ஆன்லைன் ரம்மியில் பணத்தை இழந்த காவலர் தற்கொலை முயற்சி.. வேதனையில் குடும்பத்தினர்

செய்திகள் வாயிலாக பல்வேறு விழிப்புணர்வுகளும் ஏற்படுத்தப்பட்டு வருகிறது. 

தற்கொலைக்கு முயன்ற காவலர் ரவி செல்வன்

தமிழகத்தில் ஆன்லைன் ரம்மியில் பலர் விளையாடி வரும் நிலையில் பணத்தை இழந்து கடனாளியாக பலர் தற்கொலை செய்து கொள்ளும் செய்தியும் அவ்வப்போது வருகிறது. குறிப்பாக கடந்த சில நாட்களுக்கு முன்பு சென்னையை சேர்ந்த இளம் பெண் ஒருவர் ஆன்லைன் ரம்மியில் பணத்தை இழந்து தற்கொலை செய்து கொண்ட  சம்பவம் சோகத்தை ஏற்படுத்தியது. செய்திகள் வாயிலாக பல்வேறு விழிப்புணர்வுகளும் ஏற்படுத்தப்பட்டு வருகிறது. 

இந்த சூழலில் நெல்லை மாவட்டம் பழவூர் அருகே உள்ள மாடன் பிள்ளை தர்மத்தை சேர்ந்தவர் சுப்பிரமணி. இவரது மகன் ரவி செல்வன் (40). இவர் அஞ்சுகிராமம் காவல் நிலையத்தில் ஏட்டாக பணிபுரிந்து வருகிறார். இவருக்கு ரம்மி விளையாடுவதில் மிகுந்த ஆர்வம் இருந்ததாக கூறப்படுகிறது, அதோடு  குடிப்பழக்கத்திற்கும் அடிமையாகி உள்ளார். இதனால் ரவி செல்வன் சரிவர வேலைக்கு செல்லாமல் இருந்ததோடு அக்கம் பக்கத்தினரிடம் லட்சக் கணக்கில் கடன் வாங்கி ரம்மி விளையாட்டில் ஈடுபாடு காட்டியதாக தெரிகிறது. இதனால் ரம்மி விளையாட்டில் பணத்தை இழந்த அவர் கடன் தொல்லையால் மிகுந்த விரக்தியில் இருந்ததாக கூறப்படுகிறது. இந்நிலையில் மதுவில் விஷம் கலந்து குடித்த ரவி செல்வன் அப்பகுதியில் உள்ள தோட்டத்தில் மயங்கிய நிலையில் கிடந்து உள்ளார். 

அப்போது அப்பகுதி வழியாக சென்றவர்கள் மயங்கிக் கிடந்த ரவி செல்வன் குறித்து அவரது உறவினர்களுக்கு தகவல் தெரிவித்து உள்ளனர். சம்பவ இடத்திற்கு வந்த உறவினர்கள் அவரை மீட்டு லெவிஞ்சிபுரம் தனியார் ஆஸ்பத்திரியில் சிகிச்சைக்காக சேர்த்தனர். அங்கு அவர் தீவிர சிகிச்சை பிரிவில் அனுமதிக்கப்பட்டு சிகிச்சை பெற்று வருகிறார். இவருக்கு உஷா என்ற மனைவியும் மூன்று பெண் குழந்தைகளும் உள்ளனர், இச்சம்பவம் குறித்து பழவூர் போலீசார் விசாரணை நடத்தி வருகின்றனர். ஆன்லைன் ரம்மியால் பலர் தற்கொலை செய்து வரும் சூழலில் அவர்களது குடும்பங்களும் செய்வதறியாது திகைத்து நிற்கதியாய் நிற்கின்றனர். இந்த நிலையில் ஆன்லைன் ரம்மியை தடை செய்ய வேண்டும் என அரசியல் கட்சிகளும், சமூக ஆர்வலர்களும் தொடர்ந்து கோரிக்கை வைத்து வருகின்றனர். ஆன்லைன் ரம்மியால் பலரது குடும்பங்களும் பாதிக்கப்பட்டு தற்கொலை வரை செல்வதால் தமிழக அரசு உடனே ஆன்லைன் ரம்மியை தடை செய்ய வேண்டும் என்பது பொதுமக்கள் பலரின் கோரிக்கையாக உள்ளது.

தற்கொலை என்பது எதற்கும் முடிவல்ல. மனித உயிரை மாய்த்துக்கொள்வதற்கான உரிமை யாருக்கும் இல்லை. தற்கொலை எண்ணம் மேலிடும் போது உரிய ஆலோசனை பெற்றால் புதிய வாழ்க்கை அவர்களுக்காக காத்துக்கொண்டிருக்கிறது. அதற்காகவே சினேகா போன்ற தன்னார்வ தொண்டு நிறுவனங்கள் சேவை ஆற்றி வருகின்றன. அவர்களை தொடர்பு கொண்டு இலவசமாக ஆலோசனை பெறலாம்.

சினேகா தன்னார்வ தொண்டு நிறுவனம்,
எண்; 11, பார்க் வியூவ் சாலை, ஆர்.ஏ. புரம்,
சென்னை - 600 028.
தொலைபேசி எண் - +91 44 2464 0050,   +91 44 2464 0060.