’வெற்றிக்கொடி கட்டு’ பாணியில் ஏமாந்த இளைஞர்கள்..சிங்கப்பூரில் வேலை வாங்கி தருவதாக மோசடி...!
சிங்கப்பூர் கட்டுமான நிறுவனத்திற்கு ஆட்கள் தேவை என்றும், சிவில் இன்ஜினியர், எலக்ட்ரிக்கல் இன்ஜினியர், சூப்பர்வைசர், ஓட்டுநர், மேலாளர் போன்ற பணியிடங்கள் உள்ளதாகவும் விளம்பரம் செய்யப்பட்டிருந்தது.
சிங்கப்பூரில் இயங்கி வரும் பிரபல கட்டுமான நிறுவனத்திற்கு ஆட்கள் தேவை என்றும், அதில் சிவில் இன்ஜினியர், எலக்ட்ரிக்கல் இன்ஜினியர், சூப்பர்வைசர், ஓட்டுநர், மேலாளர் போன்ற பணியிடங்கள் உள்ளதாகவும் தமிழ்நாடு முழுவதும் பதாகைகள் மூலமும் சுவரொட்டிகள் மூலமும் விளம்பரம் செய்யப்பட்டிருந்தது. அதேபோல செய்தித்தாள் மற்றும் இணைய தளங்களிலும் இந்த விளம்பரம் வெளியிடப்பட்டிருந்தது.
இந்த விளம்பரத்தை பார்த்த இளைஞர்கள் தமிழகத்தின் பல்வேறு பகுதிகளில் இருந்து கோவை வடவள்ளியில் உள்ள எல்.எஸ் கன்ஸ்டிரக்சன் என்ற பெயரிலும் அஃப்போட் டூர்ஸ் & டிராவல்ஸ் என்ற பெயரிலும் செயல்படும் நிறுவனத்தை தொடர்பு கொண்டனர். இப்படி தொடர்பு கொண்ட 150க்கும் மேற்பட்டவர்களிடம் அந்த நிறுவன ஊழியர்கள் மற்றும் நிர்வாகிகள் வேலை வாங்கி தருவதாக கூறி, ஒவ்வொருவரிடமிருந்தும் பதிவு செய்யும் வேலைக்கேற்ப ஒரு லட்சம் முதல் மூன்று லட்சம் வரை பணத்தைப் பெற்றுள்ளனர். பின்னர் உறுதியளித்தபடி வெளிநாட்டிற்கு அனுப்பாமல் இழுத்தடித்து வந்துள்ளனர். பணம் கொடுத்தவர்கள் பணத்தை திருப்பிக் கேட்ட நிலையில், பணத்தை திருப்பித் தராமல் இருந்து வந்துள்ளனர்.
இந்நிலையில், ஒரு சிலருக்கு விமான பயண சீட்டுகளையும் வழங்கி கடந்த 8ம் தேதியன்று சென்னை சென்று கொரோனா பரிசோதனைகள் எல்லாம் செய்து விட்ட பின், சிங்கப்பூர் அழைத்துச் செல்வதாக தெரிவித்த அந்த நிறுவனத்தார் திடீரென தகவல் தொடர்புகள் அனைத்தையும் துண்டித்து விட்டனர். பணத்தை கொடுத்தவர்கள் போன் செய்தும் நிர்வாகிகள் எடுக்காமல் சிறிது நேரத்தில் சுவிட்ச் ஆப் செய்தனர். இதில் சந்தேகம் அடைந்தவர்கள் நேரில் வந்து பார்த்த போது, அந்நிறுவனம் பூட்டப்பட்டிருந்தது. அந்நிறுவனத்தில் பணியாற்றி வந்தவர்கள் தலைமறைவாகி விட்டதாக கூறப்படுகிறது.
இதனைத் தொடர்ந்து தாங்கள் ஏமாற்றப்பட்டதை அறிந்த பாதிக்கப்பட்டவர்கள் ஒன்றிணைந்து கோவை மாவட்ட காவல் கண்காணிப்பாளரிடம் புகார் மனு அளித்தனர். இந்த புகாரின் பேரில் காவல் கண்காணிப்பாளர் பத்ரி நாராயணன் உத்தரவின் பேரில், குற்ற பிரிவு காவல் துறையினர் வழக்குப் பதிவு செய்து விசாரணை மேற்கொண்டு வந்தனர். மேலும் மோசடி செய்து தலைமறைவாக இருந்த மோசடி ஏஜென்சி நிறுவனத்தின் உரிமையாளர் ராமமூர்த்தி, மேலாளர் மோகன கிருஷ்ணன் மற்றும் ஊழியர்கள் சரண்யா, ஜோதி ஆகியோர் தேடி வந்தனர்.
இந்த நிலையில் தலைமறைவாகியிருந்த நிறுவனத்தின் மேலாளர் கோவில்பாளையத்தைச் சேர்ந்த மோகன கிருஷ்ணன் என்பவரை காவல் துறையினர் கைது செய்துள்ளனர். மேலும் அவரிடம் இருந்த 21 லட்சம் ரூபாய் ரொக்கம் மற்றும் சொகுசு கார் ஆகிவற்றையும் பறிமுதல் காவல் துறையினர் செய்து விசாரணை மேற்கொண்டு வருகின்றனர். தொடர்ந்து தலைமுறைவாகியுள்ள மூன்று பேரையும் காவல் துறையினர் வலை வீசி தேடி வருகின்றனர்.
மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்
ABP நாடு செய்திகளை சமூக வலைத்தள பக்கங்களிலும் பின் தொடரலாம்
தலைப்பு செய்திகள்
ட்ரெண்டிங் செய்திகள்
