மாட்டிறைச்சி சாப்பிடுவாயா என மாணவியை ஆசிரியை இழிவுபடுத்திய விவகாரம்; முதன்மை கல்வி அலுவலர் விசாரணை

இருதரப்பிடமும் விசாரணை நடத்தப்பட்டுள்ளது, விசாரணை இன்னும் நிறைவடையவில்லை. விசாரணை மீண்டும் தொடரும்.

அசோகபுரம் அரசுப்பள்ளி

கோவை துடியலூர் அசோகபுரம் பகுதியில் அரசு பெண்கள் உயர்நிலைப் பள்ளி செயல்பட்டு வருகிறது. இந்தப் பள்ளியில் ஏழாம் வகுப்பில் இஸ்லாமிய சமூகத்தை சேர்ந்த மாணவி ஒருவர் பயின்று வருகிறார். இவர் கோவை முதன்மை கல்வி அலுவலகத்தில் தனது பெற்றோருடன் வந்து ஆசிரியர் அபிநயா மீதும், பள்ளி தலைமை ஆசிரியர் ராஜேஸ்வரி மீதும் புகார் மனு ஒன்றை அளித்தார். அதில் வகுப்பு ஆசிரியர் அபிநயா என்பவர் மாணவியிடம் கடுமையாக நடந்து கொண்டதாகவும், இதை தொடர்ந்து மாணவி பெற்றோருடன் வந்து ஆசிரியர் அபிநயா குறித்து தலைமை ஆசிரியரிடம் முறையிட்டதாகவும் தெரிவித்துள்ளார்.

இந்நிலையில் தலைமை ஆசிரியரிடம் முறையிட்டது குறித்து ஆசிரியர் அபிநயா மாணவியிடம் வகுப்பறையில் கேட்டதாகவும், அப்போது ’உனது பெற்றோர் என்ன வேலை செய்கின்றனர்?’ என்ற கேள்விக்கு, மாட்டிறைச்சி கடை வைத்திருப்பதாக மாணவி தெரிவித்துள்ளார். அதற்கு "மாட்டுக்கறி சாப்பிட்டு திமிருடன் ஆடுறியாடி" என்று ஆசிரியர் அபிநயா சொன்னதாகவும், அதற்கு மாணவி எனது பெற்றோரை பற்றியும் தொழிலை பற்றியும் ஏன் பேசுகிறீர்கள் என்று பதிலுக்கு பேசியதற்கு, ஆத்திரம் நடந்த ஆசிரியை அபிநயா மாணவியை கண்ணத்தில் அடித்ததாகவும் புகார் மனுவில் தெரிவிக்கப்பட்டுள்ளது.

இதுகுறித்து பெற்றோருடன் பள்ளியின் தலைமை ஆசிரியர் ராஜேஸ்வரிடம் முறையிட்ட பொழுது அவரும் மிரட்டுகின்றீர்களா என்று கூறியதாகவும், மாட்டுக்கறி சாப்பிடுவியா என்று சக மாணவிகள் மத்தியில் வைத்து கேட்டும், சூவை துடைக்க வைத்தும் துன்புறுத்தியதாகவும், தனது படிப்புக்கு இவர்களால் பாதிப்பு இருக்கும் என்ற அச்சமாக இருப்பதாகவும் கூறி மாணவி இன்று கோவை மாவட்ட முதன்மை கல்வி அலுவலகத்தில் அளித்த புகாரில் தெரிவித்துள்ளார். இது தொடர்பாக பேட்டி அளித்த மாணவியின் பெற்றோர் மற்றும் உறவினர்கள், இந்த விவகாரம் தொடர்பாக ஏற்கனவே துடியலூர் காவல் நிலையத்தில் புகார் அளித்து இருந்ததாகவும், காவல் துறையினர் விசாரித்து உரிய அறிவுரை வழங்கியதுடன், பள்ளிக்கு செல்ல அறிவுறுத்திய நிலையில் மீண்டும் திரும்பவும் மாணவியை மிரட்டும் சம்பவம் நடைபெற்றதால் புகார் அளித்து இருப்பதாகவும் தெரிவித்தனர்.

இந்த நிலையில் மாணவி அளித்த முதன்மை கல்வி அலுவலர் பாலமுரளி பள்ளியில் நேரடியாக விசாரணை மேற்கொண்டார். தலைமை ஆசிரியர் ராஜேஸ்வரி, ஆசிரியர் அபிநயா, பள்ளி ஆசிரியைகள் மற்றும் மாணவியர் ஆகியோரிடம் முதன்மை கல்வி அலுவலர் விசாரணை நடத்தினார். 7 ம் வகுப்பு மாணவியுடன் படிக்கும் சக மாணவிகளிடமும் விசாரணை நடத்திய அவர், அவர்களது கருத்துகளை எழுத்துப்பூர்வமாகவும் பெற்றுக் கொண்டார். பிற்பகலுக்குப் பின்னர் ஏழாம் வகுப்பு மாணவி மற்றும் அவரது பெற்றோர்கள் விசாரணைக்கு அழைக்கப்பட்டனர். அவர்களிடம் சுமார் இரண்டரை மணி நேரத்துக்கு மேலாக விசாரணை நடைபெற்றது.

இது தொடர்பாக பேட்டியளித்த மாணவியின் உறவினர் உசேன், ”ஆசிரியர்கள் மீது முதன்மை கல்வி அலுவலரிடம் புகார் அளித்ததன் அடிப்படையில் இன்று விசாரணை நடத்தப்பட்டது. இன்று விசரணை முடிவு பெறவில்லை. விசாரணைக்கு கால அவகாசம் கேட்டு இருக்கின்றனர். அதற்கு ஒத்துழைப்பு கொடுத்து இருக்கின்றோம்’ என்றார். பின்னர் பேசிய முதன்மை கல்வி அதிகாரி பாலமுரளி, “இருதரப்பிடமும் விசாரணை நடத்தப்பட்டுள்ளது, விசாரணை இன்னும் நிறைவடையவில்லை. விசாரணை மீண்டும் தொடரும்” எனத் தெரிவித்தார்.