காவியுடை படத்தால் சர்ச்சை : எதிர்ப்புகளால் வெள்ளை உடைக்கு மாற்றப்பட்ட திருவள்ளுவர்..!
வேளாண்மை பல்கலைக்கழகத்தில் காவி திருவள்ளுவர் படம் வைக்கப்பட்டு இருந்தது சர்ச்சையை ஏற்படுத்தியது.
தமிழ்நாடு வேளாண்மை பல்கலைகழகத்தில் வைக்கப்பட்ட காவி திருவள்ளுவர் படத்திற்கு எதிர்ப்புகள் கிளம்பியதை அடுத்து, வெள்ளை நிற உடையணிந்த திருவள்ளுவர் படம் வைக்கப்பட்டுள்ளது. உலகப் பொதுமறை என திருக்குறள் போற்றப்படுகிறது. அதனை எழுதிய திருவள்ளுவர் எந்த அடையாளத்திற்குள்ளும் அடைபட்டுவிடாத வகையில், வெள்ளை உடையணிந்த படமே தமிழ்நாடு அரசால் அங்கீகரிக்கப்பட்டு, அனைத்து இடங்களிலும் பயன்படுத்தப்பட்டு வருகிறது. இதனிடையே கடந்தாண்டு மாநில பாஜகவின் அதிகாரப்பூர்வ ட்விட்டர் பக்கத்தில் காவி உடையணிந்து, திருநீறு பூசியபடி சித்தரிக்கப்பட்ட திருவள்ளுவர் படம் வெளியிடப்பட்டது சர்ச்சையை ஏற்படுத்தியது. இதைத்தொடர்ந்து துணை குடியரசுத் தலைவர் வெங்கையா நாயுடுவும் காவி திருவள்ளுவர் படத்தை தனது டிவிட்டர் பக்கத்தில் வெளியிட்டதற்கு, எதிர்ப்பு கிளம்பியது. திருவள்ளுவர் படத்திற்கு காவிச் சாயம் பூச பாஜக முயற்சிப்பதாக புகார்கள் எழுந்தன.
இந்நிலையில் கோவையில் உள்ள தமிழ்நாடு வேளாண்மை பல்கலைக் கழகத்தில் பராமரிப்பு பணிகள் மேற்கொண்டுள்ளனர். அப்போது பல்கலைக்கழகத்திற்குள் உள்ள நூலக நுழைவு வாயிலில் புதிதாக திருவள்ளுவர் படம் பொருத்தப்பட்டுள்ளது. இந்த படம் காவி உடையணிந்தபடி இருக்கும் திருவள்ளுவர் படம் வைக்கப்பட்டுள்ளது. தமிழ்நாடு அரசின் கீழ் இயங்கும் வேளாண்மை பல்கலைக் கழகத்தில் காவி திருவள்ளுவர் படம் வைக்கப்பட்டு இருந்தது சர்ச்சையை ஏற்படுத்தியது.
இது தொடர்பான புகைப்படங்கள் வெளியாகிய நிலையில் தந்தை பெரியார் திராவிடர் கழகம், சமூக நீதிக் கட்சி உள்ளிட்ட அமைப்பினரும் காவி திருவள்ளுவர் படம் வைக்கப்பட்டதற்கு எதிர்ப்பு தெரிவித்தனர். அதேபோல பல்கலைக்கழகத்தின் மீது சமூக வலைதளங்களில் கடும் விமர்சனங்கள் எழுந்தன. தமிழ்நாடு அரசால் அங்கீகரிக்கப்பட்ட வெள்ளை உடையணிந்த திருவள்ளுவர் படமே அனைத்து இடங்களிலும் பயன்படுத்தப்பட்டு வரும் நிலையில், காவி உடையணிந்த திருவள்ளுவர் படம் அதிகாரிகளால் வைக்கப்பட்டு இருப்பதாக புகார்கள் எழுந்தன. உலகப் பொதுமறையான திருக்குறள் தந்த திருவள்ளுவரை ஒரு மதச்சாயம் ஏற்படுத்துவது ஏற்புடையது அல்ல எனவும், இது தொடர்பாக அரசு விசாரணை நடத்தி காவி உடையணிந்த திருவள்ளுவர் படம் வைத்த அதிகாரிகள் மீது நடவடிக்கை எடுக்க வேண்டுமென பல்வேறு தரப்பினரும் வலியுறுத்தினர்.
இதையடுத்து நூலகத்தில் வைக்கப்பட்டு இருந்த காவி உடையணிந்த திருவள்ளுவர் படத்தை பல்கலைக்கழக நிர்வாகம் உடனடியாக அகற்றியது. அந்த இடத்தில் வெள்ளை உடையணிந்த திருவள்ளுவர் படம் வைக்கப்பட்டுள்ளது. இதனால் காவி திருவள்ளுவர் சர்ச்சைக்கு பல்கலைக்கழக நிர்வாகம் முற்றுப்புள்ளி வைத்துள்ளது. தமிழ்நாடு வேளாண்மை பல்கலைகழகத்தின் இந்த நடவடிக்கைக்கு பல்வேறு தரப்பினரும் வரவேற்பு தெரிவித்தனர். உலகப் பொதுமறை தந்த திருவள்ளுவர் படம் அனைவருக்கும் பொதுவானதாக எந்த நிறமும் இல்லாமல் வெள்ளை உடையில் இருக்க வேண்டுமென்பதே பெரும்பாலானோரின் விருப்பமாக உள்ளது.
தலைப்பு செய்திகள்
ட்ரெண்டிங் செய்திகள்
