"வாரிசு அரசியலா? அரசியல் உத்தியா? சீர்காழி தொகுதி விவகாரத்தில் துரை வைகோவின் பதிலடி!
திமுக கூட்டணியின் வெற்றி வாய்ப்பு, உதயசூரியன் சின்னத்தில் மதிமுக போட்டியிடுவதற்கான அரசியல் பின்னணி மற்றும் நடிகர் விஜய்யின் அரசியல் வருகை குறித்து துரை வைகோ விளக்கமளித்துள்ளார்.
தமிழக அரசியலில் தேர்தல் களம் சூடுபிடித்துள்ள நிலையில், மதிமுக முதன்மைச் செயலாளர் துரை வைகோ சீர்காழி செய்தியாளர்களைச் சந்தித்தார். அப்போது, திமுக தலைமையிலான மதச்சார்பற்ற முற்போக்குக் கூட்டணியின் வெற்றி வாய்ப்புகள், உதயசூரியன் சின்னத்தில் போட்டியிடுவதற்கான பின்னணி, நடிகர் விஜய்யின் அரசியல் வருகை மற்றும் வாரிசு அரசியல் விமர்சனங்கள் எனப் பல்வேறு முக்கிய விவகாரங்கள் குறித்து விரிவாகவும் வெளிப்படையாக தனது கருத்துகளைப் பகிர்ந்து கொண்டார்.
மக்களிடையே பெருகும் ஆதரவு- வெற்றியைத் தீர்மானிக்கும் சமூக நீதி
செய்தியாளர்களிடம் பேசிய துரை வைகோ, "திமுக தலைமையிலான மதச்சார்பற்ற முற்போக்குக் கூட்டணிக்கு மக்களிடையே முன்பை விட இப்போது பெரும் ஆதரவு பெருகியுள்ளது. குறிப்பாக, முதலமைச்சர் மு.க. ஸ்டாலின் தலைமையிலான அரசு, விளிம்புநிலை மக்களின் வாழ்வாதாரத்தை மேம்படுத்துவதற்காகக் கொண்டு வந்துள்ள திட்டங்கள் ஒவ்வொன்றும் அடித்தட்டு மக்களிடம் நேரடியாகச் சென்றடைந்துள்ளது. பெண்களுக்கான கட்டணமில்லா பேருந்து பயணம், கலைஞர் மகளிர் உரிமைத் தொகை மற்றும் மாணவர்களுக்கான காலை உணவுத் திட்டம் போன்ற புரட்சிகரமான திட்டங்கள் இந்த ஆட்சியின் அடையாளமாக மாறியுள்ளன.
சமூக நீதிப் பாதையில் அரசு எடுத்து வரும் நடவடிக்கைகள் மற்றும் தமிழகத்தின் தொழில் வளர்ச்சிக்காக மேற்கொள்ளப்படும் அயராத முயற்சிகள் ஆகியவை, வரும் தேர்தலிலும் இந்த மெகா கூட்டணிக்கு ஒரு பிரம்மாண்ட வெற்றியைத் தேடித்தரும் என்பதில் எனக்குத் துளியும் சந்தேகமில்லை.
சின்னம் குறித்த சர்ச்சை: தோல்வி பயமல்ல; இது அரசியல் ராஜதந்திரம்!
மதிமுக போட்டியிடும் நான்கு தொகுதிகளில் ஒன்றான சீர்காழி தொகுதியில், அக்கட்சி தனிச் சின்னத்தில் போட்டியிடப் போவதாக முதலில் தகவல்கள் வெளியானது. இது குறித்து துரை வைகோ விளக்கமளிக்கையில்:
"சீர்காழி தொகுதியில் நாங்கள் தனிச் சின்னத்தில் போட்டியிடத்தான் முதலில் திட்டமிட்டிருந்தோம். ஆனால், தற்போது அங்கு அதிமுகவுடன் பாஜகவும் கூட்டணி அமைத்துள்ளது. ஒரு மதவாத சக்தியும், அதற்குத் துணை போகும் கட்சியும் கைகோர்த்துள்ள நிலையில், அந்தத் தொகுதியில் வாக்குகளைச் சிதறவிடக் கூடாது என்பதில் நாங்கள் உறுதியாக இருந்தோம்.
எந்தக் காரணத்தைக் கொண்டும் மதவாத சக்திகள் வெற்றி பெற்றுவிடக் கூடாது என்ற முன்னெச்சரிக்கையுடன், திமுகவின் 'உதயசூரியன்' சின்னத்திலேயே போட்டியிட மதிமுக தலைமை முடிவெடுத்துள்ளது. இது தோல்வி பயத்தால் எடுக்கப்பட்ட முடிவு அல்ல; மாறாக, வகுப்புவாத சக்திகளைத் தடுத்து நிறுத்துவதற்காக எடுக்கப்பட்ட ஒரு வலுவான அரசியல் உத்தி என்றார்.
நடிகர் விஜய் மற்றும் தமிழக அரசியல் சூழல்
தமிழக அரசியலில் தற்போதைய பேசுபொருளாக உள்ள நடிகர் விஜய்யின் அரசியல் வருகை குறித்துக் கேட்கப்பட்ட கேள்விக்கு அவர் பதிலளிக்கையில்: "விஜய் ஒரு மிகப்பெரிய நட்சத்திரம் என்பதில் மாற்றுக்கருத்து இல்லை. அவருக்குப் பின்னால் மிகப்பெரிய இளைஞர் பட்டாளம் இருக்கிறது. ஆனால், அந்த ஆதரவு அப்படியே வாக்குகளாக மாறுமா என்பது தற்போதைக்கு ஒரு பெரிய கேள்விக்குறிதான்.
அரசியல் என்பது வெறும் நட்சத்திர அந்தஸ்து சார்ந்தது மட்டுமல்ல. விஜய் முறையாகத் தேர்தலை எதிர்கொள்ள வேண்டும் என்றால், அவர் மக்களை நேரடியாகச் சந்திக்க வேண்டும். குறிப்பாக, செய்தியாளர்களின் கேள்விகளுக்குப் பதிலளிக்கப் பழக வேண்டும். அப்போதுதான் ஒரு தலைவராக அவரது நிலைப்பாடு மக்களுக்குத் தெளிவாகத் தெரியும். மேலும், விஜய் வாங்கும் வாக்குகள் திமுகவை விட, அதிமுக தலைமையிலான கூட்டணிக்கே அதிக பாதிப்பை ஏற்படுத்தும் என்பதுதான் கள நிலவரம்," எனத் தெரிவித்தார்.
வாரிசு அரசியல் மற்றும் கட்சி உள்விவகாரங்கள்
தன் மீது தொடர்ந்து வைக்கப்படும் வாரிசு அரசியல் குறித்த விமர்சனங்களுக்கு முற்றுப்புள்ளி வைக்கும் விதமாகப் பேசிய அவர், "வாரிசு அரசியல் என்பது ஒருவரை வலுக்கட்டாயமாகத் திணிப்பது. ஆனால், கட்சியில் உள்ள மூத்த நிர்வாகிகள், தொண்டர்கள் என அனைவருமே ஒருவரை மனமுவந்து தலைமை ஏற்கச் சொல்லும்போது, அது ஒருபோதும் வாரிசு அரசியலாகாது. அது தொண்டர்களின் விருப்பம்," என்றார்.
மேலும், கூட்டணியில் இடங்கள் குறைக்கப்பட்டது குறித்துப் பேசிய அவர், "சமூக நீதி மற்றும் மதவாத எதிர்ப்பு என்ற பொதுவான நோக்கத்திற்காகச் சில தியாகங்களைச் செய்வதில் தவறில்லை. மதிமுக எப்போதும் சமூக நீதியின் அடிப்படையிலேயே இயங்குகிறது. கடந்த தேர்தலில் நாங்கள் நிறுத்திய 6 வேட்பாளர்களில் 2 பேர் பட்டியலினத்தைச் சேர்ந்தவர்கள் என்பது எங்களின் சமூக நீதிப் பார்வைக்குச் சான்று," என்று சுட்டிக்காட்டினார்.
சிறுபான்மையினர் வாக்குகள் மற்றும் தேசிய அரசியல்
மத்திய அரசின் செயல்பாடுகளைக் கடுமையாகச் சாடிய துரை வைகோ, "மத்திய பாஜக அரசு கொண்டு வந்துள்ள வக்ஃப் வாரியத் திருத்தச் சட்டம், FCRA திருத்தங்கள் மற்றும் குடியுரிமைத் திருத்தச் சட்டம் (CAA) போன்றவற்றால் சிறுபான்மையின மக்கள் பெரும் அச்சத்தில் உள்ளனர். இதன் காரணமாக, தமிழகத்தில் உள்ள 90 சதவீத சிறுபான்மையினரின் வாக்குகள் ஒருமுகமாக மதச்சார்பற்ற முற்போக்குக் கூட்டணிக்கே கிடைக்கும்," என்றார். இறுதியில், "தேர்தல் நேரத்தில் கட்சி மாறுபவர்களைப் பற்றி நாங்கள் கவலைப்படவில்லை. ராகுல் காந்தி போன்ற தேசியத் தலைவர்கள் தமிழகத்தில் பிரச்சாரம் செய்ய உள்ளனர். அது கூட்டணிக்கு மிகப்பெரிய பலத்தைச் சேர்க்கும்," என்றார்.
Before You Go
Vijay Sangeetha Divorce : விவாகரத்து வழக்கு வாபஸ்! சங்கீதா கொடுத்த திடீர் டிவிஸ்ட் காரணம் என்ன?
தலைப்பு செய்திகள்
ட்ரெண்டிங் செய்திகள்
