Thalapathy Vijay: இன்றே சினிமாவில் கடைசி நாள்.. விலகும் விஜய்.. சோகத்தில் ரசிகர்கள்!

கடந்த ஏப்ரலில் ஜனநாயகன் முழு படமும் இணையத்தில் சட்ட விரோதமாக வெளியான நிலையில் அதனையும் மீறி தியேட்டரில் படத்தைப் பார்க்க அனைத்து தரப்பு மக்களும் ஆர்வமுடன் காத்திருக்கின்றனர்.

தளபதி விஜய்

Source : ABP

தமிழ்நாட்டின் முதலமைச்சரான விஜயின் ஜனநாயகன்  படம் நாளை வெளியாகவுள்ள நிலையில் சினிமாவில் இதுவே அவரின் கடைசி நாளாக பார்க்கப்படுகிறது. இதனால் ரசிகர்கள் சோகமடைந்துள்ளனர். 

ஜனநாயகன் படம்

ஹெச்.வினோத் இயக்கத்தில் கேவிஎன் புரொடக்‌ஷன்ஸ் தயாரிப்பில் உருவாகியுள்ள படம் “ஜனநாயகன்”. தமிழ் சினிமாவின் தளபதி விஜய் ஹீரோவாக நடித்துள்ள இப்படம் அவரின் சினிமா வாழ்க்கையில் கடைசிப்படமாகும். முழு நேர அரசியலில் ஈடுபடும் வண்ணம் சினிமாவை விட்டு விலகுவதாக 2024ம் ஆண்டே அறிவித்த நிலையில் அப்போது அவரின் கைவசம் ஒரு படம் இருந்தது. அதைத் தவிர இன்னொரு படம் நடித்து விட்டு விலகுகிறேன் என சொன்னார். அந்த படம் தான் “ஜனநாயகன்”. 

இந்த படத்தில் பூஜா ஹெக்டே, பிரியாமணி, நரேன், மமிதா பைஜூ, பாபி தியோல், நாசர், கௌதம் வாசுதேவ் மேனன், ஸ்ரீநாத் உள்ளிட்டோர் நடித்துள்ளனர். அதுமட்டுமல்லாமல் லோகேஷ் கனகராஜ், நெல்சன் திலீப்குமார், அட்லீ ஆகியோர் விஜயின் மேல் கொண்ட அன்பால் இப்படத்தில் ஒரு காட்சியில் தோன்றியுள்ளனர். இசையமைத்துள்ள அனிருத்தும் ஒரு பாடலுக்கு விஜயுடன் இணைந்து நடனமாடியுள்ளார். 

படம் ரிலீஸ் - களைகட்டிய தியேட்டர்கள்

இதற்கிடையில் ஜனநாயகன் படம் நாளை உலகமெங்கும் வெளியாகவுள்ளது. இப்படம் 2026 பொங்கலுக்கு வெளியாகும் என அறிவிக்கப்பட்டு பல பிரச்னைகள் காரணமாக தள்ளிப்போய் கொண்டே இருந்தது. தற்போது விஜய் அரசியலுக்கு வந்து தமிழ்நாட்டின் முதலமைச்சராக பொறுப்பேற்று விட்டார். ஜனநாயகன் படமும் பிரச்னைகளை தீர்த்து ரிலீசுக்கு தயாராகி விட்டது. தமிழ்நாட்டில் 950 தியேட்டர்களில் படம் வெளியாகவுள்ள நிலையில் ஒவ்வொரு தியேட்டரிலும் 4 நாட்களுக்கான டிக்கெட்டுகள் விற்று தீர்ந்து விட்டது. 

கடந்த ஏப்ரலில் ஜனநாயகன் முழு படமும் இணையத்தில் சட்ட விரோதமாக வெளியான நிலையில் அதனையும் மீறி தியேட்டரில் படத்தைப் பார்க்க அனைத்து தரப்பு மக்களும் ஆர்வமுடன் காத்திருக்கின்றனர். இதனால் விஜயின் கடைசிப்படமான ஜனநாயகன் வசூல் மழை பொழியும் என எதிர்பார்க்கப்படுகிறது. 

சோகத்தில் விஜய் ரசிகர்கள்

என்னதான் விஜய் படம் வெளியாவது மகிழ்ச்சியளித்தாலும் ஒருபுறம் ரசிகர்கள் மிகுந்த கவலையில் ஆழ்ந்துள்ளனர். தங்கள் தளபதியை இனி எப்போது திரையில் காண்போமோ என தங்களுக்காகவே கேள்வி எழுப்பி வருகின்றனர். மற்றவர்கள் போல அரசியலில் சரிவை கண்டவுடன் மீண்டும் சினிமாவில் நடிப்பவர் அல்ல விஜய். தான் சொன்ன சொல்லில் உறுதியாக இருப்பவர் என்பதால் இனிமேல் அவரின் படங்களை ரீ-ரிலீஸ் செய்து பார்த்துக் கொள்ள வேண்டியது தான் ஆறுதல் சொல்லிக் கொள்கின்றனர். 

நாளை ஜனநாயகன் வெளியாகும் நிலையில் சினிமாவில் இன்றே விஜயின் கடைசி நாள் என சொல்லப்படுகிறது. சமூக வலைத்தளங்கள் முழுக்க மிஸ் யூ தலைவா.. இனி இப்படி ஒரு தருணம் அமையாதா.. என சிலாகித்து பதிவுகளை வெளியிட்டு வருகின்றனர்.