பயணிகளுக்கு மகிழ்ச்சி செய்தி: ஊருக்கு போறீங்களா.? சென்னையில் 880 சிறப்பு பேருந்துகள் இயக்கம்...

தமிழ்நாடு அரசு விரைவு போக்குவரத்து கழகம் சார்பில் வார இறுதி நாட்களை முன்னிட்டு சிறப்பு பேருந்துகள் இயக்கம்.

சிறப்பு பேருந்துகள் இயக்கம்

Source : ABP NADU

சென்னை: தமிழ்நாடு அரசு விரைவு போக்குவரத்து கழகம் சார்பில் வார இறுதி நாட்களை முன்னிட்டு சிறப்பு பேருந்துகள் இயக்கம்.

சிறப்பு பேருந்துகள் இயக்கம்

தீபாவளி, பொங்கல் போன்ற பண்டிகை காலங்களில் அரசுப் போக்குவரத்துக் கழகங்கள் சிறப்புப் பேருந்துகளை இயக்குவது வழக்கம். அதேபோல், அடுத்த சில நாட்களுக்குப் பயணிகள் வசதிக்காக, தமிழகத்தின் முக்கிய நகரங்களுக்கு அரசு விரைவுப் போக்குவரத்துக் கழகம் (SETC) சார்பில் மொத்தம் 880 சிறப்புப் பேருந்துகள் இயக்கத் திட்டமிடப்பட்டுள்ளது.

கிளாம்பாக்கத்தில் இருந்து முக்கிய நகரங்களுக்கு சிறப்புப் பேருந்துகள் சென்னை கிளாம்பாக்கம் (KCBT) புதிய பேருந்து நிலையத்தில் இருந்து தமிழகத்தின் முக்கிய மாவட்டங்களுக்கு இயக்கப்படும் சிறப்புப் பேருந்துகள் குறித்த விவரங்கள் வெளியிடப்பட்டுள்ளன:

• நாளை (நவம்பர் 14): மொத்தம் 340 பேருந்துகள் இயக்கப்பட உள்ளன.
• நாளை மறுநாள் (நவம்பர் 15): மொத்தம் 350 பேருந்துகள் இயக்கப்பட உள்ளன.

பேருந்துகள் இயக்கப்படும் முக்கிய இடங்கள்:

• திருவண்ணாமலை
• திருச்சி
• கும்பகோணம்
• மதுரை
• திருநெல்வேலி
• நாகர்கோவில்
• கன்னியாகுமரி
• தூத்துக்குடி
• கோயம்புத்தூர்
• சேலம்
• ஈரோடு
• திருப்பூர்

கோயம்பேடு, மாதவரத்தில் இருந்து சிறப்புச் சேவைகள்

கோயம்பேடு (CMBT) மற்றும் மாதவரம் பேருந்து நிலையங்களில் இருந்தும் குறிப்பிட்ட வழித்தடங்களுக்கு சிறப்புப் பேருந்துகள் இயக்கப்பட உள்ளன.

பிற மாநிலங்களில் இருந்தும் 100 சிறப்புப் பேருந்துகள்

பெங்களூரு, திருப்பூர், ஈரோடு மற்றும் கோயம்புத்தூர் ஆகிய முக்கிய நகரங்களில் இருந்தும் தமிழ்நாட்டின் பல்வேறு இடங்களுக்கு மொத்தம் 100 சிறப்புப் பேருந்துகள் இயக்கத் திட்டமிடப்பட்டுள்ளது. இது பயணிகள் தங்கள் ஊர்களுக்குச் சென்று திரும்புவதற்கு வசதியாக இருக்கும்.

ஞாயிறு அன்று பெங்களூருக்கு திரும்ப சிறப்பு ஏற்பாடு

வருகிற நவம்பர் 16-ஆம் தேதி (ஞாயிற்றுக்கிழமை) அன்று விடுமுறை முடிந்து பெங்களூரு திரும்பும் பயணிகளின் வசதிக்காக, தமிழகத்தின் அனைத்து முக்கிய நகரங்களில் இருந்தும் பயணிகளின் தேவைக்கேற்ப கூடுதல் சிறப்புப் பேருந்துகள் இயக்கப்படும் எனவும் அரசு விரைவுப் போக்குவரத்துக் கழகம் தெரிவித்துள்ளது.

முன்பதிவு நிலவரம் 

இந்த சிறப்புப் பேருந்துகளில் பயணம் செய்யப் பயணிகள் ஆர்வத்துடன் முன்பதிவு செய்து வருகின்றனர். முன்பதிவு விவரம் பின்வருமாறு:

• நாளை (நவம்பர் 14): 7,227 பயணிகள்.
• நாளை மறுநாள் (நவம்பர் 15): 2,975 பயணிகள்.
• ஞாயிறு (நவம்பர் 16): 7,563 பயணிகள்.

இந்த எண்ணிக்கை மேலும் அதிகரிக்கும் வாய்ப்புள்ளதால், தொலைதூரப் பயணம் மேற்கொள்ள இருக்கும் பயணிகள், கூட்ட நெரிசலைத் தவிர்க்கும் பொருட்டு உடனடியாகத் தங்களது பயணத்திற்கு www.tnstc.in என்ற இணையதளம் அல்லது மொபைல் செயலி மூலம் முன்பதிவு செய்து பயணிக்கலாம் என அரசு விரைவுப் போக்குவரத்துக் கழகம் கேட்டுக் கொண்டுள்ளது. இந்தச் சிறப்புப் பேருந்து ஏற்பாடு மூலம் ஆயிரக்கணக்கான பயணிகள் சிரமமின்றிப் பயணம் செய்ய முடியும் என எதிர்பார்க்கப்படுகிறது.