தொடர் விடுமுறை..! நிரம்பி வழிந்த பேருந்துகள்..! நள்ளிரவில் காத்துக் கிடந்த பயணிகள்..!

தொடர் விடுமுறையின் காரணமாக சென்னை திருச்சி தேசிய நெடுஞ்சாலையில் போக்குவரத்து நெரிசல் ஏற்பட்டது

பரனூர் சுங்கச்சாவடி காத்துக்கிடந்த பயணிகள்

தொடர் விடுமுறை நாட்கள் மற்றும் பண்டிகை நாட்கள் வருகின்ற பொழுதெல்லாம் சென்னையில் வசிக்கின்ற பிற மாவட்டங்களை சேர்ந்த, மக்கள் தங்கள் சொந்த ஊரை நோக்கி படையெடுப்பது தொடர்ந்து வருகிறது. எனவே வருகின்ற ஞாயிற்றுக்கிழமை உலகம் முழுவதும் கிறிஸ்துமஸ் திருவிழாவானது கொண்டாடப்பட உள்ளது. இயேசு கிறிஸ்து பிறந்த தினமாக கருதப்படும் டிசம்பர் 25ஆம் தேதி, கிறிஸ்தவ மதம் பின்பற்றும் அனைவரும் கொண்டாடுவது வழக்கம்.

 

இதனை ஒட்டி தென் தமிழகம், வட தமிழகம் உள்ளிட்ட தமிழ்நாட்டுச் சேர்ந்த பல்வேறு மாவட்டங்களை சேர்ந்தவர்கள். பணி உள்ளிட்ட காரணங்களுக்காக சென்னை மற்றும் சென்னையின் புறநகர் பகுதியில் தங்கி வேலை பார்த்து வரும், பிற மாவட்டத்தை சேர்ந்தவர்கள் இன்று மாலை முதலே அவர்கள் சொந்த ஊரை நோக்கி படையெடுக்க துவங்கியதால் , சென்னையின் புறநகர் பகுதிகளில் கடும் போக்குவரத்து நெரிசலானது ஏற்பட்டது. 

 

நிரம்பி வழிந்த பேருந்துகள்

 

இதேபோல் முக்கிய வழித்தடமாக இருக்கும் சென்னை - திருச்சி தேசிய நெடுஞ்சாலையிலும் ஆங்காங்கே போக்குவரத்து நெரிசல் ஏற்பட்டது. சென்னை திருச்சி தேசிய நெடுஞ்சாலையில் இருக்கும் முக்கிய சுங்கச்சாவடியான பரனூர் சுங்கச்சாவடியில் மாலை முதலே தொடர்ந்து போக்குவரத்து நெரிசல் இருந்து வந்தன. இந்த போக்குவரத்து நெரிசல் சற்று குறைவாக இருந்தாலும் தொடர்ந்து வாகனங்கள் அணிவகுத்து சென்று கொண்டிருந்தன. அதேபோல் பல ஊர்களுக்கு முறையாக பேருந்து வசதிகள் செய்து தரவில்லை என அந்த ஊர் பொதுமக்கள் குற்றச்சாட்டை முன் வைத்தனர்.

 

சென்னையின் மற்றொரு புறநகர் பகுதியாக இருக்கும் பெருங்களத்தூர் பகுதியில் நள்ளிரவு மற்றும் மாலை வேலைகளில் கடும் போக்குவரத்து நெரிசலானது காணப்பட்டது. மேலும் பேருந்துகள் முழுவதும் நிரம்பி வழிந்தன, சில ஊர்களுக்கு குறைந்த அளவு பேருந்துகளை இயக்கப்பட்டதால் வேறு வழியில்லாமல், நள்ளிரவில் நின்று கொண்டே பல பயணிகள் பயணம் செய்தனர்.நீண்ட நேரமாக பரனூர் சுங்கச்சாவடி ஏராளமான பயணிகள் காத்துக் கிடந்தனர்.

 

விபத்தால் ஏற்பட்ட போக்குவரத்து நெரிசல்

 

 சென்னையில் இருந்து சிறப்பு பேருந்துகள் இயக்கப்பட்டு வருகின்றன. சென்னையிலிருந்து திருச்சிக்கு நோக்கி சென்ற அரசு பேருந்து ஓட்டுனர் ராதாகிருஷ்ணன் என்பவர் இயக்கி வந்தார். அப்பொழுது ஊரப்பாக்கம் டீக்கடை பேருந்து நிறுத்தம் அருகே வந்த பொழுது, எதிர்பாராத விதமாக விபத்து ஏற்பட்டதில், பேருந்திற்கு முன்னே சென்ற 3 இரு சக்கர வாகனங்கள் அடுத்தடுத்து விபத்துக்குள்ளானது. இந்த இரு சக்கர வாகனத்தில் பயணம் செய்த நபர்கள், அதிர்ஷ்டவசமாக சிறு காயங்களுடன் அனைவரும் உயிர் தப்பினர். பேருந்தில் பயணம் செய்த 40-க்கும் மேற்பட்டோர் சிறு காயங்களுடன் அதிர்ஷ்டவசமாக உயிர் தப்பினர்.

 

இந்த விபத்தின் காரணமாக சென்னை - திருச்சி தேசிய நெடுஞ்சாலியில் ஒரு மணி நேரத்துக்கு மேலாக கடும் போக்குவரத்து நெரிசல் ஏற்பட்டது. மாற்று அரசு பேருந்து ஏற்பாடு செய்யப்பட்டு, பொதுமக்கள் பத்திரமாக வேறு பேருந்து வழியாக திருச்சிக்கு அனுப்பி வைக்கப்பட்டனர்