பருத்தி விவசாயிகள் வேதனை: சப்பாத்தி பூச்சி தாக்குதல்! உதவ முன்வருமா அரசு?
வைத்தீஸ்வரன் கோயில் சுற்றுவட்டார பகுதிகளில் பருத்தி செடியில் சப்பாத்தி பூச்சியின் பாதிப்பு ஏற்பட்டுள்ளதால் விவசாயிகள் வேதனையடைந்துள்ளனர்.
காவிரி கடைமடை மாவட்டமான மயிலாடுதுறை மாவட்டத்தில் விவசாயம் பிரதான தொழிலாக இருந்து வருகிறது. இப்பகுதி மக்களின் வாழ்வாதாரம் விவசாயம் மட்டுமே. இந்நிலையில் மயிலாடுதுறை மாவட்டம், சீர்காழி மற்றும் அதன் சுற்றுவட்டாரப் பகுதிகளில் கோடைப் பயிராகப் பருத்தி பயிரிடப்பட்டுள்ளது. இந்த சூழலில் தற்போது பருத்திச் செடிகளில் சப்பாத்தி பூச்சியின் தாக்கம் அதிகரித்துள்ளதால் விவசாயிகள் பெரும் வேதனை அடைந்துள்ளனர்.
ஏற்கெனவே பருவநிலை மாற்றத்தால் மகசூல் பாதிக்கப்பட்ட நிலையில், இந்த நோய் தாக்குதல் விவசாயிகளுக்குக் கூடுதல் செலவையும், வருவாய் இழப்பையும் ஏற்படுத்தி வருகிறது. இதனால், பருத்திக்கு உரிய விலை நிர்ணயம் செய்ய வேண்டும் என விவசாயிகள் தமிழக அரசுக்குக் கோரிக்கை விடுத்துள்ளனர்.
சீர்காழியில் பருத்தி சாகுபடி - விவசாயிகள் முதலீடு
சீர்காழி சுற்றுவட்டாரப் பகுதிகளான வைத்தீஸ்வரன் கோவில், செங்கமேடு, மருவத்தூர், புங்கனூர், கற்கோயில், தொழுதூர், எடக்குடி வடபாதி உள்ளிட்ட பல கிராமங்களில் சுமார் பல ஏக்கர் பரப்பளவில் விவசாயிகள் கோடைப் பயிரான பருத்தியைச் சாகுபடி செய்துள்ளனர். பருத்தி சாகுபடிக்கு ஏக்கருக்கு 20,000 ரூபாய் முதல் 30,000 ரூபாய் வரை செலவு செய்து வருகின்றனர். இந்தப் பகுதி விவசாயிகள் தற்போது முதல் போகம் அறுவடை செய்யும் பணியில் ஈடுபட்டுள்ளனர்.
பருவநிலை மாற்றத்தால் தொடர் பாதிப்புகள்
கடந்த மாதத்தில் விட்டுவிட்டு பெய்த தொடர் மழையால், பருத்தி காய்கள் கொட்டி, மகசூல் பாதிக்கப்பட்டது. இதனால் விவசாயிகள் பெரும் இழப்பைச் சந்தித்தனர். மழையின் தாக்கம் குறைந்த நிலையில், தற்போது அறுவடைப் பணிகள் நடைபெற்று வருகின்றன. இருப்பினும், எதிர்பாராத வகையில் மற்றொரு இன்னலில் விவசாயிகள் தள்ளப்பட்டுள்ளனர்.
சப்பாத்தி பூச்சி தாக்குதல் - விவசாயிகளின் அச்சம்
தற்போது, சீர்காழி மற்றும் சுற்றுவட்டாரப் பகுதிகளில் சாகுபடி செய்யப்பட்டுள்ள பருத்திச் செடிகளில் சப்பாத்தி பூச்சியின் தாக்கம் (மீலிபக் எனப்படும் சப்பாத்தி பூச்சி) மிக அதிகமாக உள்ளது. இந்தப் பூச்சிகள் பருத்திச் செடிகளின் இலைகள், தண்டுகள் மற்றும் காய்களின் சாற்றை உறிஞ்சிவிடுவதால், செடிகள் பலவீனமடைந்து காய்ந்து விடுகின்றன. மேலும், இந்தப் பூச்சிகள் ஒருவித பிசுபிசுப்பான திரவத்தை வெளியேற்றுவதால், செடிகள் கருப்பு நிறப் பூஞ்சையால் பாதிக்கப்பட்டு, ஒளிச்சேர்க்கை தடைபடுகிறது. இதனால், பருத்தியின் தரம் குறைந்து, மகசூலும் வெகுவாகக் குறையும் அபாயம் ஏற்பட்டுள்ளது.
"கடந்த மாதம் மழையால் பாதிக்கப்பட்டு, இப்போதுதான் ஓரளவு மீண்டு வந்தோம். இந்த நிலையில், சப்பாத்தி பூச்சியின் தாக்குதல் எங்களை மேலும் பாதிப்புக்கு உள்ளாக்கியுள்ளது. இந்தப் பூச்சியைக் கட்டுப்படுத்த கூடுதல் செலவு செய்ய வேண்டியுள்ளது. ஏற்கெனவே செலவு அதிகம், இப்போது இதுவும் சேர்ந்துகொண்டது" என்று வைத்தீஸ்வரன் கோவில் பகுதியைச் சேர்ந்த ஒரு விவசாயி வேதனையுடன் தெரிவித்தார்.
செலவுகளும், சவால்களும்
சப்பாத்தி பூச்சியைக் கட்டுப்படுத்த பூச்சிக்கொல்லி மருந்துகளைத் தெளிக்க வேண்டியுள்ளதால், விவசாயிகளுக்குக் கூடுதல் செலவு ஏற்படுகிறது. இந்தப் பூச்சிகள் வேகமாகப் பரவும் தன்மை கொண்டவை என்பதால், அவற்றை உடனடியாகக் கட்டுப்படுத்தாவிட்டால், முழு பயிரும் நாசமாகும் அபாயம் உள்ளது. இது விவசாயிகளின் வருவாயைப் பெருமளவு பாதிக்கும். "பருத்திக்கு போதிய விலை கிடைக்காத இந்த நேரத்தில், இந்த நோய் தாக்குதலுக்கு மேலும் செலவு செய்யும் நிலை ஏற்பட்டுள்ளது. எங்களுக்குக் கடன் சுமைதான் மிஞ்சும்" என்று மற்றொரு விவசாயி வேதனை தெரிவித்தார்.
அரசுக்கு அவசர கோரிக்கை
பருத்திக்கு உரிய விலை இல்லாததால், உற்பத்திச் செலவைக் கூட ஈடுகட்ட முடியாமல் விவசாயிகள் தவித்து வருகின்றனர். இந்த நிலையில், சப்பாத்தி பூச்சி தாக்குதல் அவர்களுக்கு இரட்டை அடியாக அமைந்துள்ளது. எனவே, தமிழக அரசு உடனடியாக இந்தப் பிரச்சினையில் தலையிட்டு, விவசாயிகளுக்கு உரிய நிவாரணம் வழங்க வேண்டும் என அவர்கள் கோரிக்கை விடுத்துள்ளனர்.
முக்கியமாக, பருத்திக்கு உரிய ஆதார விலையை நிர்ணயம் செய்ய வேண்டும் என்றும், சப்பாத்தி பூச்சியைக் கட்டுப்படுத்தத் தேவையான பூச்சிக்கொல்லி மருந்துகளை மானிய விலையில் வழங்க வேண்டும் என்றும் விவசாயிகள் வலியுறுத்தி உள்ளனர். மேலும், வேளாண்துறை அதிகாரிகள் பாதிக்கப்பட்ட பகுதிகளுக்கு நேரில் வந்து, பயிர் பாதிப்புகளை ஆய்வு செய்து, விவசாயிகளுக்குத் தேவையான ஆலோசனைகளையும் உதவிகளையும் வழங்க வேண்டும் என்றும் அவர்கள் கேட்டுக் கொண்டுள்ளனர். விவசாயிகளின் கோரிக்கைகளை தமிழக அரசு பரிசீலித்து, உரிய நடவடிக்கை எடுக்கத் தவறினால், இது இப்பகுதி விவசாயிகளின் வாழ்வாதாரத்தைப் பெரிதும் பாதிக்கும் எனவும் வேதனை தெரிவித்து வருகின்றனர்.
Before You Go
Chicken Fertilizer : இறந்த கோழிகளை என்ன செய்வது ? மாத்தி யோசித்த விவசாயி… கொழிக்கும் வளங்கள்
தலைப்பு செய்திகள்
ட்ரெண்டிங் செய்திகள்
