Online game: ஆன்லைன் சூதாட்ட தடை சட்டத்திற்கு எதிரான வழக்கு... நீதிமன்றம் சரமாரி கேள்வி? தடை நீக்கப்படுமா?

ஆன்லைன் சூதாட்டத்திற்கு எதிரான தடை சட்டத்தை தமிழக அரசு இயற்றியதில் என்ன தவறு என சென்னை உயர்நீதிமன்றம் கேள்வி எழுப்பியுள்ளது. 

சென்னை உயர்நீதிமன்றம்

ஆன்லைன் சூதாட்டத்திற்கு எதிரான தடை சட்டத்தை தமிழக அரசு இயற்றியதில் என்ன தவறு என சென்னை உயர்நீதிமன்றம் கேள்வி எழுப்பியுள்ளது. 

ஆன்லைன் சூதாட்ட தடை சட்டத்தை நீக்க கோரி விளையாட்டு நிறுவனங்கள் தொடந்த வழக்கு இன்று சென்னை உயர்நீதிமன்றத்தில் விசாரணைக்கு வந்தது. வழக்கை விசாரித்த நீதிமன்றம், ஆன்லைன் சூதாட்டத்திற்கு எதிரான தடை சட்டத்தை தமிழக அரசு இயற்றியதில் என்ன தவறு என கேள்வி எழுப்பியுள்ளது. சூதாட்டத்தில் ஏற்படும் மரணங்கள் குடும்ப வறுமை ஆகியவற்றை தடுக்கவே இந்த மசோதா அமல்படுத்தப்பட்டுள்ளதாகவும் நீதிமன்றம் தெரிவித்துள்ளது. தன் மக்களை காக்கவே சட்டம் இயற்றியுள்ளதாக அரசு கூறியதாக கூறிய நீதிபதிகள், தமிழ்நாட்டில் குதிரைபந்தயம், லாட்டரி ஆகியவை தடை செய்யப்பட்டுள்ளதை தெரிந்து கொள்ளுங்கள் என விளையாட்டு நிறுவனங்களுக்கு நீதிமன்றம் அறிவுறுத்தியுள்ளது.  இந்த வழக்கு தொடர்பாக தமிழக அரசு பதிலளிக்க உத்தரவிட்ட உயர்நீதிமன்றம், அரசு பதிலளித்த பிறகே இடைக்கால உத்தரவு குறித்து முடிவெடுக்க முடியும் என்று தெரிவித்தது. மேலும் வழக்கு விசாரணை ஜூன் இரண்டாவது வாரத்திற்கு ஒத்தி வைக்கப்பட்டது. 

முன்னதாக ,தமிழக அரசு 2022-ல் ஆன்லைன் சூதாட்ட தடை மற்றும் ஆன்லைன் விளையாட்டுகள் முறைப்படுத்தல் சட்டத்தை இயற்றி, ஆளுநரின் ஒப்புதலுக்கு அனுப்பி வைத்தது. ஆனால், ஆளுநர் அதற்கு ஒப்புதல் அளிக்காமல் அரசுக்கு திருப்பி அனுப்பினார்.  மீண்டும் இயற்றப்பட்ட ஆன்லைன் சூதாட்ட தடைச் சட்டத்திற்கு, ஆளுநர் கடந்த ஏப்ரல் 7-ஆம் தேதி ஒப்புதல் அளித்தார்.

இந்நிலையில், இந்த சட்டத்தை எதிர்த்து 69 ஆன்லைன் விளையாட்டு நிறுவனங்களை உறுப்பினர்களாகக் கொண்ட, அகில இந்திய விளையாட்டு கூட்டமைப்பு சார்பில் சென்னை உயர் நீதிமன்றத்தில் வழக்குத் தொடரப்பட்டது.

அதில், தமிழக அரசின் தடை சட்டத்தால் கூட்டமைப்பின் உறுப்பினர்கள் தமிழகம் மட்டுமின்றி, நாடு முழுவதும் பாதிப்புகளை எதிர்கொண்டு வருவதாகவும், ஆளுநர் ஒப்புதல் அளிப்பதற்கு முந்தைய நாளான ஏப்ரல் 6-ஆம் தேதி மத்திய அரசின் தகவல் தொழில்நுட்பத் துறை, ஆன்லைன் விளையாட்டுகளை முறைப்படுத்துவதற்கான திருத்த விதிகளை அறிவித்துள்ளதாகவும் குறிப்பிடப்பட்டிருந்தது.

ஆன்லைன் விளையாட்டுகளுக்கு அடிமையாகி இளைஞர்கள் விபரீத முடிவுகளை எடுப்பதற்கும், உடல்நலக் குறைவு ஏற்படுவதற்கும் அறிவியல்பூர்வமான ஆய்வுகள் எதையும் குறிப்பிடவில்லை என்றும் 18 வயதுக்கு உட்பட்டவர்கள் விளையாட அனுமதிப்பதில்லை என்றும் தெரிவிக்கப்பட்டிருந்தது. மேலும், ஆன்லைன் விளையாட்டுகளை முறைப்படுத்துவதற்கான சட்டம் இயற்ற நாடாளுமன்றத்துக்கு மட்டுமே அதிகாரம் உள்ளது. தமிழக அரசுக்கு சட்டம் இயற்ற அதிகாரம் இல்லை.

ஏற்கனவே உயர் நீதிமன்றத்தால் ரத்து செய்யப்பட்ட சட்டத்தை, தமிழக அரசு மீண்டும் இயற்றி உள்ளது. திறமைக்கான விளையாட்டு எது, அதிர்ஷ்ட வாய்ப்பளிக்கும் விளையாட்டு எது என்பதை வேறுபடுத்தாமல்,  பொதுவாக ஆன்லைன் விளையாட்டுக்கு தடை விதிக்கப்பட்டது சட்டவிரோதமானது.

எனவே, இந்த சட்டத்தை அமல்படுத்த தடை விதிக்க வேண்டும் என அகில இந்திய விளையாட்டு கூட்டமைப்பு சார்பில் சென்னை உயர்நீதிமன்றத்தில் வழக்குத் தொடரப்பட்டது.