Gokulraj Murder Case: கோகுல்ராஜ் கொலை வழக்கு: ”சிசிடிவியில் தெரியும் பெண் நானில்லை” - சுவாதி வாக்குமூலத்தால் நீதிபதிகள் அதிர்ச்சி

கோகுல்ராஜ் கொலை வழக்கில் இன்று மதுரை உயர்நீதிமன்ற கிளையில் ஆஜரான சுவாதி சிசிடிவி காட்சியில் தெரியும் பெண் நானில்லை என நீதிபதிகள் முன் வாக்குமூலம் அளித்தார்.

மதுரை உயர்நீதிமன்றம்

கோகுல்ராஜ் கொலை வழக்கில் இன்று மதுரை உயர்நீதிமன்ற கிளையில் ஆஜரான சுவாதி சிசிடிவி காட்சியில் தெரியும் பெண் நானில்லை என நீதிபதிகள் முன் வாக்குமூலம் அளித்தார்.

நாமக்கல் மாவட்டம் கோகுல்ராஜ் கொலை வழக்கில் மதுரை மாவட்ட வன்கொடுமை தடுப்பு சிறப்பு நீதிமன்றம் 10 பேரை குற்றவாளிகள் அறிவித்ததோடு அனைவருக்கும் ஆயுள் தண்டனை அளித்தும், சாகும் வரை சிறையில் இருக்கவும் தீர்ப்பளித்தது.

இந்த உத்தரவை ரத்து செய்யக்கோரி யுவராஜ், உள்ளிட்ட 10 பேரும் உயர்நீதிமன்ற மதுரைக் கிளையில் மனுக்களை தாக்கல் செய்துள்ளனர்.

இதே போல கோகுல்ராஜின் தாயார் சித்ரா மற்றும் சிபிசிஐடி தரப்பில், இந்த வழக்கில் சங்கர் உள்ளிட்ட  ஐவரையும் விடுதலை செய்ததை எதிர்த்து மேல்முறையீட்டு மனு தாக்கல் செய்யப்பட்டிருந்தது. இந்த வழக்குகள் நீதிபதிகள் எம்.எஸ்.ரமேஷ், ஆனந்த் வெங்கடேஷ் அமர்வு முன்பாக விசாரணைக்கு வந்தது.

நீதிபதிகள் பிறப்பித்த உத்தரவில், கீழமை நீதிமன்றத்தின் விசாரணை அறிக்கையை பார்க்கும்போது, விசாரணையின் தொடக்க காலத்தில் சுவாதி சாட்சியாக இருந்துள்ளார். ஆனால் அதற்கும் 164 வாக்குமூலத்தை வழங்கியதற்கும் இடையில் ஏதோ நிகழ்ந்துள்ளது. 

கீழமை நீதிமன்றமும் அதனை பெரிய அளவில் எடுத்துக் கொள்ளாமல்  சுவாதியின் சாட்சியை நிராகரித்துள்ளது.

மேல்முறையீட்டு நீதிமன்றம் துறவிகளைப் போல தவறுக்கு எதிராக சமநிலையை பேண இயலாது. நீதித்துறையின் மனசாட்சியை திருப்திப்படுத்தும் வகையில் ஸ்வாதியை மீண்டும் சாட்சியாக விசாரிக்க விரும்புகிறது. நாமக்கல் காவல் கண்காணிப்பாளர், போதுமான காவல்துறை பாதுகாப்பை சுவாதிக்கும் அவரது குடும்பத்தினருக்கும் வழங்க வேண்டும். ஸ்வாதியை யாரும் சந்திக்கவோ, போனில் பேசுவதோ கூடாது. ஸ்வாதியின் பெற்றோருக்கும் குடும்ப உறுப்பினர்களுக்கும் போதுமான பாதுகாப்பு வழங்க வேண்டும். சாட்சி சுவாதி பயமின்றி இந்த நீதிமன்றத்திற்கு வருவது உறுதி செய்ய வேண்டும். விசாரணை அதிகாரி சாட்சி சுவாதியை நீதிமன்றத்தில் ஆஜர் படுத்த வேண்டும் என உத்தரவிட்டு வழக்கை இன்றைக்கு ஒத்திவைத்திருந்தனர். 

இந்நிலையில் சுவாதி இன்று மதுரை உயர்நீதிமன்ற கிளையில் ஆஜரானார். விசாரணை open court-ல் நடைபெற்றது. விசாரனையின் போது சிசிடிவி காட்சிகள் ஒளிபரப்பப்பட்டு சுவாதியிடம் சரமாரி கேள்வி கேட்கப்பட்டது.  

சுவாதி வாக்குமூலம்:

” கோகுல்ராஜ் கல்லூரியில் என்னுடன் பயின்றார். ஒரே வகுப்பு.  சகமாணவரைப் போல கோகுல்ராஜைத் தெரியும். அவர்களோடு பேசுவது போல, கோகுல்ராஜிடமும் பேசியுள்ளேன். மேலும் அந்த சிசிடிவி காட்சியை பார்த்து வீடியோவில் இருப்பது நானல்ல என கூறினார். இந்த தகவலை நீதிபதிகள் பதிவு செய்து கொண்டனர். மூன்று முறைக்கும் மேலாக அந்த பெண் யாரென தெரியவில்லை என சுவாதி கூறியதால், நீதிபதிகள்  உண்மையை மனசாட்சிக்கு உட்பட்டு சொல்லுங்கள் என நீதிபதிகள் கேட்டனர். அதற்கு சுவாதி கண்கலங்கினார்.

வீடியோவில் அந்த பெண் அருகில் இருக்கும் பையன் யார்  என  நீதிபதிகள் கேள்வி கேட்டனர், அதற்கு கோகுல்ராஜ் போல தெரிகிறது என சுவாதி கூறினார். மேலும் அப்போ அந்த பெண் நீங்கள் இல்லையா என மீண்டும் கேள்வி எழுப்பப்பட்டது,  மூன்று முறை நீதிபதிகள் கேட்டபோதும், அந்த பெண் யார் என தெரியவில்லை என சுவாதி கூறிவிட்டார்.

கேல்விகளும் பதில்களும்: 

நீதித்துறை நடுவர் முன்பாக வாக்குமூலம் கொடுத்தீர்களா? அந்த கையெழுத்து உங்களுடையது தானா?- நீதிபதிகள்

ஆம் - சுவாதி

அப்போதும் சத்தியபிரமாணம் வாங்கினார்களா? - நீதிபதிகள்

ஆம்- சுவாதி

 கோகுல்ராஜை 23ஆம் தேதி பார்க்கவில்லை என கூறினீர்களே? வாக்குமூலத்தில் என்ன சொல்லியிருக்கிறீர்கள்?
- நீதிபதிகள். கோகுல்ராஜ் போனில் அழைத்து, பணம் எடுத்து வருமாறு சொன்னதால் திருச்செங்கோடு பேருந்து நிலையத்திற்கு சென்றதாகவும், கோவிலுக்கு சென்றதாகவும் வாசித்தார்.

இவ்வாறு நீதித்துறை நடுவர் முன்பாக எவ்வாறு சொன்னீர்கள்? - நீதிபதி.

காவல்துறையினர் ஒரு ஷீட்டில் எழுதிக் கொடுத்து சொல்லச்சொன்னார்கள் சொன்னேன்- சுவாதி

சத்தியபிரமாணம் செய்து விட்டு, பொய் சொன்னீர்களா? காவல்துறை சொல்லச்சொன்னார்கள் என நீதித்துறை நடுவரிடம் சொல்லியிருக்கலாமே?- நீதிபதிகள்.

அம்மா, அப்பா காவல்நிலையத்தில் இருந்ததால் பயமாக இருந்தது- சுவாதி.

சுவாதி பேசியது போன்ற ஆடியோ நீதிமன்றத்தில் போட்டு காண்பிக்கப்பட்டது.

தற்போது விசாரணை நடைபெற்று வருகிறது.