காதல் வலையில் கறுப்பு ஆடு! – கூகுள் பே மூலம் 12 லட்சம் சுருட்டல்! திண்டிவனத்தில் நடந்த திருமணப் பேரதிர்ச்சி!

மருத்துவர், இன்ஜினியர் எனப் பல வேஷம்: திருமண மோசடி மன்னன் சிக்கினான்! 20 பெண்களிடம் ரூ. 20 லட்சம் பறித்த ‘ரோமியோ’ கைது

அருள்மொழி

Source : X

விழுப்புரம் : திருமணத் தகவல் மையம் மூலமாகப் பல பெண்களைத் தொடர்பு கொண்டு, மருத்துவர், பொறியாளர் எனப் பல்வேறு மாறுவேடங்களில் நடித்து சுமார் 20 லட்சம் ரூபாய் மோசடி செய்த சென்னை இளைஞரை திண்டிவனம் போலீசார் கைது செய்தனர்.

திண்டிவனம் பெண்ணிடம் ரூ. 12 லட்சம் மோசடி

திருமணத் தகவல் மையம் மூலமாகப் பல பெண்களைத் தொடர்பு கொண்டு, மருத்துவர், பொறியாளர் எனப் பல்வேறு மாறுவேடங்களில் நடித்து சுமார் 20 லட்சம் ரூபாய் மோசடி செய்த சென்னை இளைஞரை, விழுப்புரம் மாவட்டத்தின் திண்டிவனம் போலீசார் கைது செய்து சிறையில் அடைத்தனர். அவரிடம் இருந்து ஐபோன் மற்றும் இருசக்கர வாகனம் பறிமுதல் செய்யப்பட்டது.

விழுப்புரம் மாவட்டம், திண்டிவனம் அருகேயுள்ள ஒரு கிராமத்தைச் சேர்ந்த இளம்பெண் ஒருவர், தனக்குத் திருமணம் செய்வதற்காகப் பிரபல திருமணத் தகவல் மையம் (மேட்ரிமோனி) ஒன்றில் பதிவு செய்திருந்தார். இதன் மூலம், சென்னை பூந்தமல்லி பகுதியைச் சேர்ந்த அருள்மொழி என்ற இளைஞர் அந்தப் பெண்ணைத் தொடர்பு கொண்டுள்ளார்.

அருள்மொழி, அப்பெண்ணுடன் பேசியதோடு, திருமணம் செய்துகொள்வதாக ஆசை வார்த்தைகளைக் கூறிப் பழகி வந்துள்ளார். படிப்படியாக நம்பிக்கையைப் பெற்ற அவர், பல்வேறு காரணங்களைக் கூறி அந்த இளம்பெண்ணிடம் கூகுள் பே (Google Pay) மூலம் 12 லட்சம் ரூபாய் வரை பணம் பெற்றுள்ளார். ஆனால், பணத்தைப் பெற்ற பிறகு திருமணம் செய்யாமல் நீண்ட நாட்களாக ஏமாற்றி வந்துள்ளார்.

டி.எஸ்.பி. அலுவலகத்தில் புகார் – அதிரடி கைது

இதனால் தான் ஏமாற்றப்பட்டதை உணர்ந்த பாதிக்கப்பட்ட இளம்பெண், திண்டிவனம் துணை காவல் கண்காணிப்பாளர் (டி.எஸ்.பி.) அலுவலகத்தில் முறைப்படி புகார் அளித்தார். புகாரின் பேரில் வழக்குப் பதிவு செய்த திண்டிவனம் போலீசார், திருமணம் செய்வதாக ஆசை வார்த்தை கூறிப் பண மோசடி செய்த அருள்மொழியை தீவிர விசாரணைக்குப் பிறகு சென்னையில் வைத்து அதிரடியாகக் கைது செய்தனர்.

விசாரணையில் வெளியான அதிர்ச்சித் தகவல்கள்

கைது செய்யப்பட்ட அருள்மொழியிடம் போலீசார் தீவிர விசாரணை மேற்கொண்டனர். அந்த விசாரணையில் வெளியான தகவல்கள் அனைவரையும் அதிர்ச்சிக்குள்ளாக்கியது. அருள்மொழிக்கு ஏற்கனவே திருமணமாகி, இரண்டு மனைவிகள் மற்றும் பிள்ளைகள் இருப்பது தெரியவந்தது. இவர், மேட்ரிமோனி திருமணத் தகவல் மையம் மூலமாகத் தமிழ்நாட்டின் பல்வேறு பகுதிகளைச் சேர்ந்த 20க்கும் மேற்பட்ட பெண்களைத் திருமணம் செய்வதாகக் கூறி ஏமாற்றியுள்ளார்.
அருள்மொழியின் செல்போனை போலீசார் ஆய்வு செய்தனர். அதில், இவர் ஒவ்வொரு பெண்ணிடமும் பேசும்போதும், தன்னை மருத்துவர், இன்ஜினியர் எனப் பல்வேறு விதமான கெட்டப்புகளில் புகைப்படம் எடுத்து, நம்ப வைத்துப் பழகியது கண்டுபிடிக்கப்பட்டது.

இவ்வாறு ஏமாற்றியதன் மூலம், பல பெண்களிடம் பணம், நகை என மொத்தமாக 20 லட்சம் ரூபாய் வரை அவர் மோசடி செய்துள்ளார். மோசடியில் ஈடுபட்ட அருள்மொழியைத் தொடர்ந்து, போலீசார் அவரிடமிருந்த ஐபோன் மற்றும் இருசக்கர வாகனம் போன்றவற்றைப் பறிமுதல் செய்தனர். பின்னர், அருள்மொழியை நீதிமன்றத்தில் ஆஜர்படுத்திச் சிறையில் அடைத்தனர்.

போலீசாரின் எச்சரிக்கை

இது போன்ற திருமண மோசடி கும்பல்களிடம் பெண்கள் மிகவும் எச்சரிக்கையுடன் இருக்க வேண்டும் எனத் திண்டிவனம் போலீசார் வலியுறுத்தியுள்ளனர். அறிமுகமில்லாத நபர்கள் அதிக பணம் கேட்கும்போதோ, அவசரத் தேவைகளைக் கூறி வற்புறுத்தும்போதோ, பெண்களின் பெற்றோர்கள் மற்றும் உறவினர்கள் கூடுதல் கவனம் செலுத்தி, அவர்களின் பின்னணியைச் சரிபார்த்த பின்னரே முடிவெடுக்க வேண்டும் என்றும் போலீசார் அறிவுறுத்தியுள்ளனர்.