அண்ணன் தற்கொலை.. கதறி அழுத தம்பியும் அதிர்ச்சியில் மரணம் - நெல்லையில் சோகம்
அண்ணன் தற்கொலை செய்ததை எண்ணி கதறி அழுத தம்பியும் நெஞ்சுவலியால் பரிதாபமாக உயிரிழந்தது உறவினர்களிடையே பெரும் சோகத்தை ஏற்படுத்தி உள்ளது.
நெல்லை மாவட்டம் செட்டிகுளம் புதுமனை கிழக்கு தெருவை சேர்ந்தவர் சுயம்பு. இவரது மகன் தினேஷ்குமார்(30). இவர் கூடங்குளம் கடல் காவல் நிலையத்தில் ஊர்க்காவல் படையில் பணிபுரிந்து வருகின்றார். இந்த நிலையில் இவர் அண்மையில் நடந்த காவலர் எழுத்து தேர்வில் கலந்து கொண்டு தேர்வு எழுதியுள்ளார். மேலும் இவர் அதே பகுதியைச் சேர்ந்த இளம் பெண் ஒருவரை காதலித்து வந்ததாகவும் கூறப்படுகின்றது. இந்நிலையில் நேற்று இரவு காதலித்த பெண்ணுக்கும், தினேஷுக்கும் கருத்து வேறுபாடு ஏற்பட்டுள்ளதாக தெரிகிறது. இதனால் அவர் மிகுந்த கவலையுடன் இருந்து உள்ளார். அதுமட்டுமின்றி காவலர் தேர்வும் சரியாக எழுதாததாலும் அந்த மன வேதனையிலும் இருந்ததாக கூறப்படுகின்றது.
இந்த இரண்டு கவலைகளும் அவருக்கு மன அழுத்தத்தை தந்ததாக தெரிகிறது. இதனால் மனம் உடைந்த நிலையில் இருந்த தினேஷ் குமார் வீட்டில் யாரும் இல்லாத நேரத்தில் இரவில் தூக்கு போட்டு தற்கொலை செய்து கொண்டார். இதனை அறிந்த உறவினர்கள் அவரது உடலை மீட்டுள்ளனர். மேலும் தகவலறிந்த கூடங்குளம் காவல்துறையினர் சம்பவ இடத்திற்கு விரைந்து வந்து தினேஷ்குமாரின் உடலை கைப்பற்றி பிரேத பரிசோதனைக்காக அரசு மருத்துவமனைக்கு அனுப்பி வைத்தனர்.
இந்த சூழலில் தினேஷ்குமார் தற்கொலை செய்து கொண்ட செய்தி அறிந்து வீட்டிற்கு வந்த உறவினர்கள் அவரின் தவறான முடிவை எண்ணி கதறி அழுதுள்ளனர். அப்போது தினேஷ்குமாரின் வீட்டிற்கு அருகே வசிக்கும் அவரது பெரியப்பா மகனான தினேஷ்குமாரின் தம்பி வெங்கடேஷ் என்பவரும் வீட்டிற்கு வந்த நிலையில் கதறி அழுதுள்ளார். அப்போது திடீரென கீழே விழுந்து மயக்கம் அடைந்துள்ளார். உடனடியாக அவரை மீட்ட உறவினர்கள் மருத்துவமனைக்கு அழைத்து சென்றனர். அங்கு அவரை பரிசோதித்த மருத்துவர்கள் ஏற்கனவே அவர் இறந்து விட்டதாகவும், நெஞ்சுவலி காரணமாக உயிரிழந்திருப்பதாகவும் தெரிவித்துள்ளனர். இச்சம்பவம் குறித்து கூடங்குளம் காவல் ஆய்வாளர் ஜான் பிரிட்டோ வழக்குப்பதிவு செய்து விசாரணை மேற்கொண்டு வருகிறார். அண்ணன் தற்கொலை செய்ததை எண்ணி கதறி அழுத தம்பியும் நெஞ்சுவலியால் பரிதாபமாக உயிரிழந்தது உறவினர்களிடையே பெரும் சோகத்தை ஏற்படுத்தி உள்ளது. மேலும் ஒரே தெருவில் இரு துக்க நிகழ்வு ஏற்பட்ட சம்பவம் கிராம மக்களை சோகத்தில் ஆழ்த்தியுள்ளது...
மனித உயிரை மாய்த்துக்கொள்வதற்கான உரிமை யாருக்கும் இல்லை. தற்கொலை எண்ணம் மேலிடும் போது உரிய ஆலோசனை பெற்றால் புதிய வாழ்க்கை அவர்களுக்காக காத்துக்கொண்டிருக்கிறது. அதற்காகவே சினேகா போன்ற தன்னார்வ தொண்டு நிறுவனங்கள் சேவை ஆற்றி வருகின்றன. அவர்களை தொடர்பு கொண்டு இலவசமாக ஆலோசனை பெறலாம்.
சினேகா தன்னார்வ தொண்டு நிறுவனம்,
எண்; 11, பார்க் வியூவ் சாலை, ஆர்.ஏ. புரம்,
சென்னை - 600 028.
தொலைபேசி எண் - +91 44 2464 0050, +91 44 2464 0060.
தலைப்பு செய்திகள்
ட்ரெண்டிங் செய்திகள்
