Aneethi Teaser: ரத்தம் தெறிக்க விறுவிறு ஆக்‌ஷன்... பயம் காட்டும் அர்ஜூன் தாஸ்... வெளியான ‘அநீதி’ டீசர்!

நடிகர் அர்ஜூன் தாஸ் 'அந்தகாரம்' படத்துக்குப் பிறகு ஹீரோவாக இந்தப் படத்தில் நடித்துள்ளார். துஷாரா விஜயன்  முதன்முறையாக இப்படத்தில் அர்ஜூன் தாஸூக்கு ஜோடியாக நடித்துள்ளார்.

அநீதி படக் காட்சி

வசந்தபாலன் இயக்கத்தில் அர்ஜூன் தாஸ், துஷாரா நடித்துள்ள 'அநீதி' படத்தின் டீசர் வெளியாகியுள்ளது.

கவனமீர்த்த டீசர்

ஜெயில் படத்துக்குப் பிறகு இயக்குநர் வசந்தபாலன் இயக்கத்தில் வெளியாகும் திரைப்படம் அநீதி. நடிகர் அர்ஜூன் தாஸ் 'அந்தகாரம்' படத்துக்குப் பிறகு ஹீரோவாக இந்தப் படத்தில் நடித்துள்ளார். துஷாரா விஜயன்  முதன்முறையாக இப்படத்தில் அர்ஜூன் தாஸூக்கு ஜோடியாக நடித்துள்ளார்.

மேலும், நடிகை வனிதா விஜயகுமார், நடிகர்கள் புகழ், காளி வெங்கட் ஆகியோர் இப்படத்தில் முக்கியக் கதாபாத்திரங்களில் நடித்துள்ளனர். ஜி.வி.பிரகாஷ் இப்படத்துக்கு இசையமைத்துள்ளார்.

இந்நிலையில், இப்படத்தின் டீசர் இன்று வெளியாகியுள்ளது. த்ரில்லர் ஜானரில் விறுவிறுப்பாக அமைந்துள்ள இந்த டீசரில் டெரர் லுக்கில் அர்ஜூன் தாஸ் தோன்றும் காட்சிகள் கவனமீர்த்துள்ளன.

 

மாஸ்டர், விக்ரம் உள்ளிட்ட படங்களில் கேமியோ கதாபாத்திரங்களில் நடித்து தனக்கென தனி ரசிகர்கள் பட்டாளத்தைக் கொண்டுள்ள அர்ஜூன் தாஸ், நீண்ட இடைவெளிக்குப் பிறகு இப்படத்தில் ஹீரோவாக நடித்துள்ளது அவரது ரசிகர்களை உற்சாகத்தில் ஆழ்த்தியுள்ளது.

தள்ளிப்போன ரிலீஸ்

முதலில் பெயரிடப்படாமலேயே தொடங்கிய இந்தப் படத்தின் படப்பிடிப்பு சென்னையைச் சுற்றியுள்ள பல்வேறு இடங்களில் நடைபெற்று வந்தது. தொடர்ந்து கடந்த ஆண்டு விநாயகர் சதுர்த்தியை முன்னிட்டு ‘அநீதி’ எனும் படத்தின் தலைப்பு, டைட்டில் டீசர் மூலம் அதிகாரப்பூர்வமாக அறிவிக்கப்பட்டது.

தொடர்ந்து இந்த ஆண்டு பிப்ரவரி மாதம் இப்படம் வெளியாகும் என எதிர்பார்க்கப்பட்ட நிலையில், தொடந்து பல்வேறு காரணங்களால் இப்படத்தின் வெளியீடு தள்ளிப்போனது. இந்நிலையில், வரும் ஜூலை மாதம் 21ஆம் தேதி இப்படம் வெளியாகிறது. 

முன்னதாக இப்படத்தின் பத்திரிகையாளர் சந்திப்பில் பேசிய வசந்தபாலன், “வல்லான் வகுத்ததே நீதி, எளியோருக்கு இங்கு அநீதி என்ற இந்தக் காலகட்டத்தில் நீதியை உரக்கச் சொல்ல இந்த 'அநீதி' திரைப்படம் வருகிறது.

நீதி கிடைக்காதவர்களின் குரலே அநீதி

நீதி கிடைக்காதவர்கள் குரலாக இப்படம் ஒலிக்கும். எளிமையான மனிதர்களின் வாழ்க்கையை இப்படம் பிரதிபலிக்கும். நண்பர்கள் அனைவரும் ஒரு குடும்பமாக இப்படத்தை தயாரித்துள்ளோம். நான் தயாரிப்பாளராக மாறி உள்ள 'அநீதி' படம் குறித்து இயக்குநர் ஷங்கர் சாருக்கு தெரிவித்த போது, தனது எஸ் பிக்சர்ஸ் சார்பில் அதை வழங்குவதற்கு முன் வந்தார்.

அவருக்கு மிக்க நன்றி. இப்படத்தில் பணியாற்றிய ஒவ்வொருவரும் தங்களது மிகச்சிறந்த பங்களிப்பை அர்ப்பணிப்புடன் வழங்கி உள்ளார்கள். இவர்களை எல்லாம் ஒருங்கிணைப்பதற்கான வாய்ப்பு எனக்கு கிடைத்ததற்கு மிகுந்த மகிழ்ச்சி. இப்படத்திற்கு உங்கள் ஆதரவை தாருங்கள் நன்றி." என உணர்ச்சிகரமாகப் பேசினார். இந்நிலையில் இப்படத்தின் டீசர் தற்போது வெளியாகி இணையத்தில் கவனமீர்த்து வருகிறது.