kumari To Kashmir Train: கோடை வெயில் வாட்டுதா? குமரி டூ காஷ்மீர்.. 130 கிமீ வேகம், இனி ஒரே ரயில், ரூ.1000 போதும், குளுகுளு சம்மர் ட்ரிப்

kumari To Kashmir Train: தமிழ்நாட்டின் சென்னையில் இருந்து நேரடியாக காஷ்மீருக்கு இயக்கப்பட உள்ள, புதிய ரயில் சேவை குறித்து இந்த தொகுப்பில் அறியலாம்.

குமரி டூ காஷ்மீர் நேரடி ரயில் சேவை

Source : twitter@theupindex / abp special arrangement

kumari To Kashmir Train: தமிழ்நாட்டின் சென்னையில் இருந்து நேரடியாக காஷ்மீருக்க இயக்க வாய்ப்புள்ளதாக கூறப்படும் ரயில் டிக்கெட் குறைந்தபட்சம் ரூ.1000 மட்டுமே இருக்கும் என கூறப்படுகிறது.

காஷ்மீருக்கான ரயில் பயணம்:

தமிழ்நாட்டைச் சேர்ந்த ரயில் பயணிகள், சுற்றுலாப் பயணிகள் மற்றும் யாத்ரீகர்கள், வெகு விரைவில் காஷ்மீரின் அழகிய பள்ளத்தாக்குகளுக்கு மலிவு விலையில் மற்றும் தடையற்ற ரயில் பயணத்தை மேற்கொள்ள முடியும். இந்தியாவின் தெற்குப் பகுதி நகரமான கன்னியாகுமரி அல்லது இந்திய தீபகற்பத்தின் முனையான ராமேஸ்வரத்தை ஜம்மு-காஷ்மீரின் கோடைகால தலைநகரான ஸ்ரீநகருடன் இணைக்கும் அம்ரித் பாரத் எக்ஸ்பிரஸை அறிமுகப்படுத்த தெற்கு ரயில்வே திட்டமிட்டுள்ளது. புதிய ரயில் சேவை 4,000 கிலோமீட்டருக்கும் அதிகமான நீளத்திற்கு இயங்கும்.

புதிய ரயில் பாதை:

272 கிமீ உதம்பூர்-ஸ்ரீநகர்-பாரமுல்லா ரயில் இணைப்பு (USBRL) திட்டத்தின் கடைசி கட்டமான 111 கிமீ கத்ரா-பனிஹால் பிரிவு அடுத்த மாதம் திறக்கப்பட உள்ள நிலையில் இந்த திட்டம் முன்னெடுக்கப்பட்டுள்ளது. தற்போது, ​​தமிழ்நாட்டிலிருந்து செல்லும் சுற்றுலாப் பயணிகள் காஷ்மீரை அடைய சாலை அல்லது விமானம் மட்டுமே ஒரே வாய்ப்பாக இருந்தது குறிப்பிடத்தக்கது.

ஜம்மு தாவியிலிருந்து பாரமுல்லா வரையிலான 327 கிலோமீட்டர் நீளமுள்ள புதிய ஒற்றை ரயில் பாதை, உதம்பூர், கத்ரா, பனிஹால், காசிகுண்ட் மற்றும் ஸ்ரீநகர் வழியாகச் சென்று, நாட்டின் பிற பகுதிகளிலிருந்து காஷ்மீர் பள்ளத்தாக்குக்கு நேரடி ரயில் இணைப்பை வழங்கும்.

அம்ரித் பாரத் எக்ஸ்பிரஸ்:

அம்ரித் பாரத் ரேக் அதிவேக புஷ்-புல் உள்ளமைவைக் கொண்டுள்ளது, இரு முனைகளிலும் இன்ஜின்கள் பொருத்தப்பட்டுள்ளன, மணிக்கு 130 கிமீ வேகத்தை எட்டும் திறன் கொண்டது. ஏசி இல்லாத வந்தே பாரத் போன்ற வசதியை வழங்கும் வகையில் இது வடிவமைக்கப்பட்டுள்ளது. கன்னியாகுமரி அல்லது ராமேஸ்வரத்திலிருந்து ஸ்ரீநகர்/பாரமுல்லாவிற்கு ரயில் இணைப்பை வழங்க முடிவு செய்யப்பட்டுள்ளது. ஏற்கனவே டெல்லியில் இருந்து ஸ்ரீநகருக்கு வந்தே பாரத் சோதனை ஓட்டம் சமீபத்தில் நடத்தப்பட்டது. இந்நிலையில், கன்னியாகுமரி/ராமேஸ்வரத்திலிருந்து ஸ்ரீநகருக்கு அம்ரித் பாரத் எக்ஸ்பிரஸ் அறிமுகப்படுத்துவது குறித்த முடிவு, பாதை திறக்கப்பட்டதும் இறுதி செய்யப்படும் என்று ரயில்வே வட்டாரங்கள் தெரிவிக்கின்றன.

அம்ரித் பாரத் எக்ஸ்பிரஸ் ரயிலில் உள்ள வசதிகள்

கடந்த ஆண்டு அறிமுகப்படுத்தப்பட்ட அம்ரித் பாரத் எக்ஸ்பிரஸ், 12 ஸ்லீப்பர் பெட்டிகள், எட்டு பொது பெட்டிகள் மற்றும் இரண்டு லக்கேஜ் பெட்டிகள் உட்பட 22 பெட்டிகளைக் கொண்டுள்ளது. 12 முக்கிய மேம்படுத்தல்களுக்கு உட்பட்ட அம்ரித் பாரத் ரேக்கின் முன்மாதிரி, கடந்த ஜனவரி மாதம் சென்னையில் உள்ள ஒருங்கிணைந்த பெட்டி தொழிற்சாலையில் (ICF) வெளியானது குறிப்பிடத்தக்கது.

முக்கிய மேம்பாடுகளில் அரை தானியங்கி இணைப்புகள், மாடுலர் கழிப்பறைகள், பணிச்சூழலியல் இருக்கைகள் மற்றும் பெர்த்கள், அவசரகால டாக்-பேக் சிஸ்டம்ஸ் மற்றும் வந்தே பாரத் ரயில்களைப் போன்ற தொடர்ச்சியான விளக்கு அமைப்பு ஆகியவை உள்ளன. கூடுதலாக, ரயில் தடம் புரள்தல் அல்லது விபத்துகள் போன்ற அவசரநிலைகளின் போது பயணிகளின் பாதுகாப்பு மற்றும் வசதியை உறுதி செய்வதற்காக மேம்பட்ட பேன்ட்ரி கார் வடிவமைப்புகள், தொழில்நுட்ப அடிப்படையிலான நீர் நிலை குறிகாட்டிகள் மற்றும் வெளிப்புற அவசர விளக்குகள் ஆகியவற்றைக் கொண்டுள்ளது.

130 கி.மீ., வேகத்தில் பயணம்:

அம்ரித் பாரத் எக்ஸ்பிரஸ் அதிக நெரிசல் மிகுந்த பாதைகளில் இயக்கப்படும், குறிப்பாக புலம்பெயர்ந்த தொழிலாளர்களுக்கு மாநிலங்களுக்கு இடையேயான இணைப்பை மேம்படுத்தும் வகையில் இயக்கப்பட உள்ளது. தெற்கு ரயில்வேக்கு அம்ரித் பாரத் ரயிலின் இரண்டு ரேக்குகள் ஒதுக்கப்பட்டுள்ளன, முதலாவது ஷாலிமார் வழித்தடத்தில் அறிமுகப்படுத்தப்படும், இரண்டாவது ரேக்கின் பாதை இன்னும் இறுதி செய்யப்படவில்லை.

இதனிடையே, காசியாபாத்தின் லோகோ ஷெட்டில் (வடக்கு ரயில்வே) இருந்து நான்கு WAP-5 இன்ஜின்களை ராயபுரம் மின்சார லோகோ ஷெட்டுக்கு மாற்ற ரயில்வே வாரியம் கடந்த மாதம் உத்தரவிட்டது குறிப்பிடத்தக்கது. மணிக்கு 160 கிமீ வேகத்தில் இயங்கும் திறன் கொண்ட இந்த இன்ஜின்கள் மணிக்கு 130 கிமீ வேகத்தில் இயங்க அனுமதி அளிக்கப்பட்டுள்ளது.

சென்னை டூ காஷ்மீர்: கட்டணம் எவ்வளவு?

தற்போது, ​​கன்னியாகுமரியிலிருந்து கத்ரா வரை இயக்கப்படும் ஹிம்சாகர் எக்ஸ்பிரஸ், 3,785 கிலோமீட்டர் தூரத்தைக் கடந்து, வைஷ்ணவ தேவி கோயிலுக்கு வருகை தரும் யாத்ரீகர்களுக்கு பிரதான தேர்வாக உள்ளது. இந்த ரயிலின் ஸ்லீப்பர் கோட்ச் கட்டணம் குறைந்தபட்சம் ரூ.820 ஆக உள்ளது. இதனை கருத்தில் கொண்டால், புதிய அம்ரித் பாரத் எக்ஸ்பிரஸில் சென்னையில் இருந்து காஷ்மீர் பள்ளத்தாக்கிற்கு பயணிக்க சுமார் ரூ.1000 கட்டணமாக நிர்ணயிக்கப்படலாம் என கருதப்படுகிறது. இது அங்கு சுற்றுலா பயணங்களுக்கு திட்டமிடும் பொதுமக்களுக்கு வரப்பிரசாதமாக அமையும் என நம்பப்படுகிறது.