இனிமே இவங்க பாத்துப்பாங்க..! 12 மாவட்டங்களுக்கு கண்காணிப்பு அதிகாரிகள் நியமனம் - தமிழக அரசு உத்தரவு

தமிழ்நாட்டின் 12 மாவட்டங்களுக்கான கண்காணிப்பு அதிகாரிகளை நியமித்து தலைமை செயலாளர் இறையன்பு உத்தரவிட்டுள்ளார்.

கண்காணிப்பு அதிகாரிகள் நியமனம்

தமிழ்நாட்டின் 12 மாவட்டங்களுக்கான கண்காணிப்பு அதிகாரிகளை நியமித்து தலைமை செயலாளர் இறையன்பு உத்தரவிட்டுள்ளார். அதன்படி, கோவை உள்ளிட்ட மாவட்டங்களுக்கு புதிய அதிகாரிகள் நியமனம் செய்யப்பட்டுள்ளனர்.

கண்காணிப்பு அதிகாரிகள்:

தமிழக அரசால் நியமிக்கப்படும் இந்த கண்காணிப்பு அதிகாரிகள், அரசின் சிறு, குறு மற்றும் நடுத்தர தொழில்கள் துறை, டிட்கோ நிர்வாகம், நெடுஞ்சாலைகள் துறை, ஊரக வளர்ச்சித் துறை, சுகாதார திட்டம், நகர்ப்புற வாழ்விட மேம்பாட்டு வாரியம், மக்கள் நல்வாழ்வுத் துறைகளை சேர்ந்த பல்வேறு திட்டங்களில் வளர்ச்சிப் பணிகளை மேற்கொள்வர். அரசு திட்டங்கள் எவ்வாறு செயல்படுத்தப்படுகிறது மற்றும் முறையாக செயல்படுத்தப்படுகிறதா எனவும் கண்காணிப்பர். மாநிலத்தில் உள்ள 38 மாவட்டங்களில், சென்னையை தவிர்த்த 25 மாவட்டங்களுக்கு ஏற்கனவே கண்காணிப்பு அதிகாரிகள் நியமனம் செய்யப்பட்டுள்ளனர். அதைதொடர்ந்து தற்போது, மீதமுள்ள 12 மாவட்டங்களுக்கும் கண்காணிப்பு அதிகாரிகளை நியமித்து தலைமைச் செயலாளர் இறையன்பு உத்தரவிட்டுள்ளார்.

எந்தெந்த மாவட்டங்களுக்கு அதிகாரிகள் நியமனம்?

தலைமை செயலாளரின் அறிக்கையின்படி, அரியலூர், கோவை, கள்ளக்குறிச்சி, காஞ்சிபுரம், நாகை, நாமக்கல், புதுக்கோட்டை, ராமநாதபுரம், ராணிப்பேட்டை, சேலம், திருப்பத்தூர் மற்றும் திருப்பூர் ஆகிய மாவட்டங்களுக்கு புதிய அதிகாரிகள் நியமனம் செய்யப்பட்டுள்ளனர்.

யார் இந்த அதிகாரிகள்;

புதுக்கோட்டை மாவட்டத்திற்கு நில நிர்வாக ஆணையர் எஸ்.நாகராஜன், ராமநாதபுரம் மாவட்டத்திற்கு  மனிதவள மேலாண்மைத்துறை செயலர் நந்தகுமார், ராணிப்பேட்டை மாவட்டத்திற்கு தேசிய சுகாதார இயக்க திட்ட இயக்குநர்  ஷில்பா பிரபாகர் ஆகியோர் கண்காணிப்பு அதிகாரிகளாக நியமனம் செய்யப்பட்டுள்ளனர். அதேபோன்று,  சேலம் மாவட்டத்திற்கு நகர்ப்புற வாழ்விட மேம்பாட்டு வாரியத்தின் நிர்வாக  இயக்குநர்  சங்கரும், திருப்பத்தூர் மாவட்டத்திற்கு மக்கள் நல்வாழ்வுத்துறை முதன்மைச் செயலாளர் ககன்தீப் சிங் பேடியும், திருப்பூர் மாவட்டத்திற்கு டான்சி நிர்வாக இயக்குநர் விஜயகுமாரும் கண்காணிப்பு அதிகாரிகளாக நியமனம் செய்யப்பட்டுள்ளனர் என்பது குறிப்பிடத்தக்கது.

மேலும், அரியலூர் மாவட்டத்திற்கு சிறு, குறு மற்றும் நடுத்தர தொழில் துறை செயலாளர் அருள்ராஜ், கோவை மாவட்டத்திற்கு சிப்கோ நிர்வாக இயக்குனர் ஜெயஸ்ரீ, கள்ளக்குறிச்சி மாவட்டத்திற்கு லலித் யாதவ், காஞ்சிபுரம் மாவட்டத்திற்கு ஊரக வளர்ச்சி துறை செயலாளர் செந்தில் குமார், நாகப்பட்டினம் மாவட்டத்திற்கு எரிசக்தித்துறை செயலாளர் ரமேஷ்சந்த் மீனா, நாமக்கல் மாவட்டத்திற்கு தகவல் தொழில்நுட்பவியல் செயலாளர்  குமரகுருபன் ஆகியோரை, மாவட்ட வாரியான கண்காணிப்பு அதிகாரிகளாக நியமனம் செய்து தலைமைச் செயலாளர் உத்தரவிட்டுள்ளார்.

”எல்லாருக்கும் எல்லாமும்”

அனைத்து மாவட்டங்களுக்கும் சீரான மற்றும் சமமான வளர்ச்சி, அனைத்து பகுதி மக்களுக்கும்  தேவையான அடிப்படை உட்கட்டமைப்பு வசதிகளை மேம்படுத்த தமிழக அரசு பல்வேறு நலத்திட்டங்களை செயல்படுத்தி வருகிறது. அந்த திட்டங்களை முறையாக செயல்படுத்தவும் கண்காணிக்கவும்  தான், மாவட்ட வாரியாக இந்த கண்காணிப்பு அதிகாரிகள் நியமிக்கப்பட்டுள்ளனர்.