மேட்டூர் அணை: கரையோர மக்களுக்கு வெள்ள அபாய எச்சரிக்கை! மயிலாடுதுறை ஆட்சியரின் அவசர அறிவிப்பு!

கொள்ளிடம் ஆற்றில் உபரிநீர் திறக்கப்பட நிலையில் மயிலாடுதுறை மாவட்ட மக்களுக்கு வெள்ள அபாய எச்சரிக்கையை மாவட்ட ஆட்சியர் விடுத்துள்ளார்.

கோப்பு படம்

Source : ABP

மேட்டூர் அணை தனது முழு கொள்ளளவான 120.00 அடியை நேற்று மாலை 6.00 மணி அளவில் எட்டியுள்ளதைத் தொடர்ந்து, காவிரி மற்றும் கொள்ளிடம் ஆற்றுப் படுகைகளில் உள்ள மக்களுக்கு வெள்ள அபாய எச்சரிக்கை விடுக்கப்பட்டுள்ளது. அணையின் நீர்வரத்து தொடர்ந்து அதிகமாக இருப்பதால் வினாடிக்கு 58,000 கன அடி உபரி நீர் காவிரி ஆற்றில் தற்போது திறந்துவிடப்படுகிறது.

இதன் காரணமாக, கல்லணையில் இருந்து கொள்ளிடம் ஆற்றில் எந்த நேரத்திலும் 58,000 கன அடி உபரி நீர் வெளியேற்றப்பட வாய்ப்புள்ளதாக மயிலாடுதுறை மாவட்ட ஆட்சியர் ஹெச்.எஸ். ஸ்ரீகாந்த் அறிவித்துள்ளார்.

கரையோர மக்களுக்கு அவசர எச்சரிக்கை

மயிலாடுதுறை மாவட்டத்தில் உள்ள காவிரி, கொள்ளிடம் மற்றும் அவற்றின் கிளை ஆறுகளில் முழு கொள்ளளவில் உபரி தண்ணீர் திறக்கப்பட்டு பாயும் என்பதால், கரையோரம் மற்றும் தாழ்வான பகுதிகளில் வசிக்கும் மக்கள் அனைவரும் உடனடியாக பாதுகாப்பான இடங்களுக்குச் செல்லுமாறு கேட்டுக் கொள்ளப்படுகிறார்கள். 

 

மக்களின் உயிர் மற்றும் உடைமைகளின் பாதுகாப்பிற்காக அனைத்து முன்னெச்சரிக்கை நடவடிக்கைகளையும் மாவட்ட நிர்வாகம் மேற்கொள்ளப்பட்டு வருகின்றன. மாவட்ட நிர்வாகம் வெளியிட்டுள்ள அறிக்கையில், பொதுமக்கள் ஆற்றில் இறங்கவோ, ஆற்றைக் கடக்கவோ, கால்நடைகளை ஆற்றில் இறக்கி குளிப்பாட்டவோ, துணி துவைப்பது, செல்ஃபி எடுப்பது போன்ற ஆபத்தான செயல்களில் ஈடுபட வேண்டாம் என வலியுறுத்தப்பட்டுள்ளது.

 

ஆற்று நீர்வரத்து அதிகமாக இருக்கும் நிலையில், சிறு கவனக்குறைவும் பெரும் ஆபத்தில் முடியலாம் என்பதால், பொதுமக்கள் மிகுந்த எச்சரிக்கையுடன் இருக்க வேண்டும் என அறிவுறுத்தப்பட்டுள்ளது.

நீர்வரத்து மற்றும் அணையின் நிலை

மேட்டூர் அணை, தனது முழு கொள்ளளவான 120 அடி உயரம் கொண்ட ஒரு முக்கிய நீர்ப்பாசன ஆதாரமாகும். கடந்த சில நாட்களாக நீர்ப்பிடிப்பு பகுதிகளில் பெய்த கனமழை காரணமாக அணைக்கு நீர்வரத்து தொடர்ந்து அதிகரித்து வந்தது. நேற்று 29.06.2025 அன்று மாலை 6 மணியளவில் அணை முழு கொள்ளளவை எட்டியது. இது விவசாயிகளுக்கும் பொதுமக்களுக்கும் ஒருபுறம் மகிழ்ச்சியை அளித்தாலும், மறுபுறம் உபரி நீர் வெளியேற்றம் காரணமாக கரையோரப் பகுதிகளுக்கு வெள்ள அபாயம் ஏற்பட்டுள்ளது.

 

தற்போது அணையிலிருந்து 58,000 கன அடி நீர் காவிரி ஆற்றில் திறந்துவிடப்படுகிறது. இந்த நீர், கல்லணையை அடைந்த பிறகு, கொள்ளிடம் ஆற்றில் உபரி நீராக வெளியேற்றப்படும். கொள்ளிடம் ஆறு, மயிலாடுதுறை மாவட்டத்தின் முக்கிய நீர்வழிகளில் ஒன்றாகும். எனவே, மயிலாடுதுறை மாவட்டத்தில் உள்ள கொள்ளிடம் ஆற்றுப் படுகைகள் மற்றும் அதன் கிளை ஆறுகள் அனைத்தும் முழுமையாக நிரம்பி வழியும் என்பதால், கரையோர மக்களுக்கு மிகுந்த எச்சரிக்கை தேவை.

மாவட்ட நிர்வாகத்தின் ஏற்பாடுகள்

மயிலாடுதுறை மாவட்ட நிர்வாகம், வெள்ள அபாயத்தை எதிர்கொள்ள அனைத்து முன்னெச்சரிக்கை நடவடிக்கைகளையும் மேற்கொண்டு வருகிறது. வருவாய்த் துறை, காவல்துறை, தீயணைப்பு மற்றும் மீட்புப் பணிகள் துறை, பொதுப்பணித் துறை உள்ளிட்ட அனைத்துத் துறைகளும் ஒருங்கிணைந்து செயல்படுகின்றன. தாழ்வான பகுதிகளில் வசிக்கும் மக்களை வெளியேற்றி, பாதுகாப்பான நிவாரண மையங்களுக்கு அழைத்துச் செல்ல ஏற்பாடுகள் செய்யப்பட்டுள்ளன.

அவசரகால மீட்புக் குழுக்கள்

தேவைப்படும் இடங்களில் உடனடியாகச் செயல்பட அவசரகால மீட்புக் குழுக்கள் தயார் நிலையில் வைக்கப்பட்டுள்ளன.

 

• அதிகாரிகள் நியமனம்: 

வெள்ள அபாயம் ஏற்படக்கூடிய பகுதிகளில் அதிகாரிகளும், தன்னார்வலர்களும் நியமிக்கப்பட்டு, நிலைமையைத் தொடர்ந்து கண்காணித்து வருகின்றனர்.

 

 

• அறிவிப்பு பலகைகள்:

ஆற்றுப் பகுதிகளில் ஆபத்தான பகுதிகளைக் குறிக்கும் அறிவிப்பு பலகைகள் வைக்கப்பட்டுள்ளன.

 

• மக்களுக்கு அறிவுரை

ஒலிபெருக்கிகள் மூலம் பொதுமக்களுக்கு தொடர்ந்து எச்சரிக்கைகளும், அறிவுரைகளும் வழங்கப்பட்டு வருகின்றன.

புகார் மற்றும் சேத விவரங்களுக்கு

மேற்படி உபரி நீர் தொடர்பாக ஏற்படும் சேத விவரங்கள் மற்றும் புகார்களைத் தெரிவிக்க, பொதுமக்கள் மயிலாடுதுறை மாவட்ட ஆட்சியர் அலுவலக கட்டுப்பாட்டு அறையைத் தொடர்பு கொள்ளலாம் என மாவட்ட ஆட்சியர் தெரிவித்துள்ளார்.

•  கட்டுப்பாட்டு அறை எண்: 1077
•  தொலைபேசி எண்: 04364-222588

இந்த எண்களைத் தொடர்பு கொண்டு, தங்கள் புகார்களையும், சேத விவரங்களையும் தெரிவிக்குமாறு கேட்டுக் கொள்ளப்பட்டுள்ளது. மாவட்ட நிர்வாகம் அனைத்து வகையிலும் பொதுமக்களுக்கு உதவ தயாராக உள்ளது. பொதுமக்கள் அரசு அறிவிக்கும் பாதுகாப்பு வழிமுறைகளைப் பின்பற்றி, ஒத்துழைப்பு நல்கி, தங்களையும் தங்கள் குடும்பத்தையும் பாதுகாத்துக் கொள்ள வேண்டும் என மாவட்ட ஆட்சியர் ஹெச்.எஸ். ஸ்ரீகாந்த் கேட்டுக்கொண்டுள்ளார். 

 

இந்த இக்கட்டான சூழ்நிலையில், பொதுமக்கள் அனைவரும் பொறுப்புடன் செயல்பட்டு, எந்தவித அசம்பாவிதமும் ஏற்படாமல் தடுப்பதில் ஒத்துழைப்பு வழங்க வேண்டும் என மாவட்ட நிர்வாகம் சார்பில் வேண்டுகோள் விடுத்துள்ளனர்.

இதையும் படிக்க

நாட்டுக்கோழி வளர்ப்புக்கு 50% மானியம்! சுயதொழில் மூலம் வாழ்வில் உயர ஒரு பொன்னான வாய்ப்பு!

மயிலாடுதுறை: கால்நடைகளுக்கு இலவச கோமாரி நோய் தடுப்பூசி முகாம்! கால்நடை வளர்ப்போருக்கு ஒரு பொன்னான வாய்ப்பு!