Built for Brave: ராணுவ லுக்கில் ராயல் என்ஃபீல்டு கிளாசிக் 350 கோர்க்கா எடிஷன் அறிமுகம்- என்ன மாற்றம்?
Classic 350 Gorkha Edition: நமது ராணுவத்தில் உள்ள கோர்க்கா ரெஜிமென்ட் வீரர்களின் ஒப்பற்ற வீரம் மற்றும் தைரியத்தை பெருமையுடன் கௌரவிக்கும் விதமாக இந்த சிறப்பு மாடல் பிரத்யேகமாக உருவாக்கப்பட்டுள்ளது.
இந்திய இருசக்கர வாகன சந்தையில் ராயல் என்ஃபீல்டு நிறுவனம் தனது மிகவும் பிரபலமான கிளாசிக் 350 பைக்கின் புதிய கோர்க்கா எடிஷனை தற்போது அதிகாரப்பூர்வமாக அறிமுகப்படுத்தியுள்ளது.
நமது நாட்டு ராணுவத்தில் உள்ள கோர்க்கா ரெஜிமென்ட் வீரர்களின் ஒப்பற்ற வீரம் மற்றும் தைரியத்தை பெருமையுடன் கௌரவிக்கும் விதமாக இந்த சிறப்பு மாடல் பிரத்யேகமாக உருவாக்கப்பட்டுள்ளது.
பைக்கின் வடிவமைப்பு
வடிவமைப்பை பொறுத்தவரை, இந்த பைக்கின் அடிப்படை டிசைனில் நிறுவனம் பெரிய அளவிலான மாற்றங்கள் எதையும் செய்யவில்லை. வாடிக்கையாளர்களுக்கு பரிச்சயமான அதே வட்ட வடிவ ஹெட் லேம்ப், கிளாசிக் எரிபொருள் டேங்க், ஸ்போக் வீல்கள் மற்றும் நிமிர்ந்து அமர்ந்து ஓட்டும் வசதியான இருக்கை அமைப்பு ஆகியவை அப்படியே தக்கவைக்கப்பட்டுள்ளன.
இருப்பினும், ராணுவ வாகனங்களின் தோற்றத்தை நேரடியாக அளிக்கும் வகையிலான புதிய கோர்க்கா கிரீன் நிறம் இதற்கு பிரத்யேகமாக வழங்கப்பட்டுள்ளது. மேலும், எரிபொருள் டேங்க் மற்றும் பக்கவாட்டு பேனல்களில் கோர்க்கா வீரர்களின் பாரம்பரிய அடையாளமான குறுக்கு வாள் சின்னம் மிகச் சிறப்பாக பொறிக்கப்பட்டு, வழக்கமான கிளாசிக் மாடலிலிருந்து இது முற்றிலும் தனித்து நிற்கிறது.
இன்ஜின் மற்றும் செயல்திறன்
இதன் இன்ஜினில் எவ்விதமான முக்கிய மாற்றங்களும் செய்யப்படவில்லை. வழக்கமான மாடலில் உள்ள அதே 349cc சிங்கிள் சிலிண்டர், ஏர் கூல்டு பெட்ரோல் இன்ஜின் இதிலும் பொருத்தப்பட்டுள்ளது. இது அதிகபட்சமாக 20 bhp பவர் மற்றும் 27 Nm டார்க் திறனை சீராக வெளிப்படுத்தும். மேலும், 5 ஸ்பீடு கியர்பாக்ஸ் இதனுடன் இணைக்கப்பட்டுள்ளது. எனவே, இதன் ரேஞ்ச் மற்றும் செயல்திறன் முந்தைய மாடலை போலவே அமையும்.
கூடுதல் சிறப்பம்சங்கள்
அன்றாட நகரப் பயன்பாடு மற்றும் நீண்ட தூரப் பயணங்களை மிகவும் எளிதாக்கும் வகையில், கியர் மாற்றுவதை மிக மென்மையாக்கும் அசிஸ்ட் மற்றும் ஸ்லிப்பர் கிளட்ச் வசதி இந்த பைக்கில் புதிதாக வழங்கப்பட்டுள்ளது. அத்துடன், பயணத்தின்போது ஸ்மார்ட்போன்களை சார்ஜ் செய்ய ஏதுவாக டைப் சி யுஎஸ்பி ஃபாஸ்ட் சார்ஜிங் போர்ட் வசதியும் இதில் சேர்க்கப்பட்டுள்ளது.
கோர்க்கா கலெக்ஷன்
இந்த பைக்குடன் சேர்த்து கோர்க்கா கலெக்ஷன் என்ற பெயரில் பிரத்யேகமான ரைடிங் கியர் மற்றும் லைஃப்ஸ்டைல் பொருட்களையும் நிறுவனம் அறிமுகப்படுத்தியுள்ளது. இதில் ராணுவ சீருடை, குறுக்கு வாள் வடிவமைப்பு கொண்ட ஹெல்மெட்டுகள், லெதர் பூட்ஸ், பல்வேறு ஆடைகள் மற்றும் வாடிக்கையாளர்களை கவரும் பல கூடுதல் பொருட்கள் இதில் அடங்கும்.
விலை விவரங்கள்
இந்தியாவில் புதிய ராயல் என்பீல்டு கிளாசிக் 350 கோர்க்கா எடிஷனின் எக்ஸ் ஷோரூம் விலை ரூ.2.10 லட்சமாக நிர்ணயிக்கப்பட்டுள்ளது. இதற்கான முன்பதிவுகள் தற்போது தொடங்கப்பட்டுள்ளன. ஒவ்வொரு மாநிலத்தின் ஆர்டிஓ மற்றும் இன்சூரன்ஸ் கட்டணங்களைப் பொறுத்து ஆன் ரோடு விலை மாறுபடும்.
பழைய கிளாசிக் ரெட்ரோ தோற்றத்துடன் சற்றே மாறுபட்ட மிலிட்டரி ஸ்டைலை விரும்பும் வாடிக்கையாளர்களுக்கு இந்த கோர்க்கா எடிஷன் பெஸ்ட் ஆப்ஷன்.
தலைப்பு செய்திகள்
ட்ரெண்டிங் செய்திகள்
