TN Weather Update: தமிழ்நாட்டில் 6 மாவட்டங்களுக்கு கனமழை எச்சரிக்கை.. எந்தெந்த மாவட்டங்களில்? இன்றைய வானிலை நிலவரம் இதோ..

தமிழ்நாட்டில் இன்று நீலகிரி, கோவை உள்ளிட்ட 6 மாவட்டங்களில் கன மழை பெய்யும் என வானிலை ஆய்வு மையம் தெரிவித்துள்ளது.

தமிழகத்தில் மழை (கோப்பு புகைப்படம்)

தென் இந்திய பகுதிகளின் மேல் நிலவும் வளி மண்டலத்தின் கீழடுக்குகளில் கிழக்கு திசை காற்றும், மேற்கு திசை காற்றும் சந்திக்கும் பகுதி நிலவுகிறது. இதன் காரணமாக, அடுத்த 5 நாட்களுக்கு மிதமான மழை பெய்யும் என வானிலை ஆய்வு மையம் தெரிவித்துள்ளது.  மேலும் இன்று நீலகிரி, கோவை உள்ளிட்ட 6 மாவட்டங்களில் கன மழை பெய்யும் என தெரிவிக்கப்பட்டுள்ளது. 

29.03.2023: தமிழ்நாடு, புதுச்சேரி மற்றும் காரைக்கால் பகுதிகளில் ஓரிரு இடங்களில் இடி மின்னலுடன் கூடிய லேசானது முதல் மிதமான மழை  பெய்யக்கூடும். நீலகிரி, கோயம்புத்தூர், தேனி, தென்காசி, திண்டுக்கல் மற்றும் திருப்பூர் மாவட்டங்களில் ஓரிரு இடங்களில் கனமழை பெய்யவாய்ப்புள்ளது.

30.03.2023: தமிழ்நாடு, புதுச்சேரி மற்றும் காரைக்கால் பகுதிகளில் ஓரிரு இடங்களில் இடி மின்னலுடன் கூடிய லேசானது முதல் மிதமான மழை  பெய்யக்கூடும்.

31.03.2023 முதல் 02.04.2023 வரை:  தமிழ்நாடு, புதுச்சேரி மற்றும் காரைக்கால் பகுதிகளில் ஓரிரு இடங்களில் லேசானது முதல் மிதமான மழை பெய்யக்கூடும்.

சென்னை மற்றும் புறநகர் பகுதிகளுக்கான வானிலை முன்னறிவிப்பு:

அடுத்த 48 மணி நேரத்திற்கு வானம் ஓரளவு மேகமூட்டத்துடன் காணப்படும். அதிகபட்ச வெப்பநிலை 33-34 டிகிரி செல்சியஸ் மற்றும் குறைந்தபட்ச வெப்பநிலை 26-27 டிகிரி செல்சியஸ் அளவில் இருக்கக்கூடும்.

கடந்த 24 மணி நேரத்தில் பதிவான மழை அளவு (சென்டிமீட்டரில்): 

அழகரை எஸ்டேட் (நீலகிரி) 14, குண்டேரிபள்ளம் (ஈரோடு) 10, குன்னூர் (நீலகிரி) 8, அடார் எஸ்டேட் (நீலகிரி), பர்லியார் (நீலகிரி) தலா 7, குன்னூர் PTO (நீலகிரி) 6, மேட்டுப்பட்டி (மதுரை), பெரியபட்டி (மதுரை), பில்லிமலை எஸ்டேட் (நீலகிரி) தலா 5, செங்கோட்டை (தென்காசி), ஆலங்காயம் (திருப்பத்தூர்), கோழிப்போர்விளை (கன்னியாகுமரி) தலா 4, கோத்தகிரி (நீலகிரி), வைகை அணை (தேனி), கெத்தை (நீலகிரி), பெரியகுளம் AWS (தேனி) தலா 3, தக்கலை (கன்னியாகுமரி), மதுரை தெற்கு (மதுரை), சாம்ராஜ் எஸ்டேட் (நீலகிரி), தேக்கடி (தேனி) தலா 2, விரகனூர் அணை (மதுரை), ராசிபுரம் (நாமக்கல்), மன்னார்குடி (திருவாரூர்), மஞ்சளார் (தேனி), கொடைக்கானல் படகு குழாம் (திண்டுக்கல்), குந்தா பாலம் (நீலகிரி), மதுரை விமான நிலையம், ஸ்ரீவில்லிபுத்தூர் (விருதுநகர்) தலா 1 செ.மீ மழை பதிவாகியுள்ளது. 

மீனவர்களுக்கான எச்சரிக்கை ஏதுமில்லை என வானிலை மையம் தரப்பில் தெரிவிக்கப்பட்டுள்ளது. 

சென்னையை பொறுத்தவரை கடந்த சில நாட்களாக் வெயிலின் தாக்கம் அதிகரித்துள்ளது. அதிகபட்ச வெப்பநிலை 34 டிகிரி செல்சியஸாக பதிவாகியுள்ளது. இது இயல்பை விட அதிகம். இன்னும் கோடை காலம் தொடங்காத நிலையில் வெயிலின் தாக்கம் அதிகமாக உள்ளது. சென்னை மட்டுமல்லாமல் தமிழ்நாட்டில் பிற பகுதிகளிலும் வெப்பநிலை அதிகரித்துள்ளது. நண்பகல் நேரங்களில் முதியவர்கள், குழந்தைகள் வெளியே வர வேண்டாம் என அறிவுருத்தப்பட்டுள்ளனர்.