்சத்து 50 ஆயிரம் செலவாகி உள்ளது எனக்கூறி அவர் அந்த பணத்தை ராசாத்தியிடம் கேட்டுள்ளார். பணம் தர ராசாத்தி மறுத்தநிலையில், இது சம்பந்தமாக இருவருக்கும் தகராறு ஏற்பட்டுள்ளதாக கூறப்படுகிறது.
இந்நிலையில் நேற்று மாலை ராசாத்தி கோவில்எசனை- வெங்கனூர் சாலையில் வெங்கனூர் சுடுகாடு அருகே மர்ம நபர்களால் வெட்டி படுகொலை செய்யப்பட்டுள்ளார். இதுகுறித்து அப்பகுதி மக்கள் வெங்கனூர் போலீஸ் நிலையத்திற்கு தகவல் தெரிவித்தனர். தகவலின் பேரில் போலீசார் சம்பவ இடத்திற்கு விரைந்து சென்று ராசாத்தியின் உடலை கைப்பற்றி பிரேத பரிசோதனைக்காக அரியலூர் அரசு மருத்துவமனைக்கு அனுப்பி வைத்தனர். பின்னர் கொலைக்கான காரணம் என்ன? ராசாத்தியை கொலை செய்தது யார்? எத்தனைபேர் சேர்ந்து கொலை செய்தனர்? என பல்வேறு கோணங்களில் தீவிர விசாரணை நடத்தி வருகின்றனர். இதில் நாகராஜ் மீது அவர்களுக்கு சந்தேகம் ஏற்பட்டது. இதையடுத்து அவரை வெங்கனூர் போலீஸ் இன்ஸ்பெக்டர் (பொறுப்பு) கோபிநாத் தலைமையில் சப்-இன்ஸ்பெக்டர் செல்வராஜ் மற்றும் போலீசார் வலைவீசி தேடி வந்தனர். இதையடுத்து நேற்று காலை கரைவெட்டி பறவைகள் சரணாலயம் ஏரிக்கரை மரத்தடியில் பதுங்கி இருந்த நாகராஜை போலீசார் கைது செய்தனர். அவரிடம் நடத்திய விசாரணையில், ராசாத்தி பணம் தருவதாக கூறிவிட்டு, பின்னர் பணம் தரமுடியாது என்று கூறி விட்டதாகவும், இதனால் அவரை நாகராஜ் வெட்டிக்கொன்றதாகவும் தெரியவந்ததாக போலீசார் தெரிவித்தனர். இதையடுத்து அவரை அரியலூர் கோர்ட்டில் ஆஜர்படுத்தி சிறையில் அடைத்தனர். இந்த சம்பவம் அப்பகுதியில் பரபரப்பை ஏற்படுத்தி உள்ளது.
ABP நாடு செய்திகளை சமூக வலைத்தள பக்கங்களிலும் பின் தொடரலாம்
தலைப்பு செய்திகள்
ட்ரெண்டிங் செய்திகள்
