உயிர் உங்களது தேவி...அகநக பாடல் ப்ரொமோஷன்... மாறி மாறி ட்வீட் செய்த ’வந்தியத்தேவன்’ கார்த்தி - ’குந்தவை’ த்ரிஷா!

சக்திஸ்ரீ கோபாலன் பாடியுள்ள இந்தப் பாடலின் பிஜிஎம் முதல் பாகத்திலேயே வெளியானது.

பொன்னியின் செல்வன் கார்த்தி - த்ரிஷா

கல்கியின் பிரபலமான நாவலான 'பொன்னியின் செல்வன்' கதையை மையமாக வைத்து இயக்குனர் மணிரத்னம் இயக்கிய பொன்னியின் செல்வன் திரைப்படம், இரண்டு பாகங்களாக உருவானது. அதில் முதல் பாகம் கடந்த ஆண்டு செப்டம்பர் மாதம் வெளியாகி 500 கோடி வசூல் செய்தது.

இந்தப் பெரும் வெற்றியைத் தொடர்ந்து 'பொன்னியின் செல்வன்' இரண்டாம் பாகம் வரும் ஏப்ரல் 28ம் தேதி கோலாகலமாக உலகெங்கிலும் உள்ள திரையரங்குகளில் வெளியாக உள்ளது. ஜெயம் ரவி, கார்த்தி, விக்ரம், த்ரிஷா, ஐஸ்வர்யா ராய், ஐஸ்வர்யா லக்ஷ்மி மற்றும் பலர் நடித்துள்ள இப்படத்திற்கு இசையமைத்துள்ளார் ஏ.ஆர். ரஹ்மான்.  

மாலை வெளியாகும் அக நக பாடல் :

பொன்னியின் செல்வன் 2 திரைப்படம் அடுத்த மாதம் வெளியாகும் நிலையில் அவற்றின் அப்டேட் பற்றி அறிந்து கொள்ள ரசிகர்கள் மிகுந்த ஆர்வம் காட்டி வருகிறார்கள். அந்த வகையில் இப்படத்தின் முதல் சிங்கிள் பாடலான 'அக நக...' பாடலின் முழு வெர்ஷன் இன்று மாலை 6 மணிக்கு வெளியாக உள்ளது.

சக்திஸ்ரீ கோபாலன் பாடியுள்ள இந்தப் பாடலின் பிஜிஎம் முதல் பாகத்திலேயே வெளியானது. இருப்பினும் இந்தப் பாடலின் முழு வெர்ஷன் இரண்டாம் பாகத்தில் தான் திரையிடப்படவுள்ளது. இந்த அறிவிப்பு குறித்த முன்னோட்டம் வெளியானதில் இருந்து மிகவும் ஆவலுடன் மாலை வெளியாக இருக்கும் அக நக பாடலுக்காக உற்சாகத்துடன் காத்திருக்கிறார்கள்.

ட்விட்டர் கலந்துரையாடல் :

இந்நிலையில் இந்த சுவாரஸ்யத்தைக் கூட்டும் விதமாக நடிகர் கார்த்தி ட்விட்டர் மூலம் த்ரிஷாவை டேக் செய்து 'இளையபிராட்டி… ஹாய்' என முன்னதாக ட்வீட் செய்துள்ளார். அதற்கு திரிஷா 'என்ன வாணர்குல இளவரசே?' என ரீட்வீட் செய்திருந்தார். இப்படி ட்விட்டர் மூலம் தொடங்கியது இவர்களின் கலந்துரையாடல். மேலும்

கார்த்தி : 'தங்கள் தரிசனம் கிடைக்குமா ?'

த்ரிஷா : ம்ம்ம்…யோசித்து செய்தி அனுப்புகிறேன்.

கார்த்தி : கடல் கடந்து சென்று உங்கள் ஆணையை நிறைவேற்றிவிட்டு வருபவனுக்கு மோரை மட்டும் கொடுத்து அனுப்பி விடமாட்டீர்களே.. ?

த்ரிஷா : வேறென்ன வேண்டும் வந்தியத்தேவருக்கு? கொடுத்த பொருளை திருப்பி கேட்கப்போகிறீர்களா ?

கார்த்தி : ஐயய்யோ என் உயிர் என்றுமே உங்களுடையது தேவி.  நான் பழையாறை வந்ததும் நாம் vibeஆக ஒரு பாடல் தயார் செய்ய சொல்லுங்களேன்….

திரிஷா : வீரரே பாடல் எப்போதோ ready மாலை 6 மணி வரை காத்திருங்கள்” என தங்கள் கதாபாத்திரங்களாக மாறி ட்வீட் செய்து தங்கள் ஃபாலோயர்களை மகிழ்வித்து வருகின்றனர்.

வெளியான போஸ்டர் :

சில தினங்களுக்கு முன்னர் அக நக பாடல் வெளியிடப்படுவதை அறிவிக்கும் விதமாக கண்கள் கட்டப்பட்ட நிலையில் முட்டி போட்டு அமர்ந்து இருக்கும் கார்த்தி, கையில் கம்பீரமாக வாளுடன் த்ரிஷா இருவரும் நிற்கும் போஸ்டர் ஒன்று வெளியாகி பொன்னியின் செல்வன் ரசிகர்களை மகிழ்வித்தது குறிப்பிடத்தக்கது.