மழை பிடிக்காத மனிதன் படத்துக்கும் எனக்கும் சம்பந்தமில்லை - இயக்குநர் விஜய் மில்டன் பரபரப்பு பேட்டி

மழை பிடிக்காத மனிதன் படத்தின் இயக்குனர் விஜய் மில்டன் தனக்கே தெரியாமல் படத்தில் ஒரு நிமிட காட்சி இணைக்கப்பட்டுள்ளதாக அதிர்ச்சியுடன் தெரிவித்துள்ளார்.

விஜய் மில்டன் - விஜய் ஆண்டனி

Source : twitter

தமிழ் திரையுலகின் முன்னணி நடிகர்களில் ஒருவராக உலா வருபவர் விஜய் ஆண்டனி. இவரது நடிப்பில் உருவாகியுள்ள மழை பிடிக்காத மனிதன் இன்று திரையில் வெளியாகியுள்ளது. இந்த படத்தை ஒளிப்பதிவாளரும், இயக்குனருமாகிய விஜய் மில்டன் இயக்கியுள்ளார்.

எனக்கே அதிர்ச்சி:

இந்த நிலையில், படத்தின் இயக்குனரான விஜய் மில்டன் பரபரப்பான பேட்டி ஒன்று அளித்துள்ளார். அதில் அவர் கூறியிருப்பதாவது, மழை பிடிக்காத மனிதன் படத்தை பத்திரிகையாளர்களுடன் அமர்ந்து பார்க்க வேண்டும் என்று பார்த்தேன். இந்த படத்தில் இந்த ஹீரோ யார்? இவன் ரவுடியா? இவன் டாக்டரா? இவன் எங்கே இருந்து வந்தவன்? அப்படி கேள்விகளை வைத்தே படம் எழுதியிருக்கேன்.

மர்மமா ஒரு மனிதன் வர்றான்? அவன் கூட வர்ற சரத்குமார் யாரு? இது பின்னாடி என்ன கதை இருக்கிறது? திடீர்னு சென்னையில் ஒரு அமைச்சரை தேடுகிறார்கள்? இவனை காப்பாத்த வர்றவங்க யாரு? இவனைத் தேடி வர்றவங்க யாரு?  இதை வைத்துதான் கதை பண்ணியுள்ளோம். ஆனால், படம் பாக்கும்போது எனக்கே ஷாக்கா இருந்தது.

எனக்கே தெரியாமல் 1 நிமிட காட்சி:

படத்துக்கு முன்னாடி 1 நிமிடத்திற்கு ஒரு வரும் காட்சிக்கும் எனக்கும் எந்த தொடர்பும் இல்லை. அது நான் வைக்கவில்லை. அது எப்படி வந்தது என்றே எனக்குத் தெரியவில்லை. அந்த காட்சியில் அவன் யார்? அதன் பேக்ஸ்டோரி என்ன? என்பதை தெளிவாக சொல்லிட்டாங்க. அதை சொல்லிட்டா படம் எப்படி பார்க்கிறது? அதுக்குத்தான் இவ்வளவு கஷ்டப்பட்டோம்.

இப்படி ஒரு காட்சி வருகிறது என்றால் அதற்கு ஏற்றாற்போல நான் திரைக்கதை எழுதியிருப்பேன். எடுத்து முடித்த  படத்தில் சென்சார் வாங்கிய படத்தில் இப்படி ஒரு காட்சியை சேர்க்கும் உரிமையை யார் கொடுத்தார்கள்?என்பது தெரியவில்லை. ஒரு இயக்குனரை கேட்காமல் ஒரு நிமிட காட்சியை சேர்த்து ஒரு படத்தை காலி செய்கிறார்கள்,

வேண்டுகோள்:

தயவு செய்து ஒரு நிமிடத்தை மறந்துவிட்டு படத்தை பாருங்கள். அதை சொல்லிவிட்டால் நான் யார்? யார்? என்று சின்ன சின்ன மர்மமாக படம் செய்துள்ளேன். அதை ஓபன் பண்ணிவிட்டால் எல்லாரும் கையை கட்டிவிட்டு படம் பார்ப்பார்கள். நான் அதில் ஆழமாக போக விரும்பவில்லை. தயவு செய்து உங்கள் எல்லாருக்கும் ஒரு வேண்டுகோள். படத்தில் முன்னால் வரும் ஒரு நிமிடத்தை மறந்துவிட்டு படத்தை பாருங்கள். அது நான் சேர்க்கவில்லை. அதற்கும் எனக்கும் எந்த சம்பந்தமும் இல்லை.

இவ்வாறு அவர் பேசினார்.

விஜய் ஆண்டனி நடிப்பில் விஜய் மில்டன் இயக்கத்தில் உருவாகியுள்ள இந்த படத்தை லலிதா, பிரதீப் மற்றும் பங்கஜ் போஹ்ரா தயாரித்துள்ளனர். இந்த படத்தில் சத்யராஜ், சரத்குமார், முரளி ஷர்மா, சரண்யா பொன்வண்ணன் ஆகியோரும் நடித்துள்ளனர்.