நாகப்பட்டினத்தில் இல்லம் தேடி வரும் ரேஷன் பொருட்கள்: ஆகஸ்ட் 4, 5 ஆகிய தேதிகளில் விநியோகம்!

நாகை மாவட்டத்தில் மாற்றுத்திறனாளிகள் மற்றும் முதியோர்களின் வீடுகளுக்கே சென்று ரேஷன் பொருட்கள் விநியோகம் திட்டத்தில் ஆகஸ்ட் மாதத்திற்கான வினியோக தேதியினை மாவட்ட ஆட்சியர் அறிவித்துள்ளார்.

நாகை மாவட்ட ஆட்சியர்

Source : abp

நாகை மாவட்டத்தில் மாற்றுத்திறனாளிகள் மற்றும் முதியோர்களின் வீடுகளுக்கே சென்று ரேஷன் பொருட்கள் விநியோகம் திட்டத்தில் ஆகஸ்ட் மாதத்திற்கான வினியோக தேதியினை மாவட்ட ஆட்சியர் அறிவித்துள்ளார்.

நாகப்பட்டினம்: நாகப்பட்டினம் மாவட்டத்தில் 65 வயதிற்கு மேற்பட்ட முதியோர்கள் மற்றும் மாற்றுத்திறனாளி குடும்ப அட்டைதாரர்களுக்கு, அவர்களின் இல்லத்திற்கே நேரடியாகச் சென்று அத்தியாவசிய பொதுவிநியோகப் பொருட்களை விநியோகிக்கும் சிறப்புத் திட்டத்தில் ஆகஸ்ட் மாதத்திற்கான வினியோக தேதி அறிவிக்கப்பட்டுள்ளது. அதன்படி வரும் ஆகஸ்ட் 4 மற்றும் 5 ஆகிய தேதிகளில் இப்பொருட்கள் விநியோகம் செய்யப்படும் என மாவட்ட ஆட்சியர் கே.ஜே. பிரவீன் குமார், செய்திக்குறிப்பு மூலம் தெரிவித்துள்ளார்.

இல்லம் தேடி வரும் அரசின் சேவை

பொதுவிநியோகத் திட்டத்தின் கீழ் ரேஷன் கடைகளுக்கு நேரில் வந்து பொருட்களைப் பெற இயலாத முதியோர்கள் மற்றும் மாற்றுத்திறனாளிகளின் சிரமங்களைக் குறைக்கும் நோக்கில், கடந்த திமுக ஆட்சியில் கொண்டுவரப்பட்ட  ‘இல்லம் தேடிச் சென்று அத்தியாவசியப் பொருட்கள் வழங்கும் சிறப்புத் திட்டம்’ சிறப்பாகச் செயல்படுத்தப்பட்டு வருகிறது.
ரேஷன் கடைகளில் நீண்ட நேரம் வரிசையில் நிற்பதைத் தவிர்க்கவும், உடல்நலக்குறைவு மற்றும் இயலாமை காரணமாகப் பொருட்களை எடுத்துச் செல்ல முடியாத சூழலில் உள்ள எளிய மக்களுக்கு உதவவும் இத்திட்டம் மிகப்பெரிய வரப்பிரசாதமாக உருவெடுத்துள்ளது.

ஆகஸ்ட் மாத விநியோக அட்டவணை

நாகப்பட்டினம் மாவட்ட ஆட்சியர் கே.ஜே. பிரவீன் குமார், வெளியிட்டுள்ள அதிகாரப்பூர்வ அறிவிப்பில் கூறியிருப்பதாவது:
நாகப்பட்டினம் மாவட்டத்தில் இத்திட்டத்தின் கீழ் பயன்பெறும் தகுதியுடைய பயனாளிகளுக்கு, 2026-ஆம் ஆண்டு ஆகஸ்ட் மாதத்திற்கான அத்தியாவசியப் பொருட்கள் வழங்கும் பணி வரும் ஆகஸ்ட் 4-ஆம் தேதி (செவ்வாய்க்கிழமை) மற்றும் ஆகஸ்ட் 5-ஆம் தேதி (புதன்கிழமை) ஆகிய இரண்டு தினங்களில் நடைபெற உள்ளது.

யாரெல்லாம் பயன்பெறலாம்?

இத்திட்டத்தின் நன்மைகளைப் பெற பின்வரும் தகுதிகளைக் கொண்ட குடும்ப அட்டைதாரர்கள் முன்னுரிமை பெறுகிறார்கள்.
65 வயதிற்கு மேற்பட்ட முதியோர்கள்: ரேஷன் கடைக்கு நேரில் வர இயலாத 65 வயதைக் கடந்த முதியவர்கள் மட்டுமே உறுப்பினர்களாகக் கொண்ட குடும்ப அட்டைதாரர்கள்.

மாற்றுத்திறனாளிகள்: தீவிர உடல் ஊனம் அல்லது இயலாமை காரணமாக வெளியில் வர இயலாத மாற்றுத்திறனாளி குடும்ப அட்டைதாரர்கள்.

மேற்கண்ட தகுதியுடைய பயனாளிகளின் இல்லத்திற்கே நியாயவிலைக் கடைப் பணியாளர்கள் நேரடியாகச் சென்று, அவர்களுக்குரிய அரிசி, சர்க்கரை, பருப்பு, எண்ணெய் உள்ளிட்ட அனைத்து அத்தியாவசிய பொதுவிநியோகப் பொருட்களையும் எடைக் குறைவின்றி பாதுகாப்பாக விநியோகம் செய்வார்கள்.

பொதுமக்களுக்கு மாவட்ட ஆட்சியரின் வேண்டுகோள்

நாகப்பட்டினம் மாவட்டத்தில் உள்ள தகுதியுடைய 65 வயதிற்கும் மேற்பட்ட முதியோர்கள் மற்றும் மாற்றுத்திறனாளி குடும்ப அட்டைதாரர்கள் அனைவரும், ஆகஸ்ட் 4 மற்றும் 5 ஆகிய தேதிகளில் தங்கள் இல்லங்களிலேயே இருந்து இச்சிற் சிறப்புத் திட்டத்தினைப் பயன்படுத்திப் பயன்பெறுமாறு கேட்டுக்கொள்ளப்படுகிறார்கள்.
மேலும், பொருட்களின் தரத்திலோ அல்லது விநியோகத்திலோ ஏதேனும் சந்தேகங்கள் அல்லது புகார்கள் இருப்பின், அது குறித்துச் சம்பந்தப்பட்ட வட்ட வழங்கல் அலுவலர்களையோ (TSO) அல்லது மாவட்ட வழங்கல் அலுவலகத்தையோ உடனடியாகத் தொடர்பு கொண்டு தெரிவிக்கலாம் என்றும் மாவட்ட ஆட்சித்தலைவர் தனது செய்திக் குறிப்பில் சுட்டிக்காட்டியுள்ளார்.

அரசால் வழங்கப்படும் இந்தச் சேவையைப் பயன்படுத்தி, நியாயவிலைக் கடைகளுக்கு நேரில் வரத் தேவையின்றித் தங்கள் இல்லங்களிலேயே சிரமமின்றி பொருட்களைப் பெற்றுக்கொள்ளுமாறு மாவட்ட நிர்வாகத்தின் சார்பில் கேட்டுக்கொள்ளப்படுகிறது.