Sri Reddy On Samantha Chaitanya Divorce | ''அவர் ஒரு தன்பாலின ஈர்ப்பாளர்''.. சமந்தா விவாகரத்து குறித்து பேசிய ஸ்ரீரெட்டி!!

சமந்தா விவாகரத்து குறித்து சர்ச்சை நடிகை ஸ்ரீரெட்டி கருத்து கூறியுள்ளார்

நடிகை ஸ்ரீரெட்டி

இந்திய திரையுலகின் முன்னணி நட்சத்திரங்களான சமந்தா மற்றும் நாகசைதன்யா ஆகியோர் விவாகரத்து செய்யப்போவதாக சமீபத்தில் அதிகாரப்பூர்வமாக அறிவித்தனர். சமந்தா - நாகசைதன்யாவின் விவாகரத்துக்கு பல்வேறு காரணங்கள் சொல்லப்பட்டது. ஆனால், அவ்வாறு தெரிவிக்கப்படும் காரணங்களை இருவரும் மறுத்து வந்தனர். விவாகரத்து குறித்த பதிவிலேயே இருவரும் தெளிவாக விளக்கம் அளித்திருந்தனர். 

இந்நிலையில், சமந்தாவின் ஸ்டைலிஸ்ட் உதவியாளர் ஒருவர்தான் சமந்தா - சைதன்யா விவாகரத்திற்கு முக்கிய காரணம் என சில யூட்யூப் சேனல்கள் செய்தி பரப்பி வந்தன. இது குறித்து சமந்தா தரப்பில் பெரிதும் கண்டுக்கொள்ளப்படாமல் இருந்தது. ஆனால், ஸ்டைலிஸ்ட் ப்ரீத்தம் ஜூகல்கார் இது குறித்து பேசினார். அதில், “சமந்தா என் சகோதரியைப் போல. சமந்தா - நாகசைதன்யாவுக்கு நெருக்கமானவர்களுக்கு எங்களது உறவைப் பற்றி தெரியும். 

நாக சைதன்யாவுக்கு நன்றாகவே தெரியும். இந்த சூழலில், சமந்தா - நாக சைதன்யா விவாகரத்திற்கு நான் காரணம் என சில மீடியாக்கள் சொல்லி வருவது வருத்தம் அளிக்கிறது. சமந்தா - நாக சைதன்யாவின் ரசிகர்கள் என்னை கொலை செய்துவிடுவதாகவும் மிரட்டி வருகின்றனர். இடைவெளி இல்லாமல் எனக்கு அழைப்புகள் வந்துகொண்டே இருக்கின்றது. இது குறித்து சைபர் க்ரைம் போலீஸில் புகார் அளித்துள்ளேன். எனினும், சகோதரி சமந்தாவுக்காக இந்த டிரால், மீம்ஸ், மிரட்டல்களை சமாளித்து கடந்து செல்ல வேண்டும் என்பதில் உறுதியாக இருக்கின்றேன்” என தெரிவித்திருந்தார்.

இந்நிலையில் சர்ச்சைக்கருத்துகள் மூலம் தொடர்ந்து வைரலில் இருக்கும் நடிகை ஸ்ரீரெட்டி, சமந்தா விவகாரம் குறித்து வாய்திறந்துள்ளார். குறிப்பாக சமந்தாவுடன் கிசுகிசுக்கப்பட்ட ப்ரீத்தம் தொடர்பாக ஸ்ரீரெட்டி பேசியுள்ளார். அதில், சமந்தாவின் விவாகரத்துக்கு அவரது ஸ்டைலிஸ்ட் ப்ரீத்தம் ஜூகல்கார் நிச்சயம் ஒரு காரணமாக இருக்க மாட்டார். ஏனென்றால் அவர் ஒரு தன்பாலின ஈர்ப்பாளர் ( GAY). அதனால் காதல் சர்ச்சைக்கு அவர் பொறுப்பாக மாட்டார் என குறிபிட்டுள்ளார்.

முன்னதாக,க்ளாமர் ஃபோட்டோஷூட்டில் கலந்து கொண்டது தான் விவாகரத்துக்கு காரணம் என்று சொல்லப்பட்டது. அதுமட்டுமல்லாமல், அவர் டிசைனரை காதலித்ததாகவும். அவருடன் நெருக்கமாகப் பழகி கருக்கலைப்பு வரை சென்றதாகவும் கிசுகிசுக்கள் எழுந்தன. ஆனால் அவற்றை மறுத்த சமந்தா வதந்தி பேசும் சமூகத்துக்காக இன்ஸ்டாகிராமில் சாட்டையடி கொடுத்தார். ''நான் இன்னொருவர் மீது காதல் வயப்பட்டதாகவும், குழந்தை வேண்டாமென்றும் கூறியதாகவும், கருக்கலைப்பு செய்ததாகவும் சிலர் கூறுகிறார்கள். என் மீதான தொடர் வதந்திகளும், தனி நபர் தாக்குதலும் தொடர்கிறது. ஆனால் இதுவெல்லாம் என்னை ஒருபோதும் காயப்படுத்தாது'' என்று குறிப்பிட்டு ஊர் வாய்க்கு மூடி போட்டார் என்பது குறிப்பிடத்தக்கது.