நண்பன் மீது கோபம்! ஆத்திரத்தில் தோழனின் தாயை பாலியல் வன்கொடுமை செய்ய முயற்சித்த இளைஞர் - மயிலாடுதுறையில் கொடூரம்

மயிலாடுதுறை அருகே நண்பன் மேல் உள்ள கோவத்தில் நண்பனின் தாயாரை ஏமாற்றி அழைத்து சென்று பாலியல் பலாத்காரம் செய்ய முயன்ற இளைஞரை காவல்துறையினர் கைது செய்து சிறையில் அடைத்துள்ளனர்.

நண்பரின் தாயை பாலியல் பலாத்காரம் செய்ய முயன்ற வழக்கில் கைதானவர்

மயிலாடுதுறை அருகே நண்பன் மேல் உள்ள கோவத்தில் நண்பனின் தாயாரை ஏமாற்றி அழைத்து சென்று, பாலியல் பலாத்காரம் செய்ய முயன்ற இளைஞரை காவல்துறையினர் கைது செய்து சிறையில் அடைத்துள்ளனர். மயிலாடுதுறை மாவட்டம் மயிலாடுதுறை அருகே குத்தாலம் காவல் சரகத்திற்குட்பட்ட மல்லியம் கிராமம். இங்குள்ள ராயர் அக்ரஹாரத்தை சேர்ந்தவர் சேகர் என்பவரின் மகன் 30 வயதான கணேசன். இவரும் கடந்த 16 -ம் தேதி அதே பகுதியை சேர்ந்த முகமது சையது என்பவரின் 24 வயதான மகன் முகம்மது பைசல் என்பவரும் ஒன்றாக மது அருந்திவிட்டு மயிலாடுதுறை சித்தர்காட்டில் உள்ள உணவகம் ஒன்றில் இரவு உணவு சாப்பிட்டு உள்ளனர்.

பாலியல் வன்கொடுமை:

அப்போது தலைக்கேறிய மது போதையில் இருவருக்கும் இடையே தகராறு மற்றும் கைகலப்பு ஏற்பட்டுள்ளது. இந்நிலையில், இந்த தகராறுக்கு பின் கணேசன் மயிலாடுதுறையிலேயே இருந்து விட, முகம்மது பைசல் மட்டும் வீட்டுக்கு வந்துள்ளார். அப்போது இரவு நீண்ட நேரம் ஆகியும் தனது மகன் வீட்டுக்கு வராததால் வீட்டு வாசலில் காத்திருந்த கணேசனின் தாயார் 65 வயதான சரோஜினி, முகம்மது பைசலிடம் தனது மகனை பார்த்தாயா? என்று கேட்டுள்ளார். அதற்கு முகம்மது பைசல் உங்கள் மகன் குடித்துவிட்டு மல்லியம் சுடுகாட்டில் விழுந்து கிடக்கிறான் என சொல்லி உள்ளார். 

இளைஞர் கைது:

இதை நம்பிய சரோஜினி முகம்மது பைசலின் வண்டியில் அமர்ந்து சுடுகாட்டுக்கு சென்றுள்ளார். அங்கு கணேசனின் மீது உள்ள ஆத்திரத்தில் அவரது தாயார் சரோஜினியை, முகம்மது பைசல் பாலியல் பலாத்காரம் செய்ய முயற்சித்து தாக்குதலில் ஈடுபட்டுள்ளார். இதனை அடுத்து அவனிடம் இருந்து தப்பித்து வீட்டுக்கு வந்த சரோஜினி குடும்பத்தினரிடம் நடந்த சம்பவத்தை கூறி கதறி அழுதுள்ளார். இதனை அடுத்து சரோஜினியின் கணவர் சேகர் மற்றும் மகன் கணேசன் ஆகிய இருவரும் முகம்மது பைசலின் வீட்டுக்கு இது குறித்து விசாரிக்க சென்ற போது அவர் வீட்டில் இல்லை. இதனால் வீட்டில் இருந்த முகம்மது பைசலின் தாயார் 44 வயதான அபுரோஜாவை இருவரும் தாக்கியுள்ளனர். 

இதுகுறித்து சரோஜா கொடுத்த புகாரின் பேரில் மயிலாடுதுறை அனைத்து மகளிர் போலீசார் முகம்மது பைசல் மீது பாலியல் வன்கொடுமை செய்ய முயற்சித்து காயப்படுத்துதல் 376/5/11, பிரிவின் கீழ் வழக்குப் பதிவு செய்தனர். பின்னர் முகம்மது பைசலை கைது செய்தனர். தொடர்ந்து காவல்துறையினர் அவரை நீதிமன்றத்தில் ஆஜர்படுத்தி மயிலாடுதுறை கிளை சிறையில் அடைத்தனர். நண்பரின் மீது உள்ள கோபத்தில் அவரது தாயாரை இளைஞர் பாலியல் பலாத்காரம் செய்ய முயற்சித்த சம்பவம் மயிலாடுதுறை மாவட்டத்தில் பெரும் பரபரப்பை ஏற்படுத்தி உள்ளது.