சூழ்ச்சி, சூது இருக்கிறது... சதி பின்னப்பட்டு வருகிறது... திருமாவளவன் சொன்னது எதற்காக?

தி.மு.க.,வை எப்படியாவது ஒழித்து விட வேண்டும் என்ற என்னும் சக்திகள் திருமாவை ஒரு‌ தூதாக பயன்படுத்தி அதை நிறைவேற்றி விட வேண்டும் என நினைக்கிறார்கள்.

விடுதலை சிறுத்தைகள் கட்சி தலைவர் திருமாவளவன்

Source : whats up

தஞ்சாவூர்: நம்மை பற்றியே பேசுகிறார்கள் என்று மகிழ்ச்சியடைய கூடாது. சூது, சூழ்ச்சி, சதி பின்னப்பட்டு வருகிறது என்று தஞ்சாவூர் மாவட்டம் கும்பகோணத்தில் நடந்த திருமண விழாவில் பங்கேற்ற விடுதலை சிறுத்தைகள் கட்சி தலைவர் திருமாவளவன் தெரிவித்தார். 

தஞ்சாவூர் மாவட்டம் கும்பகோணத்தில் நடைபெற்ற திருமண விழாவில் கலந்து கொண்ட வி.சி.க., தலைவர் திருமாவளவன் பேசியதாவது: முதல்வர் ஸ்டாலினின் நம்பிக்கைக்குரிய பாத்திரமாக இருக்கேன் என்பதே எனக்கு மகிழ்ச்சி.  தற்போது என்னை சுற்றி ஏராளமான விவாதங்கள் நடைபெறுகிறது. நம் மீது வைத்துள்ள மரியாதைக்காக இல்லை. நம்மை எப்படியாவது காலி செய்து விட வேண்டும் என்ற சக்திகளின் சதி அது.

நம்மைப் பற்றியே பேசிக் கொண்டே இருக்கிறார்கள் என்று மகிழ்ச்சி அடையவதற்கு இல்லை. அதில் சூது இருக்கிறது. சூழ்ச்சி இருக்கிறது. சதி பின்னப்பட்டு வருகிறது. அவர்களின் உண்மையான குறி தி.மு.க., தான். திருமாவளவன் இல்லை.

தி.மு.க.,வை எப்படியாவது ஒழித்து விட வேண்டும் என்ற என்னும் சக்திகள் திருமாவை ஒரு‌ தூதாக பயன்படுத்தி அதை நிறைவேற்றி விட வேண்டும் என நினைக்கிறார்கள். அதற்கு பலியாகும் அளவிற்கு திருமாவளவன் பலவீனமானவன் இல்லை. ஏதோ அழுத்தம் அச்சுறுத்தல் என்கிறார்கள். என்னுடன் நெருங்கி பழகியவர்களுக்கு தெரியும். ஏன் இதை திரும்பத் திரும்ப நான் சொல்கிறேன் என்றால். எனது நம்பகத்தன்மை மீதே கை வைக்கிறார்கள்.

திருமாவளவன் இங்கு பேசிக்கொண்டு, அங்கு ஏதோ வேலை செய்கிறார் என்கிறார்கள். அந்த அரசியல் எனக்கு தெரியாது. அந்த அரசியல்  தேவையில்லை. அப்படி ஒரு தாக்குதல் என் மீது நடத்தப்படுகிறது திமுகவுடன் பேசிக்கொண்டு மறைமுகமாக பேச்சுவார்த்தை போய்க்கொண்டிருக்கிறதோ என்ற ஒரு சந்தேகத்தை என் மீது எழுப்புகிறார்கள். என்னை நம்பக்கூடிய என் தோழர்களுக்கு பதில் சொல்ல வேண்டிய கடமை இருக்கிறது. 

விடுதலை சிறுத்தைகள் கட்சி எப்போதும் சனாதனத்திற்கு எதிராக இருக்கும். எந்த சூழ்நிலையிலும் எங்கள் நலன் பெரிது என்று சனாதனம் உள்ள அணிக்கு ஒரு போதும் இடம் கொடுக்கமாட்டோம். அதனால் எவ்வளவு பெரிய பாதிப்பு ஏற்பட்டாலும் எவ்வளவு பெரிய பேரிழப்பு ஏற்பட்டாலும் அது தாங்கிக் கொள்ள வலிமை விசிகவிற்கு உண்டு. இவ்வாறு அவர் பேசினார்.

நூல் வெளியீட்டு விழாவில் தவெக தலைவர் விஜய் பங்கேற்றார். ஆனால் இந்த நிகழ்ச்சியில் பங்கேற்க இருந்த திருமாவளவன் பங்கேற்கவில்லை. அந்த விழாவில் விஜய் பேசும்போது கூட்டணி கட்சி அழுத்தத்தால் திருமாவளவன் பங்கேற்கவில்லை என்று விமர்சனம் செய்தார். மேலும் விசிகவை ஆதவ் அர்ஜூனா முதல்வர் ஸ்டாலின், துணை முதல்வர் உதயநிதி ஆகியோரை தாக்கி பேசியதும் அரசியல் அரங்கில் பரபரப்பை ஏற்படுத்தியது.  தொடர்ந்து ஆதவ் அர்ஜூனா கட்சியிலிருந்து சஸ்பெண்ட் செய்யப்பட்டார். இருப்பினும் விசிகவை சுற்றி ஏராளமான விமர்சனங்கள் எழுந்தபடியே இருந்தது. இதற்கிடையில் முதல்வர் ஸ்டாலினையும் சந்தித்து பேசினார் திருமாவளவன். இருப்பினும் கடந்த சில நாட்களாக விசிகவை சுற்றி பல்வேறு விவாதங்களும், விமர்சனங்களும் எழுந்தபடியே இருந்தது.

இந்நிலையில் கட்சியிலிருந்து என்னை ஆறு மாதம் இடை நீக்கம் செய்யப்பட்டிருக்கும் நிலையில், வீணான விவாதங்களுக்கு வழிவகுக்க கூடாது என்று எண்ணுகிறேன். என்னைப் பற்றிய தேவையற்ற விவாதங்கள் பொதுவெளியில் தொடராமல் இருக்க வேண்டும் என்ற நோக்கில் விடுதலைச் சிறுத்தைகள் கட்சியிலிருந்து முழுமையாக என்னை விடுவித்துக் கொள்கிறேன் என்று ஆதவ் அர்ஜூனா அறிக்கை வெளியிட்டுள்ளதும் குறிப்பிடத்தக்கது.