தமிழ்நாடு பட்ஜெட்டில், கோவை குறுந்தொழில் முனைவோர்களின் எதிர்பார்ப்புகள் என்னென்ன?

நிதி நிலை அறிக்கையில் கொரோனா நெருக்கடியில் இருந்து தொழில்துறை மீண்டுவரும் வகையிலான அறிவிப்புகள் இருக்கும் என கோவை தொழில் முனைவோர்கள் எதிர்பார்த்துள்ளனர்.

குறுந்தொழில் கூடம்

திமுக அரசின் முதல் நிதிநிலை அறிக்கை வருகின்ற 13-ஆம் தேதி சட்டப் பேரவையில் நிதியமைச்சர் பி.டி.ஆர். பழனிவேல் தியாகராஜன் தாக்கல் செய்ய உள்ளார். இந்த நிதி நிலை அறிக்கையில் கொரோனா நெருக்கடியில் இருந்து தொழில் துறை மீண்டு வரும் வகையிலான அறிவிப்புகள் இருக்கும் என கோவை தொழில் முனைவோர்கள் எதிர்பார்த்துள்ளனர். இது தொடர்பாக கொடிசியா அமைப்பின் தலைவர் ரமேஷ் பாபு கூறுகையில், கொரோனா பெருந்தொற்று மற்றும் பொது முடக்கம் காரணமாக சிறு, குறு மற்றும் நடுத்தர தொழில் நிறுவனங்கள் கடுமையாக பாதிக்கப்பட்டுள்ளன. இந்த நிலையில் பட்ஜெட்டில் சிறு, குறு, நடுத்தர தொழில் நிறுவனங்களுக்கு வரி விதிப்பு சட்டங்களின் கீழ் சில தளர்வுகள் அளிப்பது மிகவும் உதவியாக இருக்கும். பல ஆயிரம் பேருக்கு வேலைவாய்ப்பு தந்து வரும் தொழில்கள் தொடர்ந்து நடத்த உதவியாக அமையும். தமிழ்நாடு மதிப்பு கூட்டு வரி சட்டம், மத்திய விற்பனை வரி சட்டம், ஜிஎஸ்டி சட்டங்களில் சில தளர்வுகளை எதிர்பார்க்கிறோம்.

வாட் மற்றும் ஜிஎஸ்டி நிலுவையில் ஒரு பகுதி வரி செலுத்தும் வகையிலும், வட்டி உள்ளிட்ட தீர்வைகளில் விலக்கு அளிக்கும் வகையில் தீர்ப்பாயம் அமைக்க வேண்டும். வாட், ஜிஎஸ்டி நிலுவையில் உள்ள தணிக்கை விபரங்களை தாக்கல் செய்ய கால அவகாசம் அளிக்க வேண்டும். மின்சாரம் மற்றும் பெட்ரொலிய பொருட்களையும் ஜிஎஸ்டி வரம்புக்குள் கொண்டு வர வேண்டும். ஜிஎஸ்டி வரியில் ஒரு கோடி ரூபாய்க்கு மேல் விற்று முதல் செய்பவர்களுக்கு பதிவு மற்றும் வரி விதிப்பு என உயர்த்த வேண்டும். ஜிஎஸ்டி தொடர்பாக கோவையில் 'ஏரியா பெஞ்ச்' எனும் முறையீட்டு நடுவர் மன்றம் அமைக்க வேண்டும். ஜிஎஸ்டி சட்டத்தில் குறிப்பிட்ட கால வரையறுக்குள், திரும்பத்தரும் தொகையை பெற வழி வகை செய்ய வேண்டும். 

ஜீலை - ஆகஸ்ட் 2021க்கான ஜிஎஸ்டி, வருமான வரி தொகையை கட்ட மேலும் 6 மாத கால அவகாசம் அளிக்க வேண்டும். ஜிஎஸ்டி தாக்கல் செய்வதற்கான தாமதக் கட்டணம் தள்ளுபடி செய்ய வேண்டும். கொரோனா நெருக்கடியில் இருந்து மீளும் வகையில் நிலுவையில் உள்ள ஜிஎஸ்டி தொகையை திருப்பி தர வேண்டும் உள்ளிட்டவற்றை அறிவிப்பதன் மூலம் சிறு தொழில்கள் உயர்வு பெறும் வகையில் நிவாரண நடவடிக்கையாக அமையும்" என அவர் தெரிவித்தார்.

பட்ஜெட் எதிர்பார்ப்புகள் குறித்து தமிழ்நாடு கைத்தொழில் மற்றும் குறுந்தொழில் முனைவோர் சங்கத்தின் கோவை மாவட்ட தலைவர் ஜேம்ஸ் கூறுகையில், "கொரோனா நெருக்கடியில் சிக்கித் தவிக்கும் குறுந்தொழில்களை மீட்டெடுக்கும் வகையில் பட்ஜெட்டில் அறிவிப்புகளை எதிர்பார்க்கிறோம். குறிப்பாக குறுந்தொழில் முனைவோர்களுக்கு 4 சதவீத வட்டி என்ற அடிப்படையில் கடன் தர வேண்டும். கொரோனா காலக்கடன் தள்ளுபடி செய்ய வேண்டும். கோவையில் குறுந்தொழில் பேட்டை அமைக்க நிதி ஒதுக்க வேண்டும். குறுந்தொழில் கூடங்களுக்கு மானிய விலையில் மின்சாரம் வழங்கவேண்டும். குறுந்தொழில்களை நெருக்கடியில் இருந்து மீட்டெடுக்க குறுந்தொழில் வாரியத்தை அமைக்கவேண்டும்" என அவர் தெரிவித்தார்.