Mohanlal: நவ., 3ஆம் தேதி ஆஜராகுங்க...! நடிகர் மோகன்லாலுக்கு நீதிமன்றம் வைத்த செக்! எதற்கு தெரியுமா?

நடிகர் மோகன்லாலுக்குச் சொந்தமான வீடுகள் மற்றும் அலுவலகங்களில் வருமான வரித்துறையினர், 2012ஆம் ஆண்டு சோதனை நடத்தினர்.

நடிகர் மோகன்லால்

மோகன்லால் வீட்டிலிருந்து கைப்பற்றப்பட்ட யானை தந்தங்கள்

நடிகர் மோகன்லாலுக்குச் சொந்தமான வீடுகள் மற்றும் அலுவலகங்களில் வருமான வரித்துறையினர், 2012ஆம் ஆண்டு சோதனை நடத்தினர். இந்த சோதனையில் எர்ணாகுளத்தில் உள்ள அவர் வீட்டிலிருந்து 4 யானை தந்தங்கள் கைப்பற்றப்பட்டன. வருமான வரித்துறையினர் அதை வனத்துறையிடம் ஒப்படைத்தனர். இது தொடர்பாக மோகன்லாலுக்கு யானை தந்தங்கள் கொடுத்த திருச்சூரைச் சேர்ந்த கிருஷ்ணகுமார் உட்பட 4 பேர் மீது வழக்குப் பதிவு செய்யப்பட்டது.

வழக்கு ரத்து

மேலும் அவருக்கு எதிராக கடந்த 2019ஆம் ஆண்டு வனத்துறை குற்றப்பத்திரிகையை தாக்கல் செய்தது. தன் வீட்டில் கைப்பற்றப்பட்ட யானை தந்தங்களை மீண்டும் ஒப்படைக்குமாறு அப்போதைய கேரள வனத்துறை அமைச்சர் ராதாகிருஷ்ணனிடம் மோகன்லால் கோரிக்கை வைத்தார். இதையடுத்து சட்டத்தில் திருத்தம் செய்யப்பட்டு அவரிடம் மீண்டும் தந்தங்கள் ஒப்படைக்கப்பட்டன. வனத்துறை வழக்கை ரத்து செய்தது.

இதை எதிர்த்து பவுலோஸ் என்பவர் பெரும்பாவூர் நீதிமன்றத்தில் வழக்குத் தொடர்ந்தார். இவ்வழக்கில் மோகன்லால் மீது குற்றப்பத்திரிகை தாக்கல் செய்யப்பட்டது. யானை தந்தம் வைத்திருப்பதற்கான முறையான அனுமதி தன்னிடம் இருக்கிறது என்றும் இந்த வழக்கை தள்ளுபடி செய்ய வேண்டும் என்றும் மோகன்லால், கேரள உயர்நீதிமன்றத்தில் மனுதாக்கல் செய்தார். இதனை விசாரித்த உயர் நீதிமன்றம், வழக்கின் இறுதி அறிக்கையை பெரும்பாவூர் மாஜிஸ்திரேட் நீதிமன்றத்தில் தாக்கல் செய்ய உத்தரவிட்டது.

இந்நிலையில், இந்த வழக்கு விசாரணை நேற்று முன்தினம் மீண்டும் விசாரணைக்கு வந்தது. நடிகர் மோகன்லால் மற்றும் வழக்கில் தொடர்புடைய மற்றவர்கள் நவம்பர் 3ஆம் தேதி நேரில் ஆஜராகவேண்டும் என்று பெரும்பாவூர் மாஜிஸ்திரேட் நீதிமன்றம் உத்தரவிட்டுள்ளது.

உலகம் முழுவதும் திரையரங்குகளில் வெற்றிகரமாக ஓடிக்கொண்டிருக்க கூடிய நடிகர் ரஜினிகாந்தின் ஜெயிலர் திரைப்படத்தில் மோகன்லால் தாதாவாக வந்து அசத்துகிறார். படத்தில் மோகன்லால் இடம்பெறும் காட்சிகள் ரசிக்க வைக்கின்றது. கடந்த ஆகஸ்ட் 10ம் தேதி ஜெயிலர் திரைப்படம் வெளியானது. வெளியான முதல் நாளே படம் உலகம் முழுவதும் ரூ. 100 கோடியை நெருங்கி இருந்தது, அடுத்தடுத்த நாளும் நல்ல வேட்டை நடத்துகிறது. வசூலை வாரி குவித்து வரும் ஜெயிலர் படம், இதுவரை மொத்தமாக உலகம் முழுவதும் ரூ. 413 கோடி வரை வசூலித்துள்ளதாக தகவல் வெளியாகி உள்ளது.

நடிகர் மோகன்லால் தற்போது வ்ருஷ்பா என்ற திரைப்படத்தில் நடிக்க உள்ளதாக அறிவிப்பு வெளியாகியுள்ளது. இத்திரைப்படம் அடுத்த ஆண்டு திரைக்கு வர உள்ளதாக கூறப்படுகிறது. ஏக்தா ஆர் கபூர்ஸ் பாலாஜி டெலிஃபிலிம்ஸ் கனெக்ட் மீடியா மற்றும் ஏவிஎஸ் ஸ்டுடியோஸுடன் இணைந்து  தயாரிக்கும் இத்திரைப்படம் தெலுங்கு மற்றும் மலையாளம் ஆகிய மொழிகளில் படமாகிறது.

 

மேலும் படிக்க